▪︎တိုက်ပွဲတွင်စစ်သား ၂၀ ထက်မနည်းသေဆုံးဟုဆို
▪︎သင်္ဘောပေါ်မှလက်နက်ခဲယမ်းများ၊စက်သုံးဆီပေပါ ၃၀၀၀ ကျော်နှင့်စားနပ်ရိက္ခာများကို PDFများသိမ်းဆည်း
ကနီမြို့နယ်တွင်စစ်ကောင်စီတပ်၏ ရိက္ခာတင်သင်္ဘောတစ်စီးကိုပြည်သူ့ကာကွယ်ရေးမဟာမိတ်တပ်ဖွဲ့များကတိုက်ခိုက်သိမ်းပိုက်ပြီး ရေယာဉ်ပေါ်မှ စက်သုံးဆီပေပါ၃၀၀၀ ကျော်နှင့် လက်နက်ခဲယမ်းများ၊ စာသုံးကုန်များကို ယူဆောင်နိုင်ခဲ့ကြောင်း ကျောက်လုံးကြီး KLG တပ်မဟာ ပြန်ကြားရေးတာဝန်ခံကပြောသည်။
“ဆီပေပါ သုံးထောင်ကျော်တယ်။ ဆန်တွေ ဆီတွေဆားတွေလည်းပါတယ်။ လက်နက်ခဲယမ်းတွေလည်း ရပါတယ်” ဟု ကျောက်လုံးကြီး KLG တပ်မဟာ ပြန်ကြားရေးတာဝန်ခံကပြောသည်။
စစ်ကောင်စီတပ်၏ ရိက္ခာတင်သင်္ဘောမှာ ပြီးခဲ့သည့် ဇန်နဝါရီလ ၃၁ရက်ည ၇ နာရီအချိန်ခန့်တွင် ကနီမြို့နယ် သပြေတောရွာအနီးတွင် သောင်တင်နေစဥ်ပြည်သူ့ကာကွယ်ရေးမဟာမိတ်တပ်ဖွဲ့များက တိုက်ခိုက်သိမ်းပိုက်ခဲ့ခြင်းဖြစ်သည်။ ထိုသတင်းကို ချက်ချင်းမထုတ်ပြန်ခဲ့ဘဲ ရေယာဉ်ပေါ်မှ လက်နက်ခဲယမ်းများ၊ စက်သုံးဆီပေပါများ၊ဆန်များ ၊ဆီများနှင့်စားသုံးကုန်ပစ္စည်းများကို ပြည်သူ့ကာကွယ်ရေးရဲဘော်များက ကိုးရက်ကြာအောင် သယ်ယူခဲ့ကြသည်။ ဇန်နဝါရီ ၃၁ရက်မှ ဖေဖော်ဝါရီ ၈ရက်အထိ သယ်ယူခဲ့ကြပြီး ယနေ့(ဖေဖော်ဝါရီ ၁၀ရက်)မှ တရားဝင်သတင်းထုတ်ပြန်ခြင်းဖြစ်သည်။
” ခရိုင်ကွပ်ကဲရေးရဲ့ ကွပ်ကဲမှုနဲ့ သယ်ယူခဲ့ကြတယ်” ဟု ဒေသတွင်း ပြည်သူ့ကာကွယ်ရေးရဲဘော်တစ်ဦးကပြောသည်။
Public Service Announcement
အဆိုပါ ရေယာဉ်သည် အလျားပေ ၂၀၀ခန့်၊ အနံ ပေ ၅၀ခန့်ရှိသော ကုန်တင်ရေယာဉ်ဖြစ်ပြီး ဇန်နဝါရီ ၃၁ရက်တိုက်ပွဲတွင်စစ်တပ်က အထိနာပြီးနောက် စွန့်ခွာထွက်ပြေးသွားပြီးသိမ်းဆည်းရရှိခဲ့ခြင်းဖြစ်သည်။
“ရေယာဉ်ကို သိမ်းပိုက်ခဲ့တဲ့တိုက်ပွဲမှာ စစ်ကောင်စီဘက်က ၂၀ထက်မနည်းသေတယ်။ အရှင်ဖမ်းမိတာတွေလည်း ရှိတယ်။ဒီထက် အသေးစိတ်တော့ မပြောနိုင်သေးပါဘူး”ဟု ပြည်သူ့ကာကွယ်ရေးရဲဘော်တစ်ဦးကပြောသည်။
စစ်ကောင်စီတပ်သေဆုံးထိခိုက်မှုအခြေအနေကို People’s Spring ကသီးခြားအတည်မပြုနိုင်ပါ။
အဆိုပါ ရေယာဉ်ကို ကနီမြို့နယ် သပြေတောနှင့်ရွှေအုန်းပင်ကြား ချင်းတွင်းမြစ်တနေရာတွင် ပြည်သူ့ကာကွယ်ရေးမဟာမိတ်တပ်ဖွဲ့များက တိုက်ခိုက် သိမ်းယူခဲ့ခြင်းဖြစ်သည်။ စစ်ကောင်စီတပ်က ဖေဖော်ဝါရီ ၉ရက်မှစကာ အဆိုပါကျေးရွာနှစ်ရွာကို စစ်ကြောင်းထိုးလာ၍ ပြည်သူ့ကာကွယ်ရေးမိတ်တပ်ဖွဲ့များနှင့် တိုက်ပွဲများဖြစ်ပွားနေကြောင်းသတင်းရရှိသည်။
အဆိုစစ်ဆင်ရေးကို ကျောက်လုံးကြီး KLG PDF၊နဂါးညီနောင်အဖွဲ့၊Alphaအဖွဲ့၊ ချင်းတွင်းဂဠုန်ရာဇာ၊ယင်းမာပင် PDA၊ဗိုလ်နှုတ်ခမ်းမွှေးအဖွဲ့၊ ဗျတ္တညီနောင်၊ချိုမိုင်မိုင်အဖွဲ့၊မြောက်ယမားအဖွဲ့၊ခရိုင်း ရင်း1၊ ခရိုင်း ရင်း 2၊နှင့် ကနီ ယင်းမာပင် ဆားလင်းကြီးမဟာမိတ်ညီနောင်များအဖွဲ့တို့က ပူးပေါင်းတိုက်ခိုက်ခဲ့ခြင်းဖြစ်သည်။
