▪︎စစ်ကောင်စီတပ်က နေအိမ်များဖောက်ထွင်းပြီး လူမျိုးရေးမုန်းတီးစေမည့် စာများရေးသားခဲ့
စစ်ကိုင်းတိုင်း ကလေးမြို့မြောက်ပိုင်းတွင်ဖြစ်ပွားခဲ့သည့် တစ်ပတ်ကြာတိုက်ပွဲတွင် စစ်ကောင်စီက လေကြောင်းမှ တိုက်ခိုက်ခဲ့သော်လည်း ၂၅ ဦးသေဆုံးခဲ့ကြောင်း ချင်းအမျိုးသားအဖွဲ့ချုပ် – CNO/CNDF(အထက်ချင်းတွင်းဒေသ)က သတင်းထုတ်ပြန်သည်။
ကလေးမြို့မြောက်ပိုင်းတွင် အကြမ်းဖက်စစ်ကောင်စီတပ်နှင့် ဒေသခံကာကွယ်ရေးတပ်ဖွဲ့(၁၁)ဖွဲ့ တို့ကြား မတ်လ ၃၀ ရက်မှ ဧပြီ ၇ရက်အထိ တစ်ပတ်ကြာတိုက်ပွဲဖြစ်ပွားခဲ့ခြင်းဖြစ်သည်။
အဆိုပါ တိုက်ပွဲတွင် စစ်ကောင်စီတပ်က ဂျက်ဖိုက်တာ တစ်စီးနှင့် ရဟတ်ယာဉ် သုံးစီးတို့ဖြင့် လေကြောင်းတိုက်ခိုက်မှု သုံးရက်ဆက်ပြုလုပ်ခဲ့သည်။
“ဧပြီ ၆ ရက်နေ့က မနက်ကစပြီး စစ်ကောင်စီတပ်ကပြန်ဆုတ်သွားလို့ ကာကွယ်ရေးတပ်တွေ နယ်မြေရှင်းလင်းရေးလုပ်ခဲ့ရပါတယ်”ဟု အထက်ချင်းတွင်း CNO/CNDFတာဝန်ခံက ပြောသည်။
Public Service Announcement
စစ်ကောင်စီတပ်နှင့်ကာကွယ်ရေးတပ်တို့ကြား မတ်လ ၃၀ ရက်နံနက်ပိုင်းတွင် ချမ်းသာကြီးရွာနှင့် လက်ပံချောင်းရွာကြားတွင် တိုက်ပွဲစတင်ဖြစ်ပွားခဲ့ခြင်းဖြစ်သည်။
မတ်လ ၃၁ ရက်တွင် နံနက် ၈ နာရီက ပျဉ်းတောဦးရွာ အရှေ့ဘက်သင်္ချိုင်းကုန်းတွင် တိုက်ပွဲပြင်းထန်ခဲ့ပြီးစစ်ကောင်စီ ၁၀ ဦးသေဆုံးကာ ၂၀ ဦးခန့်ဒဏ်ရာရရှိသည်။ ထိုတိုက်ပွဲတွင် စစ်ကောင်စီတပ်က ကလေးမြို့မှ လက်နက်ကြီးဖြင့် ပစ်ကူခဲ့သည်။
ညနေပိုင်းတွင် စစ်ကောင်စီတပ်က ခြေလျင်၊ လေကြောင်းနှင့် လက်နက်ကြီး အသုံးပြုပြီးတိုက်ခိုက်ခဲ့သော်လည်း အနည်းဆုံး ၇ ဦးထပ်မံသေဆုံးခဲ့သည်။
ဧပြီ ၂ ရက်တွင် နံနက် ၈နာရီတွင်လည်း နန်းစောင်းပုရွာမှ နတ်တံခါးချောင်းရွာအနောက်ဘက်တွင် တိုက်ပွဲထပ်မံဖြစ်ပွားခဲ့ပြီး စစ်ကောင်စီတပ်က Mi-35 တိုက်ခိုက်ရေး ရဟတ်ယာဉ်အသုံးပြုခဲ့သည့်အပြင် ကလေးမြို့မှ လက်နက်ကြီးဖြင့် ပစ်ကူပေးခဲ့သည်။
စစ်ကောင်စီတပ်က ဧပြီ ၃ရက်က ပျဉ်တော်ဦးရွာတွင် ဂျက်လေယာဉ် တစ်စီး၊ ရဟတ်ယာဉ် သုံးစီးအသုံးပြုခဲ့သော်လည်း ယင်းနေ့တိုက်ပွဲတွင် နှစ်ပွင့်ဗိုလ်အပါအဝင် ၈ ဦးသေဆုံးကာ ၁၉ ဦး ဒဏ်ရာရရှိခဲ့သည်။
ဧပြီ ၅ ရက်ကတွင်လည်း စစ်ကောင်စီတပ်နှင့် ကာကွယ်ရေးတပ်များ ချင်းစုရွာထိပ်တွင် တိုက်ပွဲဖြစ်ပွားခဲ့ပြီး စစ်ကောင်စီတပ်၏ (၄၀)မမ ပေါက်ကွဲမှုကြောင့် ကာကွယ်ရေးရဲဘော် သုံးဦး မစိုးရိမ်ရ ဒဏ်ရာရရှိခဲ့သည်။
ဧပြီ ၆ ရက်တွင် အာဏာသိမ်းစစ်ကောင်စီတပ်များ ပြန်လည်ဆုတ်ခွာသွားခြင်းကြောင့် ကာကွယ်ရေးတပ်များက နယ်မြေရှင်းလင်းရေးဆောင်ရွက်ရာတွင် ကာကွယ်ရေးရဲဘော်တစ်ဦးနှင့် ပြည်သူနှစ်ဦး၏ ရုပ်လောင်းများကိုတွေ့ရှိခဲ့ရသည်။
ထို့အပြင် စစ်ကောင်စီတပ်သည် ကျေးရွာများအတွင်းနေအိမ်များကို ဖောက်ထွင်းပြီး အဖိုးတန်ပစ္စည်းများခိုးယူပြီး လူမျိုးရေးမုန်းတီးစေမည့် စာသားများရေးသားခဲ့သေးသည်။
“အာဏာရှင်စနစ်ကို တော်လှန်တာပါ ငါတို့ရသင့်တဲ့ အခွင့်အရေးအတွက် တိုက်ပွဲဝင်ရတာပါ”ဟု CNDFတပ်မမှူးက ပြောသည်။
ကလေးမြို့မြောက်ပိုင်းတိုက်ပွဲကို ပြည်သူ့ကာကွယ်ရေးပူးပေါင်းတပ်များဖြစ်သည့် CNDF ၊ CDF-Tonzang ၊ HNB ၊ CR ၊ PDA ၊ PDF-Zoland၊ Cangelzawl-ပကဖ၊ RKDF ၊ CDF-KKG ၊ ပျဉ်းတောဦး-ပကဖ နှင့် CDM Siyin ပူးပေါင်းတိုက်ခဲ့ခြင်းဖြစ်သည်။
ယင်းတိုက်ပွဲကြောင့် ကျေးရွာ၁၇ ရွာမှ ဒေသခံပြည်သူ သုံးသောင်းကျော် ထွက်ပြေးတိမ်းရှောင်ခဲ့ရသည်။
