ကချင်ပြည်နယ် ရွှေကူမြို့နယ်တွင် အာဏာသိမ်းစစ်ကောင်စီတပ်က လေကြောင်း တိုက်ခိုက်ခဲ့ရာ စီသာတိုက်နယ်ဆေးရုံ ထိခိုက်ပျက်စီးခဲ့ကြောင်း ရွှေကူပြည်သူ့ကာကွယ်ရေးတပ်(PDF)က ယနေ့တွင် ဓာတ်ပုံမှတ်တမ်းများနှင့်အတူ ထုတ်ပြန်ခဲ့သည်။
တိုက်ပွဲအခြေအနေအသေးစိတ်ကို ရွှေကူ PDF ထံသို့ ဆက်သွယ်မေးမြန်းထားဆဲဖြစ်ပြီး အဆက် အသွယ်မရသေးပေ။
စစ်ကောင်စီတပ် စစ်ကြောင်းထိုးလှုပ်ရှားနေ၍ တိုက်ပွဲများ ဖြစ်ပွားနေသည့် ရွှေကူမြို့နယ်တွင် စစ်ကောင်စီက လေကြောင်း တိုက်ခိုက်မှု အကြိမ်ကြိမ်ပြုလုပ်ခဲ့ခြင်းဖြစ်သည်။ ဧပြီ ၅ရက်တွင် ရွေကူနယ် စီသာကျေးရွာကို လေကြောင်းမှ ဗုံးကြဲတိုက်ခိုက်ခဲ့ရာ နေအိမ်များစွာ မီးလောင်ပျက်စီးခဲ့ကြောင်း ဒေသခံက ပြောသည်။
“အကုန်ပြာဖြစ်ပြီ စီသာရွာက ။ မီးလောင်တိုက်သွင်းခံရသလိုပေါ့”ဟု စစ်ဘေးရှောင်နေရသည့် ဒေသခံက ဧပြီ ၅ရက်တွင် ပြောကြားထားသည်။
Public Service Announcement
စစ်ကောင်စီတပ်သည် မတ်လ ၂၃ရက်ကစပြီး စစ်ကြောင်းထိုးလာ၍ ဒေသခံ PDFနှင့် ကချင်လွတ်လပ်ရေးတပ်မတော်(KIA) ပူးပေါင်းတပ်က ခုခံတိုက်ခိုက်လျက်ရှိရာ စစ်ကောင်စီတပ်က အထိနာလျက်ရှိကြောင်း ဒေသခံ အချို့က ယခင်ပြောကြားထားသည်။ ထို့ကြောင့် မတ်လ ၂၃ရက်မှ ယခုအချိန်ထိ ရွှေကူနယ်ကို လေကြောင်း တိုက်ခိုက်မှု ၃ကြိမ်ထက်မနည်း ပြုလုပ်ခဲ့ခြင်းဖြစ်သည်။
အဆိုပါဒေသသည် ကချင်လွတ်လပ်ရေးတပ်မတော်(KIA) တပ်ရင်း(၁၂)နယ်မြေဖြစ်သည်။ တိုက်ပွဲသတင်းနှင့်ပတ်သက်ပြီး မေးမြန်းရန် KIA သတင်းနှင့်ပြန်ကြားရေးဌာနတာဝန်ခံဗိုလ်မှူးကြီးနော်ဘူထံသို့ ဆက်သွယ်ရာ အဆက်အသွယ်မရသေးပေ။
