စစ်ကိုင်းတိုင်း၊ မုံရွာမြို့နယ်၊ မုံရွာ – မန္တလေးလမ်းပေါ် မုံရွေးစံပြကျေးရွာရှိ နေအိမ်တစ်လုံးနှင့် စျေးဆိုင်ခန်းများအား စစ်ကောင်စီတပ်နှင့် ပျူစောထီးများက မီးရှို့ဖျက်ဆီးသွားကြောင်း ဒေသခံများက ပြောသည်။
ယမန်နေ့ (မတ်လ ၂၅ ရက်) မွန်းလွဲ ၁နာရီခွဲခန့်က မုံရွာ – ချောင်းဦးလမ်းပိုင်းရှိ မုံရွေးစံပြကျေးရွာအား စွမ်းရည်ထက်ဆီဆိုင်အနီးရှိ စစ်ကောင်စီတပ်နှင့် တောပုကျေးရွာမှ ပျူစောထီးများ ရောက်ရှိလာပြီး ဓူဝံလက်ဖက်ရည်ဆိုင်အပါအဝင် ဆိုင်ခန်း ၆ခန်း၊ နေအိမ်တစ်လုံးတို့ကို မီးရှို့ဖျက်ဆီးသွားကြောင်း ဒေသခံများက ပြောသည်။
“ပေါက်ကွဲသံတွေ သေနတ်သံတွေလည်း ကြားလိုက်ရတယ်။ အဲဒီဆိုင်တွေက စျေးနဲ့လည်းနီးတယ်။”ဟု မုံရွာနယ်ခံတစ်ဦးက ပြောသည်။
ပျူများက မုံရွေးကျေးရွာအားမီးရှို့သွား၍ တိုက်ပွဲများရှိလာနိုင်သောကြောင့် မုံရွာ-ချောင်းဦးလမ်းပိုင်းအား အရေးပေါ်အခြေအနေအရပိတ်သိမ်းထားကြောင်း ဒေသတွင်းတော်လှန်ရေးအင်အားစုများက အသိပေးသည်။
Public Service Announcement
ထို့အပြင် တောပုကျေးရွာမှ ပျူစောထီးများသည် စစ်ကောင်စီတပ်နှင့်ပူးပေါင်းကာ မုံရွာနယ်အတွင်းရှိ ကျေးရွာများအား မီးရှို့ဖျက်ဆီးခြင်း၊ ဒေသတွင်းတော်လှန်ရေးအင်အားစုများအား ဖမ်းဆီးနှိပ်စက်သတ်ဖြတ်ခြင်းများ ပြုလုပ်နေသည်။
စစ်ကောင်စီက အာဏာသိမ်းပြီးနောက်ပိုင်း ၂၀၂၁ မေလမှ ၂၀၂၃ ဖေဖော်ဝါရီလကုန်အထိ အိမ်ပေါင်း ၆၀,၄၅၉လုံး မီးရှို့ဖျက်ဆီးခံထားရပြီး စစ်ကိုင်းတိုင်းမှာ အများဆုံးဖြစ်ကာ နေအိမ်ပေါင်း ၄၇,၇၇၈ လုံး ပျက်စီးဆုံးရှုံးခဲ့ကြောင်း Data For Myanmar အဖွဲ့က ထုတ်ပြန်ထားသည်။
