နေရပ်မပြန်သည့် စစ်ရှောင်စခန်းများ ရွာအဖြစ် ပြောင်းလဲထားရှိမည်ဟု ပြော
ရှမ်းပြည်နယ်မြောက်ပိုင်း ကွတ်ခိုင်ဒေသအတွင်းရှိ စစ်ရှောင်စခန်းများကို ကျေးရွာအဖြစ် အမည် ပြောင်းလဲပြီး ဆက်လက်နေထိုင်ကြရန် စစ်ကောင်စီတပ်က အတင်းအကြပ်ပြောဆိုနေကြောင်း ကွတ်ခိုင်စစ်ရှောင်ပြည်သူများကို ကိုးကားပြီး ကချင်လွတ်လပ်ရေးအဖွဲ့(KIO/KIA) သတင်းပြန်ကြားရေးဌာနက ဖော်ပြသည်။
ပြီးခဲ့သည့် မတ်လ ၁၄ရက်ကစပြီး စခန်းတာဝန်ခံများကိုခေါ်ယူပြီး စစ်ရှောင်စခန်းများ ဖျက်သိမ်းလိုက်ကြောင်းအသိပေးကာ စစ်ရှောင်ပြည်သူများ နေရပ်ကျေးရွာများသို့ ပြန်ရန်နှင့် နေရပ်ပြန်ရန် အဆင်မပြေသူများအနေဖြင့် လက်ရှိနေရာပင် ကျေးရွာတစ်ခုအဖြစ်နေထိုင်နိုင်ကြောင်း ပြောဆိုလာခြင်းဖြစ်သည်ဟု ဆိုသည်။
နေရပ်ပြန်ရန် အဆင်သင့်မဖြစ်သေးသည့် စစ်ရှောင်စခန်းများထဲ၌ နမ့်ဖက်ကာ KBCစစ်ရှောင်စခန်း ၊ အောင်သပြေ၊ မိုင်းယုလေး၊ ဆွတ်အောင်၊ လွယ်မူအာ စစ်ရှောင်စခန်းများ ပါဝင်သည်ဟုဆိုသည်။
အဆိုပါ သတင်းဖော်ပြချက်နှင့်ပတ်သက်ပြီး နမ့်ဖက်ကာ ဒေသခံတစ်ဦးအား ဆက်သွယ်မေးမြန်းရာ စခန်အချို့အား ကျေးရွာအမည်ပြောင်းလဲရန် အဆင်ပြေနိုင်သော်လည်း အချို့မှာ အဆင်မပြေဟု ပြောသည်။
“ဒီမှာက စစ်ရှောင်ကနှစ်ခုရှိတာ။ အောင်သပြေနဲ့ KBCနဲ့။ အောင်သပြေကတော့ ရွာနာမည်ပြောင်းလို့ရလောက်တယ်။ သူတို့က သီးသန့် ရပ်ကွက်လုပ်ပေးထားတာလေ။ မြေလွတ်မှာ တခါတည်း အိမ်သေးသေးလေးတွေဆောက်ပြီး လုပ်ပေးထားတာ။ ဘုရားကျောင်းကတော့ မရလောက်ဘူးထင်တယ်ဗျ။ သူတို့ဘုရားကျောင်းဝန်ကြီးထဲမှာမှ အဆောင်တန်းကြီး တဆက်တည်း ဆောက်ထားတာလေ။ သူတို့ကတော့ ရွာနာမည်မှည့်လို့မရလောက်ဘူး။ ပြန်ဖို့ဆိုတာကလည်း ခက်တော့ ခက်မှာပဲ”ဟု နမ့်ဖက်ကာ ဒေသခံက ပြောသည်။
စစ်ကောင်စီတပ် အာဏာသိမ်းပြီးနောက် တစ်နိုင်ငံလုံးရှိ စစ်ရှောင်စခန်းများကို ရုတ်သိမ်းရန် စစ်ရှောင်စခန်းများအား အတင်းအကြပ်ဖိအားပေးလျက်ရှိသည်။
ရခိုင်ဒေသ စစ်ရှောင်စခန်းများကိုလည်း စစ်ကောင်စီတပ်ကနေရပ်ပြန်ရန် ဖိအားပေးမှုများရှိသကဲ့သို့ ကချင်ဒေသစစ်ရှောင်စခန်းများကိုလည်း နေရပ်ပြန်ခိုင်းခြင်းများ ရှိနေသည်။
