စစ်ကိုင်းတိုင်း စစ်ကိုင်းနှင့် ဝက်လက်မြို့နယ်တို့၌ စစ်ကောင်စီတပ်အား တိုက်ခိုက်ရာ ခုနစ်ဦးထက်မနည်းသေဆုံးကြောင်း ဒေသတွင်း တော်လှန်ရေးအင်အားစုများက ပြောသည်။
မတ်လ ၂၅ ရက် ညနေပိုင်းက ဆားတောင်မြို့မှ သိမ်ချောင်းရွာဘက်သို့ စစ်ကြောင်းထိုးလာသော စစ်ကောင်စီတပ်အား ညနေ ၆ နာရီ ၄၅မိနစ်ခန့်တွင် ကူကြီးကုန်းနှင့်သိမ်ချောင်းရွာကြား၌ စနိုက်ပါဖြင့်ပစ်ခတ်တိုက်ခိုက်ခဲ့ရာ တစ်ဦးသေဆုံးကြောင်း Zero ပြောက်ကျားတပ်ဖွဲ့ခေါင်းဆောင် ကိုသက်ကြီးက ပြောသည်။
အဆိုပါ စစ်ကြောင်းကို ည ၇နာရီခွဲခန့်တွင် သိမ်ချောင်းရွာချောင်းကူးတံတားအနီး၌ ကင်းပုန်းဝပ်၍ဆက်တိုက်ခဲ့ရာ တိုက်ပွဲချိန် ၁၅ မိနစ်ခန့်ကြာမြင့်ခဲ့ပြီး စစ်ကောင်စီတပ်သား လေးဦးသေဆုံးကြောင်း ကိုသက်ကြီးက ဆိုသည်။
စစ်ဆင်ရေးကို ZERO ပြောက်ကျားတပ်ဖွဲ့(မြင်းခြံ)နှင့် မိုးကြိုး(ဆားတောင်)အဖွဲ့တို့ပူးပေါင်းတိုက်ခိုက်ခဲ့ကြောင်း အသိပေးထားသည်။
Public Service Announcement
အလားတူ မတ်လ ၂၅ ရက် နံနက် ၁၀နာရီခွဲခန့်က ဝက်လက်မြို့နယ်၊ ရွာသာကြီးမှ စိုင်နိုင်ကြီးကျေးရွာဘက်သို့ စစ်ကြောင်းထိုးလာသော စစ်သားများကို ရွေဘိုခရိုင်အမှတ်(၂၃)တပ်ရင်းတပ်ခွဲ၁နှင့်ဒေသခံ (ပကဖ)တပ်ဖွဲ့များပူးပေါင်း၍ မိုင်း၁၀လုံးဖြင့် တိုက်ခိုက်ခဲ့ရာ စစ်သားနှစ်ဦးသေဆုံးပြီး ဒဏ်ရာရရှိသူအများအပြားရှိနိုင်ကြောင်း ရွှေဘိုခရိုင် ပြည်သူ့ကာကွယ်ရေးတပ်ဖွဲ့(တပ်ရင်း၂၃) က သတင်းထုတ်ပြန်သည်။
“ရွာသာကြီးကနေခွဲထွက်လာတယ်။ အင်အား ခန့်မှန်း တစ်ရာလောက်တော့ရှိမယ်။ ကားကြီးကို အဓိကထားဆွဲလိုက်တာ။ မမျှော်လင့်ဘဲ နောက်ကားအသေးပေါ်က တအားပစ်တဲ့အတွက် ရဲဘော်တွေအထိအခိုက်တော့မရှိဘူး။ အသက်လုပြီးဆုတ်ခဲ့ရတယ်။ လယ်ကွင်းပြင်ထဲမှာ ဆွဲရတာဆိုတော့။”ဟု ရွှေဘိုခရိုင် (တပ်ရင်း၂၃) တပ်ရင်းမှူး ကိုရန်ကြီးက ပြောသည်။
ဖြစ်စဥ်နှင့်ပတ်သက်၍ စစ်အုပ်စု၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
ဝက်လက်နယ်၌ မိုင်းဆွဲခံရသော စစ်အုပ်စုသည် ရွှေဘိုမြို့သို့ပြန်လည်ဆုတ်ခွာသွား၍ ယာယီပိတ်ထားသော ရွှေဘို-မန္တလေးလမ်းအား ပြန်လည်ဖွင့်ထားကြောင်း ဒေသတွင်းတော်လှန်ရေးအင်အားစုများက ပြောသည်။
