ကန့်ဘလူမြို့နယ်၊ ဇီးကုန်းတိုက်နယ်၊ညောင်ကိုင်းကျေးရွာမှ စစ်ကောင်စီတပ်နှင့်ပျူစောထီးဂိတ်စခန်းကို ပြည်သူ့ကာကွယ်ရေးမဟာမိတ်အဖွဲ့များက ၄ နာရီကြာ တိုက်ခိုက်ပြီးနောက်သိမ်းပိုက်နိုင်ခဲ့ကြောင်းတော်လှန်ရေးအင်အားစုများကပြောသည်။
” ညောင်ကိုင်းပျူဂိတ်ကို သိမ်းနိုင်တယ်။ သူတို့ဘက်က တစ်ယောက်သေတယ်။ ကျန်တဲ့သူတွေ ဒဏ်ရာတွေနဲ့ ထွက်ပြေးကုန်တယ်။ ဒါကိုအတည်ပြုပါတယ်” ဟုကန့်ဘလူမြို့ပြည်သူ့ကာကွယ်ရေးတပ်ဖွဲ့မှ တပ်ဖွဲ့ဝင်တစ်ဦးကပြောသည်။
ညောင်ကိုင်းရွာပျူဂိတ်စခန်းကို ဖေဖော်ဝါရီ ၁၀ ရက်နေ့မနက် ၉ နာရီမှစတင်ကာ Kanbalu Underground Warriors အပါအဝင် ကန့်ဘလူမြို့နယ်အတွင်း ပြည်သူ့ကာကွယ်ရေးမဟာမိတ်အဖွဲ့များက ပူးပေါင်း၍ တိုက်ခိုက်ခဲ့ကြခြင်းဖြစ်ကြောင်း ၎င်းကဆက်ပြောသည်။
Drone တပ်ဖွဲ့ အပြင် လက်နက်ကြီး၊လက်နက်ငယ်များအသုံးပြု၍ ပစ်ခတ်တိုက်ခိုက်ခဲ့ကြောင်း၊ စစ်ကောင်စီတပ်နှင့် ပျူစောထီးများကလည်း လက်နက်ကြီးလက်နက်ငယ်များဖြင့် ပြန်လည်ပစ်ခတ်ခဲ့သည်ဟု ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်ကဖော်ပြထားသည်။ တိုက်ပွဲမှာ ၄ နာရီခန့်ကြာပြီးနောက် ပြည်သူ့ကာကွယ်ရေးမဟာမိတ်များက စခန်းကိုအောင်မြင်စွာသိမ်းပိုက်နိုင်ခဲ့ခြင်းဖြစ်သည်ဟုသိရသည်။
“စခတစ်ကောင်သေတယ်ဗျ။သူတို့က အကုန်ရှောင်ထွက် ပြေးတော့ ကျန်တာဘာမှ မရဘူးပြောတယ်ဗျ ။ကြံ့ခိုင်ရေးပါတီကတ်တွေ၊ ပြည်ခိုင်ဖြိုးလက်ပတ်တွေ အထပ်လိုက်ရခဲ့တယ်ပြောတယ်ဗျ” ဟု ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူတစ်ဦးကလည်းပြောသည်။
ကန့်ဘလူ၊ကျွန်းလှဒေသတွင်စစ်ကောင်စီတပ်က အင်တာနက်လိုင်းဖြတ်ထား၍ တိုက်ပွဲပုံများရရန်၊တင်ရန်ခက်ခဲကြောင်းလည်းသိ့ရသည်၊ စစ်ကောင်စီတပ်မှ တစ်ဦးသေပြီး အများအပြားဒဏ်ရာရကာထွက်ပြေးကုန်ခြင်းဖြစ်ပြီး PDFများထိခိုက်ဒဏ်ရာရရှိမှုမရှိဟုအထက်ပါသတင်းရင်းမြစ်များကပြောသည်။စစ်ကောင်စီတပ်သေဆုံးထိခိုက်မှုများကို People’s Spring ကသီးခြားအတည်မပြုနိုင်ပါ ။
စစ်တပ်နှင့်ပျူပူးပေါင်းစခန်းကိုKanbalu Underground Warriors ၊ MPF U.18 ၊ မြေပြင်လှုပ်ရှားညီနောင်များ နှင့် ကန့်ဘလူမြို့နယ် L – PDF မဟာမိတ်အဖွဲ့များက ပူးပေါင်းတိုက်ခိုက်ခဲ့ခြင်းဖြစ်သည်။
ဖေဖော်ဝါရီလ(၉)ရက်ကလည်းကန့်ဘလူမြို့နယ် စံပယ်နံသာရဲစခန်းကို ပြည်သူ့ကာကွယ်ရေးမဟာမိတ်များကစီးနင်း တိုက်ခိုက်ခဲ့သည်။ ထိုတိုက်ပွဲတွင် စစ်ကောင်စီတက်ဘက်မှ ၂၀ ဦးမက သေဆုံးခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနကထုတ်ပြန်ထားသည်။
ထိုအပြင် ဖေဖော်ဝါရီ ၉ ရက်တွင် ကန့်ဘလူ ၊ကျွန်းလှမြို့နယ်တွင် PDFများက စစ်ကောင်စီတပ်စခန်းများကို တစ်နေ့တည်းများစွာတိုက်ခိုက်ခဲ့သည်။ကန့်ဘလူမြို့ရှိ တင့်ကားတပ်ရင်း ၆၀၀၆ ကိုလည်းPDF များကရှော့တိုက်ဒုံး ၃ လုံးဖြင့်ပစ်ခတ်တိုက်ခိုက်ခဲ့သည်။ စစ်တပ်ကလည်း လက်နက်ကြီးများဖြင့် ပြန်လည်ပစ်ခတ်ခဲ့ကြောင်းဒေသခံအချို့ကပြောသည်။