▪︎စစ်သားအလောင်းများကိုလည်းတာယာပုံ၍မီးရှို့ခဲ့ပြီစစ်တပ်၏ခဲယမ်းအချို့သိမ်းဆည်းရရှိ
စစ်ကောင်စီတပ် စစ်ကြောင်းထိုးဝင်ရောက်ခဲ့သည့် ကလေးမြို့နယ်မြောက်ပိုင်းရှိ ပျဉ်တောဦးရွာတွင်စစ်တပ်ဆုတ်ခွာသွားပြီးနောက် ဒေသခံကာကွယ်ရေးတပ်များကရှင်းလင်းရေးပြုလုပ်ရာ စစ်တပ်ကသတ်ခဲ့သော ရုပ်အလောင်းသုံးလောင်းတွေ့ခဲ့ရကြောင်း အထက်ချင်းတွင်း CNO/CNDFတာဝန်ခံကပြောသည်။
စစ်တပ်၊ပျူစောထီးပူးစစ်ကြောင်းနှင့် ဒေသခံကာကွယ်ရေးတပ်တို့ကြားမတ်လ ၃၀ရက်မှ ဧပြီ ၅ရက်အထိတိုက်ပွဲများဆက်တိုက်ဖြစ်ပွားခဲ့သည်။ ဧပြီ ၆ရက်တွင် စစ်ကောင်စီတပ်များ ပြန်လည်ဆုတ်ခွာသဖြင့်တိုက်ပွဲဖြစ်ပွားခဲ့ခြင်းမရှိကြောင်း ကာကွယ်ရေးတပ်ဖွဲ့ဝင်များထံမှသိရသည်။စစ်တပ်ကဝင်ရောက်ခဲ့သည့် ပျဉ်းတော်ဦးရွာကို ယနေ့(ဧပြီ ၆ ရက်) မနက်က ဒေသခံကာကွယ်ရေးတပ်များကနယ်မြေရှင်းလင်းရေးဝင်ရောက်ရာတွင် ရုပ်အလောင်း ၃ လောင်းကိုတွေ့ရှိခဲ့ခြင်းဖြစ်သည်။
“နယ်မြေရှင်းလင်းရေးလုပ်တာ ပျဉ်းတောဦးမှ အလောင်း ၃လောင်းတွေ့တယ်။ PDFတစ်လောင်းရယ်၊ဘယ်သူဘယ်ဝါမှန်းမသိတာရယ်”ဟု အထက်ပါတာဝန်ခံကပြောသည်။
ရုပ်အလောင်းများသည် ညှင်းပန်းနှိမ့်စက်ထား၍ မည်သူမည်ဝါခွဲခြား၍ မရသေးကြောင်း ကာကွယ်ရေးတပ်ဖွဲ့ဝင်တစ်ဦးကလည်းပြောသည်။
Public Service Announcement
ချင်းစုရွာထိပ်တွင်မူ စစ်ကောင်စီတပ်သားများ၏ ရုပ်အလောင်းများကိုတာယာများဖြင့်ပုံ၍ မီးရှို့ထားခဲ့သည်ကို တွေ့ရှိရသည်ဟုလည်း အထက်ချင်းတွင်း CNO/CNDFတာဝန်ခံကဆက်ပြောသည်။ ထိုအပြင် စစ်ကောင်စီတပ်ကျန်ခဲ့သည့် ၆၀ မမ ဗုံးသီးများကိုလည်း သိမ်းဆည်းရမိသည်ဟု ၎င်းကဆိုသည်။
“အိမ်တွေမှာလဲသူတို့ဖောက်ထားတာ အများကြီးဘဲ။ နောက်ပြီး သူတို့တွေ ဘုရားကျောင်းကို ဖောက်ပြီးဝင်တယ်၊ သွေးတွေကို သုတ်ထားတဲ့အဝတ်စုတ်တွေကိုမီးရှို့ကျတယ်။ ဘုရားကျောင်းကို ဆေးခန်းလုပ်ထားကြတယ်။” ဟုအဆိုပါတာဝန်ခံကပြောသည်။
စစ်ကောင်စီတပ်သည် ဒေသခံကာကွယ်ရေးတပ်များကို ထိုးစစ်ဆင်ရန် ဧပြီ ၅ ရက်က ချင်းစုရွာသို့အင်အား ၁၀၀ခန့် ဖြင့် ရောက်ရှိခဲ့သည်။
ကလေးမြို့မြောက်ပိုင်းတွင် စစ်ကောင်စီတပ်နှင့် ဒေသခံကာကွယ်ရေးတပ်များကြား မတ် ၃၀ ရက်မှ ဧပြီ ၅ ရက်အထိ တပတ်ကျော်ကြာတိုက်ပွဲပြင်းထန်ခဲ့သည်။ စစ်ကောင်စီတပ်က လေကြောင်းတိုက်ခိုက်မှုအလွန်အကျွံအသုံးပြုနေသော်လည်း ဒေသခံကာကွယ်ရေးတပ်များထိခိုက်မှု အနည်းငယ်သာရှိပြီး ဒေသခံကာကွယ်ရေးတပ်များ၏ တိုက်ခိုက်မှုကြောင့် အနည်းဆုံး စစ်ကောင်စီတပ်သား ၂၅ ဦးကျော်သေဆုံးခဲ့သည်ဟု ဒေသခံကာကွယ်ရေးတပ်ဖွဲ့ဝင်များကပြောသည်။
စစ်ကောင်စီတပ်၏ လေကြောင်းထိုးစစ်ကြောင့် ကလေးမြို့မြောက်ပိုင်းရှိကျေးရွာ၂၀ကျော်မှ ပြည်သူသုံးသောင်းကျော်မှ နေရပ်စွန့်ခွာထွက်ပြေးနေရသည်။
