လက်နက်ခဲယမ်းများစွာ KNDF သိမ်းဆည်းရမိဟု ပြော
ရှမ်း – ကယား(ကရင်နီ)ဒေသအစပ် ဖယ်ခုံမြို့နယ် တိုက်ပွဲတွင် စစ်ကောင်စီတပ်သား ၂၀ထက်မနည်းသေဆုံးပြီး လက်နက်ခဲယမ်းများစွာ ကရင်နီအမျိုးသားများကာကွယ်ရေးတပ်(KNDF)က သိမ်းဆည်းရမိကြောင်း ဒေသခံသတင်းရင်းမြစ်များက လူထုနွေဦးသို့ ပြောသည်။
ယမန်နေ့(ဧပြီ ၂၄ ရက်)က ဖယ်ခုံ – ပင်လောင်းကြားရှိ မြောက်စလုံးရွာတွင် တိုက်ပွဲပြင်းထန်စွာ ဖြစ်ပွားခဲ့ခြင်းဟု ဆိုသည်။
“မြောက်စလုံးမှာ တပ်စွဲထားတဲ့ စကစကို ဝင်တိုက်တာ။(၆၀) မမ ရော၊ RPGရော စက်လက်ငယ် တွေအပါ ၁၀လက်ကျော်လောက်ရတယ်”ဟု ဖယ်ခုံမြို့စစ်ရေး သတင်းရင်းမြစ်က ရှင်းပြသည်။
သို့သော် တိုက်ပွဲအတွင်း ကာကွယ်ရေးတပ်ဖွဲ့ဝင် ရဲဘော်အချို့ ထိခိုက်ကျဆုံးမှုအချို့ရှိခဲ့သည်။
Public Service Announcement
“တိုက်ပွဲကတော့ အခြေအနေကောင်းတယ်။လော လောဆယ် ကျွန်တော်တို့ဘက်က တရားဝင် မထုတ်ပြန်သေးဘူး။နယ်မြေရှင်းလင်းရေး ဆက်လုပ်နေတယ်”ဟု KNDF တာဝန်ရှိသူက လူထုနွေဦးသို့ ပြောသည်။
ယခုလ ၁၄ ရက်မှ ၁၉ရက်အထိ ကရင်နီပြည်နယ်၊ ဒီးမော့ဆိုနှင့် မိုးဗြဲမြို့ တိုက်ပွဲများအတွင်းစစ်ကောင်စီတပ်သား ၅၀ကျော် သေဆုံးပြီး တစ်ဦးအရှင်ဖမ်းမိကာ လက်နက် ၂၀ကျော် KNDF က သိမ်းဆည်းရမိထားသည်။
ဖေဖော်ဝါရီလကုန်ပိုင်းကစ၍ ကရင်နီပြည်နယ်၊ လွိုင်ကော်မြို့နယ်၊ ဒီးမော့ဆိုမြို့ နယ်၊ ဘောလခဲမြို့နယ် နှင့် ဖားဆောင်း မြို့နယ် နှင့် ရှမ်းပြည်နယ်တောင်ပိုင်းရှိ ပင်လောင်း၊ ဖယ်ခုံမြို့နယ် များသို့ စစ်ကောင်စီတပ်မှ စစ်မျက်နှာပြင်(၅)ခု ဖွင့်ကာ ထိုးစစ်ဆင်တိုက်ခိုက်ခဲ့သည်။
