မြင်းမူနယ်တွင် စစ်ကောင်စီတပ် မီးရှို့ဖျက်ဆီးရာ နေအိမ် ၆၀၀ကျော်မီးလောင်ပျက်စီးပြီး ပြည်သူနှစ်ဦး မီးလောင်သေဆုံး

ပြည်သူများ မီးငြှိမ်းသတ်စဉ် စစ်ကောင်စီတပ်က လက်နက်ကြီးဖြင့်ပစ်ခတ်

စစ်ကိုင်းတိုင်း၊ မြင်းမူမြို့နယ်ရှိ လက်ထုတ္တောကျေးရွာကို စစ်ကောင်စီတပ်က မီးရှို့ဖျက်ဆီးခဲ့ရာ နေအိမ် ၆၀၀ ကျော် မီးလောင်ပျက်စီးဆုံးရှုံးခဲ့ပြီး ပြည်သူနှစ်ဦး မီးလောင်သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။

ယနေ့ (မေလ ၆ ရက်) နံနက် ၆နာရီခန့်က ချောင်းဦးမြို့နယ်၊ နတ်ရေကန်ကျေးရွာမှထွက်လာသည့်စစ်ကောင်စီတပ် စစ်ကြောင်းသည် မြင်းမူမြို့နယ် လက်ထုတ္တောကျေးရွာကို နံနက်၇နာရီခန့်တွင် စတင်ဝင်ရောက်ခဲ့သည်။

ထို့နောက် နံနက် ၈ နာရီခွဲခန့်တွင် ရွာမြောက်ပိုင်းမှ စတင်မီးရှို့ကာ ရွာပတ်လည်စည်းရိုးများကိုလည်း မီးရှိုခဲ့သည်။ အိမ်ခြေ ၇၀၀ခန့်ရှိသည့်အနက် ၆၀၀ ကျော် မီးလောင်ဆုံးရှုံးခဲ့ကြောင်း၊ ထို့အပြင် ဒေသခံ အမျိုးသား နှစ်ဦး မီးလောင်သေဆုံးခဲ့ပြီးနှစ်ဦးဒဏ်ရာရရှိခဲ့ကြောင်း မြင်းမူမြို့နယ်သတင်းမှန်ပြန်ကြားရေးအဖွဲ့က ပြောသည်။

“ဘုန်းကြီးကျောင်းအရှေ့ခြမ်းဘက်ကအိမ်တွေအကုန်ပါသွားပြီ။ ရွာရဲ့ အိမ်ခြေတော်တော်များများ ကုန်သွားပြီ။ သေးသေးတခြမ်းပဲရှိတော့တာပါ။”ဟု ဒေသခံတစ်ဦးက ပြောသည်။

Public Service Announcement

ကျေးရွာရှိ နွား၊ဝက်များလည်းအများအပြားသေဆုံးခဲ့ကြောင်း ဒေသခံများက ပြောသည်။

စစ်ကောင်စီတပ်သည် မီးရှို့ပြီးနောက် နံနက်၁၀ နာရီခန့်တွင် နတ်ရေကန်ကျေးရွာဘက် ပြန်သွားသည်။

ထို့နောက် နံနက် ၁၁ နာရီခွဲခန့်တွင် ဒေသခံများက ကျေးရွာအား မီးဝင်ရောက်ငြှိမ်းသတ်ရာ စစ်ကောင်စီတပ်က ရေပိုးစားကန်ကွေ့မှ လက်နက်ကြီးများဖြင့် ပစ်ခတ်ခဲ့ကြောင်း မြင်းမူမြို့နယ်သတင်းမှန်ပြန်ကြားရေးအဖွဲ့က ပြောသည်။

ယမန်နေ့ (မေလ ၅ရက်)နံနက်ပိုင်းက မုံရွာ-မန္တလေးလမ်းတစ်လျှောက် မိုင်းရှာထွက်လာသော အင်အား (၃၀)ပါ စစ်ကောင်စီတပ်အား မြင်းမူမြို့နယ်၊ ဘိုးမင်းကြီးကင်းနှင့် ဂွေးပင်တောကြားရှိ မိုင်းကွင်းပေါ် အရောက် ပဒေသာမိုင်း၈ လုံးတွဲဖြင့် မိုင်းဆွဲတိုက်ခိုက်ခဲ့ရာ စစ်အုပ်စုအထိအခိုက်များခဲ့ကြောင်း Black Eagle Defence Force-MMUအဖွဲ့က ထုတ်ပြန်ထားသည်။