မကွေးတိုင်း၊ ပေါက်မြို့နယ်တွင် စစ်ကောင်စီတပ်က ပျူစောထီးကျေးရွာအဖြစ် အသွင်ပြောင်းလိုက်၍ မနေလိုသောကြောင့် ထွက်ပြေးတိမ်းရှောင်လာသော ပြည်သူ ၈၀၀ကျော်ကို ထောက်ပံ့မှုများ ပြုလုပ်ခဲ့ကြောင်း Oak Awe UG Group ပြန်ကြားရေး တာဝန်ခံက ပြောသည်။
ပျူစောထီးကျေးရွာမှ PDFထိန်းချုပ်ထားသည့် နယ်မြေဘက်ကို စစ်ဘေးရှောင်လာသည့်အိမ်ထောင်စု ၁၉၇စု၊ လူဦးရေ ၈၂၃ဦးအား ကိုရီးယားနိုင်ငံမှ ကျပ် ၁၀သိန်း၊ စလေမြို့မှ ပုဂ္ဂိုလ်တစ်ဦးက ကျပ် ၇ သိန်း၊ CRPH နော်ဝေက ၁၅ သိန်းကျပ်၊ စုစုပေါင်း ၃၂ သိန်းကျပ် လှူဒါန်းပေးခဲ့ကြောင်း၊ ထို့ကြောင့် ယမန်နေ့(မတ်လ၅ ရက်)က အိမ်ထောင်စုတစ်စုလျှင် တစ်သောင်းကျပ်နှုန်း၊ အများပြည်သူလှူဒါန်းသည့် ကြက်သွန်များအား တစ်အိမ်ထောင်လျှင် တစ်ပိဿာနှုန်း လှူဒါန်းပေးခဲ့ကြောင်း Oak Awe UG Group ပြန်ကြားရေးတာဝန်ခံက ပြောသည်။
“သူတို့ကျေးရွာကြီးက စကစရဲ့လက်ဦးမှုရယူသွားတော့ ပျူစောထီးရွာဖြစ်သွားတယ်လို့ ဖြစ်ကောင်းဖြစ်နိုင်ပါလိမ့်မယ်။သူတို့ကိုယ်တိုင်လည်း ပျူသင်တန်းတက်ခဲ့ရတယ်။ လက်နက်ကိုင်ခဲ့ရတယ်ပြောတယ်။ ဘယ်လိုပဲဖြစ်ဖြစ် သူတို့တွေက ကျွန်တော်တို့ PDF တွေကိုကြောက်နေရတယ်။ နောက်စကစတွေကိုလည်း ကြောက်ရတယ်လို့ဝန်ခံတယ်။”ဟု Oak Awe UG Group ပြန်ကြားရေးတာဝန်ခံက ပြောသည်။
“ကျွန်တော်တို့တပ်ကို လာရောက်ကူးပြောင်းလာတဲ့နေရာမှာ စိတ်ရင်းအမှန်နဲ့နေထိုင်ပေးကြဖို့၊ လိုအပ်တဲ့အကူအညီတွေကို အဆင့်ဆင့်တင်ပြပေးဖို့၊ ဒလန်တွေသူသျှိုတွေက ပါကောင်းပါနိုင်ပါလိမ့်မယ်။ ဒလန်သူသျှိုလုပ်မယ်ဆိုရင်တော့ မသိရင်တော့ကိစ္စမရှိဘူး။ သိသွားရင်တော့ သူတို့တွေအတွက် လုပ်ရိုးလုပ်စဥ်အတိုင်း ဆောင်ရွက်သွားမှာပါ။”ဟု အထက်ပါတာဝန်ခံက ရှင်းပြသည်။
Public Service Announcement
အဆိုပါ စစ်ဘေးရှောင်စောင့်ရှောက်မှုများအား သိန်းငှက်နက်ဆိပ်ဖြူတော်လှန်ရေးတပ်ဦး(B.H.S.R.F)နှင့် တိုက်မောင်း LPDF မဟာမိတ်တပ်ဖွဲ့တို့ ပူးပေါင်းဆောင်ရွက်ခဲ့ကြောင်း အသိပေးထားသည်။
