စစ်ကိုင်းတိုင်း ပုလဲမြို့နယ်တွင် ယမန်နေ့ကဖြစ်ပွားသည့်တိုက်ပွဲအတွင်း စစ်ကောင်စီတပ်ဖွဲ့ဝင် လေးဦး ထပ်မံသေဆုံးကြောင်း ပြည်သူ့ကာကွယ်ရေမဟာမိတ်တပ်ဖွဲ့ထံမှ သတင်းရရှိသည်။
ကျေးရွာအချို့ကို စစ်ကြောင်းထိုးမွှေနှောက်နေသည့် စစ်ကောင်စီတပ်နှင့် ပျူစောထီးပူးပေါင်းအဖွဲ့အား ပြည်သူ့ကာကွယ်ရေးမဟာမိတ်တပ်များက ဧပြီလ ၃ရက် နံနက် ၁၁ နာရီ ၄၅မိနစ်ခန့်တွင် တိုက်ခိုက်ခဲ့ခြင်းဖြစ်သည်။
” ဒီနေ့က အင်မထီးနဲ့ မင်းတိုင်ပင်ကြားမှာ စောင့် ပစ်တာ။ ပျူနဲ့စစ်ကောင်စီက မင်းတိုင်ပင်ရွာကို ဝင်မွှေပြီး လှည်းတွေနဲ့ ပြန်ထွက်သွားချိန် နောက်မှာကျန်ခဲ့တဲ့ နောက်ချန်အဖွဲ့ကို ဝိုင်းတိုက်တာ။ မီတာ ၁၀၀လောက်ကနေ ကပ်ပစ်ကြတာ။ လေးယောက်သေတယ်”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
အဆိုပါ တိုက်ခိုက်မှုကို ယင်းမာပင်ခရိုင်တပ်ရင်း (၈)၊ တပ်ရင်း(၆)၊ တပ်ရင်း(၁၂)၊ ABSDF နှင့်PRA အပြင် ဒေသခံပြည်သူ့ကာကွယ်တပ်များ ပူးပေါင်းတိုက်ခိုက်ခြင်းဟု သတင်းရရှိသည်။
Public Service Announcement
ပစ်ခတ်နေချိန် စစ်ကောင်စီစစ်ကြောင်း ထပ်မံစစ်ကူလိုက်လာကြောင်းသတင်းရ၍ လက်နက်မယူနိုင်ခဲ့ဘဲ ဆုတ်ခွာခဲ့ရသည်ဟု ဆိုသည်။
” အလောင်းမရဘူး။လက်နက်မရဘူး။ နောက်ကနေ တရစပ်လိုက်ပစ်ဖို့ ဆုတ်ခွာခဲ့တာ”ဟု ပြည်သူ့ကာကွယ်ရေးရဲဘော်တစ်ဦးကပြောသည်။
ပုလဲမြို့နယ်မှ နာမည်ကြီး ပျုရွာဖြစ်သော ဇီးဖြူကုန်းနှင့် အင်မထီးကျေးရွာတွင် ရိက္ခာပြတ်နေ၍ အနီးပတ်ဝန်းကျင်ရှိကျေးရွာများအား မတ်လ ၃၀ရက်မှစကာ စစ်ကောင်စီတပ်နှင့် ပျူစောထီးပူးပေါင်းအဖွဲ့က ဝင်ရောက်မွှေနှောက်နေခြင်းဖြစ်သည်။ အဆိုပါ စစ်ကြောင်းကို ပြည်သူ့ကာကွယ်ရေးတပ်ဖွဲ့များက တိုက်ခိုက်နေခြင်းဖြစ်သည်။
ဧပြီ ၂ရက်က နှောကန်ကျေးရွာအနီး တိုက်ခိုက်မှုတွင် စစ်ကောင်စီတပ်ဘက်မှ ဗိုလ်မှူးမင်းမြတ်သူနှင့် တပ်ဖွဲ့ဝင်တစ်ဦးကို ပြည်သူ့ကာကွယ်ရေးရဲဘော်များက ရှင်းလင်းနိုင်ခဲ့ကြောင်း သိရသည်။
ထို့အပြင် G3 သေနတ် နှစ်လက်၊ ဖုန်း သုံးလုံးနှင့်အိုင်ကွန်တစ်လုံးကို ပြည်သူ့ကာကွယ်ရေးရဲဘော်များက သိမ်းယူခဲ့သည်ဟု ပုလဲမြို့နယ်ပြည်သူ့အုပ်ချုပ်ရေးအဖွဲ့ခေါင်းဆောင် ဦးဇော်ထက်က ပြောသည်။
ထို့ကြောင့် ပုလဲမြို့နယ်တွင် နှစ်ရက်ဆက်တိုက်ပွဲဖြစ်ခဲ့ပြီး စစ်ကောင်စီတပ်က ခြောက်ဦးသေဆုံးခဲ့သည်။
စစ်ကောင်စီခြေကုတ်ယူထားသော ဇီးဖြူကုန်းနှင့် အင်မထီးရွာကို ပြည်သူ့ကာကွယ်ရေးတပ်ဖွဲ့များက စောင့်ကြည့်ပိတ်ဆို့ထား၍ စစ်ကောင်စီက ယခုကဲ့သို့ အင်အားအများအပြားသုံးကာ ရိက္ခာရှာဖွေနေခြင်းဟု ပုလဲဒေသခံများက ပြောသည်။
ပြီးခဲ့သည့် မတ်လ ၂၆ရက်က အင်မထီးပျုရွာမှ ထွက်လာသော စစ်ကောင်စီတပ်နှင့် ပျူစောထီးပူးပေါင်းအဖွဲ့ကို ပြည်သူ့ကာကွယ်ရေးတပ်ဖွဲ့များက မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင်တစ်ဦးနှင့် ပျူစောထီးနှစ်ဦး သေဆုံးခဲ့သည်။
