စစ်ကိုင်းတိုင်း၊ ကန့်ဘလူမြို့နယ်ရှိ အင်းမကျေးရွာကို စစ်ကောင်စီတပ်က နှစ်ရက်ဆက်မီးရှို့ဖျက်ဆီးမှုကြောင့် နေအိမ် ၁၅လုံး မီးလောင်ပျက်စီးခဲ့ကြောင်း ဒေသခံများက ပြောသည်။
ကန့်ဘလူမြို့နယ်မြောက်ပိုင်း၊ ပင့်သာတိုက်နယ်ရှိ အင်းမရွာကို စစ်ကောင်စီတပ်က ဇန်နဝါရီ ၂၁ နှင့် ၂၂ ရက်တို့တွင် နှစ်ရက်ဆက် မီးရှို့ခြင်းကြောင့် နေအိမ် ၁၅လုံးပြာကျပြီး အိမ်မွေးတိရိစ္ဆာန်အချို့ပါ ထိခိုက် သေဆုံးခဲ့ကြောင်း ဒေသတွင်း Infinity Groupက ဖော်ပြသည်။
“လူထိခိုက်သေဆုံးတာတော့ မကြားသေးဘူး”ဟု ဒေသခံတစ်ဦးက ပြောသည်။
အင်းမကျေးရွာသည် ပြီးခဲ့သည့် ၂၀၂၂ နိုဝင်ဘာ ၁၂ ရက်ကလည်း ပထမအကြိမ်မီးရှို့ဖျက်ဆီးခံခဲ့ရပြီး နေအိမ် ၈၀ကျော် ပြာကျခဲ့ကြောင်း ဒေသခံများက ပြောသည်။
Public Service Announcement
စစ်ကောင်စီတပ်သည် ကန့်ဘလူမြို့နယ်မြောက် ခြမ်းအား ဇန်နဝါရီ ၆ ရက်မှစတင်ကာ ခမရ(၃၆၈)နှင့် ပျူစောထီးပူးပေါင်းစစ်ကြောင်းဖြင့် စစ်ကြောင်းထိုးနေခြင်းဖြစ်သည်။
အဆိုပါ စစ်ကောင်စီစစ်ကြောင်းသည် ၂၀၂၂ ဒီဇင်ဘာမှ ယနေ့အထိ ကန့်ဘလူမြို့နယ်နှင့် ကျွန်းလှမြို့နယ်အတွင်းအား စစ်ကြောင်းထိုးဝင်ရောက်နေပြီး ကျေးရွာ (၉)ရွာမှ နေအိမ်များနှင့် စစ်ရှောင်တဲများအား မီးရှို့ဖျက်ဆီးခဲ့ပြီး ပြည်သူ ၁၁ဦးအား နှိပ်စက်သတ်ဖြတ်ခဲ့ကြောင်း၊ အမျိုးသမီးနှစ်ဦးလည်း ပျောက်ဆုံးနေသည်။
ယင်းစစ်ကြောင်းကြောင့် အင်းမ၊ပင့်သာ၊ဖလားရ၊ချောင်းကြားနှင့် ရှမ်းကုန်းကျေးရွာ စသည့် ရွာ ၅ ရွာမှ ဒေသခံပြည်သူထောင်နှင့်ချီ ထွက်ပြေးတိမ်းရှောင်နေရကြောင်း ကျွန်းလှ – ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်အဖွဲ့က ပြောသည်။
