မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသ၌ စစ်ကောင်စီတပ်က ကျေးလက်ဆေးပေးခန်းအပါအဝင် ယနေ့တစ်ရက်တည်း ကျေးရွာ ၁၃ရွာထက်မနည်း မီးရှို့ဖျက်ဆီးခဲ့ကြောင်း ဒေသခံများက ပြောသည်။
ယမန်နေ့က ရေစကြိုမြို့နယ် ရေလယ်ကျွန်းဒေသသို့ ရောက်ရှိပြီး ကျေးရွာနှစ်ရွာအား မီးရှို့ဖျက်ဆီးခဲ့သော စစ်ကောင်စီတပ်သည် ယနေ့(မေလ၂၇ ရက်)တွင် ဆင်တဲကျေးရွာမှ နေအိမ် ၂၅လုံးခန့်၊ ကြွယ်ကုန်းရွာမှ နေအိမ် ၈လုံး၊ ဆည်သည့်မြင်ရွာမှ နေအိမ် ၁၈လုံးခန့်၊ မြေစွန်းရွာမှ ၁၅လုံး၊ နွယ်နီကျေးရွာမှ လူနေအိမ် ၂၆လုံးနှင့် ကျေးလက်ဆေးပေးခန်း တစ်ခု၊မိဖုရားကျေးရွာမှ နေအိမ် လေးလုံးနှင့် ပဲမှော်စင်တစ်လုံးတို့ကို မီးရှို့ဖျက်ဆီးခဲ့သည်။
ထို့နောက် ပေါက်အူရွာ၊ မြေတော်ရွာ၊ ပိစပ်ကုန်းရွာ၊ ညောင်မွှေးပင်ရွာနှင့် ကိုင်းရွာတို့ကိုလည်း မီးရှို့ဖျက်ဆီးခဲ့ပြီး ရေယှားရွာနှင့် နန်းဦးရွာမှာ ရွာလုံးကျွတ်နီးပါး မီးရှို့ဖျက်ဆီးခံရကြောင်း ဒေသခံများက ပြောသည်။
မီးရှို့ခံရသည့် ကျေးရွာများတွင် စစ်ကောင်စီတပ်ရှိနေဆဲဖြစ်၍ မီးလောင်ပျက်စီးသည့် အိမ်ခြေအရေအတွက်မသိရသေးကြောင်း ရေစကြို(ပကဖ)အဖွဲ့ ပြန်ကြားရေးတာဝန်ခံက ပြောသည်။
Public Service Announcement
“အနောက်ဘက်ကမ်း သင့်သည်ရွာဘက်ကနေလည်း လက်နက်ကြီးတွေနဲ့ ရေလယ်ကျွန်းဘက်သို့ ရမ်းကားပစ်ခတ်ခဲ့သေးတယ်”ဟု ဒေသခံတစ်ဦးက ပြောသည်။
ယနေ့တွင် ရေလယ်ကျွန်းဒေသကို လက်နက်ကြီးများဖြင့် ပစ်ကူတိုက်ခိုက်နေသည့် လေးအိမ်တန်းရွာဘက်မှ စစ်ကောင်စီတပ်ကို ဒေသတွင်းပြည်သူ့ရဲဘော်များက တိုက်ခိုက်ခဲ့ကြောင်း ရေစကြို(ပကဖ)အဖွဲ့က ဆိုသည်။
ယမန်နေ့ (မေလ ၂၆ ရက်) နံနက်ပိုင်းက အင်အား ၂၀၀ကျော်ပါ စစ်ကောင်စီတပ်သည် ရေစကြိုမြို့နယ် ပေါက်တောရွာ၊ ချစ်သူရွာနှင့် မန္တလေးတိုင်း မြင်းခြံနယ်နယ်တို့မှ စစ်ကြောင်း ၃ခုဖြင့် ဝင်ရောက်ခဲ့သည်။
စစ်ကောင်စီတပ်၏ လက်နက်ကြီးများဖြင့် ပစ်ခတ်မှုကြောင့် မိဖုရားရွာနေ အသက်(၃၈)နှစ်အရွယ် ဒေါ်ခင်အေးပို သေဆုံးပြီး မဲကုန်းရွာမှ အသက်(၁၂)နှစ်အရွယ် မောင်ညီခန့်ဇင်မှာ ခြေထောက်ထိမှန် ဒဏ်ရာရရှိခဲ့ကြောင်း ရေလယ်ကျွန်းနယ်ခံများက ပြောသည်။
မွန်းလွဲပိုင်းတွင် စစ်ကောင်စီတပ်သည် လှေခုတ်ရွာနှင့် မိဖုရားကျေးရွာကို မီးရှို့ဖျက်ဆီးခဲ့သည်။
ရေစကြိုမြို့နယ်ရှိ ရေလယ်ကျွန်းဒေသသည် စစ်အာဏာရှင်ဆန့်ကျင်တော်လှန်မှုအားကောင်းရာဒေသဖြစ်ပြီး ကျေးရွာအများအပြား မီးရှို့ဖျက်ဆီးခံခဲ့ရကာ ပြည်သူအများအပြားလည်း ဖမ်းဆီးသတ်ဖြတ်ခံခဲ့ရသည်။
စစ်ကောင်စီတပ်သည် မေလ ၂၄ ရက်ကလည်း ရေစကြိုမြို့နယ်၊ ပေါက်တောကျေးရွာသို့ ဒရုန်းဖြင့်ဗုံးသီးချတိုက်ခိုက်ခဲ့၍ အမျိုးသားနှစ်ဦး ထိခိုက်ဒဏ်ရာရရှိခဲ့သေးသည်။
