မုံရွာမြို့နယ် ထနောင်းတောတောင်ရွာ စစ်အုပ်စုမီးရှို့ဖျက်ဆီးရာ သက်ကြီးရွယ်အိုသုံးဦး သေဆုံး

စစ်ကိုင်းတိုင်း၊ မုံရွာမြို့နယ်ရှိ ထနောင်းတောတောင် ကျေးရွာအား အကြမ်းဖက်စစ်ကောင်စီတပ်နှင့်ပျူစောထီးများက မီးရှို့ဖျက်ဆီးခဲ့ရာ နေအိမ် ၆၀ကျော် မီးလောင်ပြာကျခဲ့သည့်အပြင် ထွက်မပြေးနိုင်သည့် သက်ကြီးရွယ်အို သုံးဦး ပိတ်မိ သေဆုံးခဲ့ကြောင်း ဒေသတွင်းသတင်းရင်းမြစ်များက ​ပြောသည်။

ယနေ့ (မတ်လ ၁၅ရက်) နံနက်ပိုင်းက မုံရွာမြို့နယ်၊ တောပုပျူရွာနှင့် စွမ်းရည်ထက် ဆီဆိုင်ရှေ့ဂိတ်မှ ထွက်လာသော စစ်ကောင်စီတပ်နှင့် ပျူစောထီး စုစုပေါင်းအင်အား ၄၀ဝန်းကျင်သည် ယနေ့နံနက် ၆ နာရီခန့်က မုံရွာ-အမြင့်လမ်းပေါ်ရှိ ထနောင်းတော(တောင်) ကျေးရွာအား မီးရှို့ဖျက်ဆီးခဲ့ရာ နေအိမ် ၆၀ကျော် မီးရှို့ဖျက်ဆီးခံရကြောင်း၊ ထိုသို့မီးရှို့ဖျက်ဆီးစဥ် ကျေးရွာအတွင်းမှ ထွက်ပြေးတိမ်းရှောင်ခြင်းမပြုနိုင်ခဲ့သည့် အသက် (၇၀) ကျော်အရွယ် အဘိုးအို နှစ်ဦး ၊ အဘွားတစ်ဦး သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။

စစ်ကောင်စီတပ်သည် နံနက် ၁၁နာရီခွဲတွင် တောပုမြောက်ပိုင်း ပျူကျေးရွာသို့ ဝင်ရောက်ကာ တောပုမှတစ်ဆင့် ဆိုင်ကယ် ၁၅စီးဖြင့် ၎င်းတို့တပ်စွဲရာ စွမ်းရည်ထက်ဆီဆိုင်သို့ပြန်သွားခဲ့ကြောင်း မုံရွာ – အမြင့်လမ်းသတင်းမှန်ပြန်ကြားရေးက ပြောသည်။

ပြီးခဲ့သည့် ၂၀၂၂စက်တင်ဘာ ၂၇ရက်ကလည်း စစ်ကောင်စီတပ်သည် ထနောင်းတောမြောက်ရွာ နေအိမ် လေးလုံး၊ ထနောင်းတောတောင်ရွာ နေအိမ် သုံးလုံးကိုမီးရှို့ဖျက်ဆီးခဲ့သေးသည်။

Public Service Announcement