▪︎ပြည်သူ ၇ဦး ဒဏ်ရာရဟု မင်းတပ် CDF အသိပေး
ချင်းပြည်နယ် မင်းတပ်မြို့နယ် တိုက်နယ်(၁) ပန်းပါရွာကို စစ်ကောင်စီတပ်က ဧပြီ ၁၆ရက် ညနေပိုင်းတွင် တိုက်လေယာဉ်ဖြင့် ဗုံးကြဲတိုက်ခိုက်ခဲ့ရာ အရပ်သား ပြည်သူ ၂ဦး သေဆုံးပြီး ၇ဦး ဒဏ်ရာရခဲ့ကြောင်း မင်းတပ် ချင်းကာကွယ်ရေးတပ်(CDF)က သတင်းထုတ်ပြန်သည်။
စစ်ကောင်စီတပ်သည် ပန်းပါရွာကို ဧပြီ ၁၆ရက် ညနေပိုင်း၌ တိုက်လေယာဉ်ဖြင့် ၆ ကြိမ် ဗုံးကြဲတိုက်ခိုက်ခဲ့ရာ ဗုံး ၁၇ လုံး ကြဲချတိုက်ခိုက်ခဲ့ကြောင်းသိရသည်။
အဆိုပါ တိုက်ခိုက်မှုကြောင့် အသက် ၄နှစ်အရွယ် ကလေးငယ်တစ်ဦး၊ အသက် (၇၀) အရွယ်အမျိုးသမီး တစ်ဦး သေဆုံးခဲ့ပြီး အမျိုးသမီး ၅ဦး အပါအဝင် ၇ဦး ဒဏ်ရာရခဲ့ကြောင်းဖော်ပြထားသည်။
ပြည်သူလူထုနေအိမ် ၂လုံး မီးလောင်ပျက်စီးသွားပြီး လူနေအိမ် ၉ လုံးပျက်စီးခဲ့ကြောင်းလည်းသိရသည်။
Public Service Announcement
လေကြောင်း တိုက်ခိုက်မှုအပြင် မင်းတပ်မြို့အခြေစိုက် ခလရ (၂၇၄) အကြမ်းဖက်စစ်ကောင်စီ တပ်ကလည်း လက်နက်ကြီးများဖြင့် ကျေးရွာများသို့ ရမ်းသန်းပစ်ခတ်ခဲ့သည်ဟု ထုတ်ပြန်သည်။
စစ်ကောင်စီတပ်သည် မင်းတပ်မြို့နယ်အတွင်း လေကြောင်း တိုက်ခိုက်မှု၊ လက်နက်ကြီး ရမ်းသန်း ပစ်ခတ်မှုများ မကြာခဏ ပြုလုပ်နေသည်။
