ရန်ကုန်မြို့တွင် ည ၉ နာရီ မှ မနက် ၄ နာရီအတွင်း အမေးအမြန်းမရှိ လူငယ်များကို ပစ်မှတ်ထား၍ ဖမ်းဆီးစစ် ဆေးရန် စစ်ကောင်စီက ညွှန်ကြားလာကြောင်း နယ် မြေခံရဲများနှင့်နီစပ်သူများက ပြောသည်။
ရန်ကုန်မြို့အတွင်း စစ်ကောင်စီထောက်တိုင်များ ပစ်ခတ်သတ်ဖြတ်ခံရမှု များပြားလာခြင်းအပါအဝင် ပြည်သူ့ကာကွယ်ရေးတပ်ဖွဲ့ PDF များ ပြန်လည်ဝင်ရောက် နေကြောင်း သတင်းအရ ဟု၎င်းတို့ကပြောသည်။
“မာရှယ်လော ပုံစံမဟုတ်ဘူး။ရန်ကုန်တစ်မြို့လုံး စီမံချက်နဲ့ ည ၉ နာရီကနေ မနက် ၄ နာရီအတွင်း သူတို့ဘက်က အမေးအမြန်းမရှိ ဖမ်းမယ် ဆိုပြီး မနေ့က ဖုန်းနဲ့ လှမ်းအသိပေးတယ်”ဟု မြောက်ဥက္ကလာပ ရဲစခန်း နှင့် နီးစပ်သူ တစ်ဦးက People’s Spring သတင်းဌာနသို့ ပြောသည်။
ထို့အပြင် ယမန်နေ့(မတ်လ ၃၁ ရက်) ည ၈ နာရီခန့်ကလည်း မြောက်ဒဂုံ ၄၁ ရပ်ကွက် လမ်းမပေါ်၌ လူငယ်နှစ်ဦး ဖမ်းဆီးခံရကြောင်းဒေသခံတစ်ဦးကပြောသည်။
“ဖူဆယ်ကွင်းကနေ ဘောလုံးကန်ပြီး ပြန်လာတဲ့ ကလေးတွေ။လမ်းပေါ် တက္ကစီ ငှားနေတုန်း ဖမ်းခံရတာ။ဖမ်းခံရတဲ့ကလေး တွေနဲ့ဆက်စပ်လို့ဆက်စုံစမ်းနေတုန်းပဲ”ဟု ၎င်းက ဆက်ပြောသည်။
ယခုရက်ပိုင်းတွင် ခရမ်း၊သုံးခွ၊မြောက်ဒဂုံ နှင့် သာကေတ တို့တွင် စစ်ကောင်စီလက်အောက်ခံရဲများ၊ သတင်းပေးများ မကြာခဏပစ်ခတ်ရှင်းလင်းခံနေရသည်။
ထို့အပြင် မတ် ၂၉ ရက်က Express ကားဖြင့် PDF များ ဝင်ရောက်လာသည်ဆိုသည့် ဗီဒီရိုဖိုင်သည် လူမှုကွန်ယက်စာမျက်နှာတွင် ပျံ့နှံခဲ့ပြီးနောက် စစ်ကောင်စီတပ်သားများသည် ရန်ကုန်တိုင်းအတွင်း အင်အားအများအပြားဖြင့် စစ်ဆေးမှုများပိုမိုပြုလုပ်နေသည်။
အမှန်မှာအဆိုပါ ဗီဒီရိုဖိုင်သည် ကရင်ပြည်နယ် ကျုံဒိုးမြို့တွင် စစ်ကောင်စီရဲစခန်းနှင့် စစ်တပ်တပ်စွဲနေသောနေရာများကို တိုက်ခိုက်ခဲ့သော Lion Battalion Commando ဗျူဟာစစ်ကြောင်းမှရဲဘော်များ Expressကား အသုံးပြုပြန်ကြခြင်းဖြစ်သည်။