မင်းတပ်မြို့နယ်တွင် စစ်ကောင်စီတပ်က အခုလအတွင်း လေကြောင်းမှ ရှစ်ကြိမ်ဗုံးကြဲတိုက်ခိုက်

ပြည်သူများ ပုန်းခိုကျင်းတူးထားကြရန် CDF အသိပေး

ချင်းပြည်နယ်၊ မင်းတပ်မြို့နယ်အတွင်း မင်းတပ် မြို့နယ် ချင်းကာကွယ်ရေးတပ်(CDF-Mindat) ထိန်းချုပ်နယ်မြေများတွင် စစ်ကောင်စီတပ်က ဗုံးကြဲတိုက်ခိုက်ခဲ့ရာ ယခုလအတွင်း လေကြောင်း တိုက်ခိုက်မှု ရှစ်ကြိမ်ပြုလုပ်ခဲ့ကြောင်း မင်းတပ် CDFက ထုတ်ပြန်သည်။

အကြမ်းဖက်စစ်ကောင်စီမှ အပစ်မဲ့ပြည်သူများ၊ စစ်ဘေးရှောင်ပြည်သူများနှင့် CDF-Mindat ၏ တပ်စခန်းများကိုဦးတည်ကာ တိုက်လေယာဉ်များဖြင့် တိုက်ခိုက်ခဲ့ခြင်းဖြစ်သည်ဟု ဆိုသည်။

အခု ဇန်နဝါရီ ၇ရက် ညပိုင်းတွင် နှစ်ကြိမ်၊ ဇန်နဝါရီ ၈ရက် နံနက်တွင် တစ်ကြိမ်၊ ဇန်နဝါရီ ၂၂ရက် ညပိုင်းတွင် နှစ်ကြိမ်၊ ယနေ့ (ဇန်ဝါရီ ၂၃ရက်) နံနက် ၁၁နာရီတွင် သုံးကြိမ်စုစုပေါင်း ရှစ်ကြိမ်တိုက်ခိုက်ခဲ့သည်ဟု ဖော်ပြထားသည်။

ထို့ကြောင့် ပြည်သူများအနေဖြင့် မိမိတို့နေအိမ် များအနီးတွင် သတ်မှတ်ထားသည့် အတိုင်းအတာများပြည့်မှီသည့် ပုန်းခိုကျင်းများတူးကြရန်နှင့် အကြမ်းဖက်စစ်ကောင်စီ၏ လေကြောင်းရန် အား (အထူး)သတိပြုကြပါရန် မင်းတပ် CDFက အသိပေးထုတ်ပြန်ခဲ့သည်။

Public Service Announcement

စစ်ကောင်စီတပ်သည် မင်းတပ်မြို့နယ်အတွင်း တိုက်ပွဲဖြစ်ပွားမှုမရှိဘဲ လေကြောင်း တိုက်ခိုက်မှု လုပ်ဆောင်နေခြင်းဖြစ်သည်။

ဇန်နဝါရီ ဒုတိယပတ်အတွင်းကလည်း စစ်ကောင်စီတပ်သည် ထန်တလန်မြို့နယ်ရှိ ချင်းအမျိုးသားတပ်ဦး(CNF) ဌာနချုပ်ကို လေကြောင်းမှ ဗုံးကြဲတိုက်ခိုက်ခဲ့ရာ CNF ရဲဘော် ငါးဦးကျဆုံးပြီး ဒဏ်ရာရသူများ ရှိခဲ့သည်။