ရေလယ်ကျွန်းဒေသ၌ သုံးရက်အတွင်း အသတ်ခံရသူ သုံးဦးအထိရှိလာ
ရေလယ်ကျွန်းဒေသ၌ သုံးရက်အတွင်း အသတ်ခံရသူ သုံးဦးအထိရှိလာမကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသ ရောက်ရှိနေသော စစ်ကောင်စီတပ်က ကျေးရွာ မီးလောင်မှု မီးငြှိမ်းသတ်သည့် ဒေသခံရွာသားတစ်ဦးကို သေနတ်ဖြင့် ပစ်သတ်ခဲ့ပြီး သုံးရက်အတွင်း ဒေသခံပြည်သူ သုံးဦး အသတ်ခံခဲ့ရကြောင်း ဒေသတွင်း သတင်းရင်းမြစ်များက ပြောသည်။
ယမန်နေ့ (မေလ ၂၈ ရက်) ညက ရေလယ်ကျွန်းဒေသရှိ မိဖုရားနှင့် မဲကုန်းကျေးရွာတွင် ညအိပ်တပ်စွဲသွားသော စစ်ကောင်စီတပ်သည် မဲကုန်းရွာ ဒေသခံပြည်သူအမျိုးသားတစ်ဦးကို သတ်ဖြတ် ခဲ့ပြီးနောက် ယနေ့နံနက်ပိုင်းတွင် ရုပ်အလောင်းကို တွေ့ရှိရကြောင်း ဒေသခံများက ပြောသည်။
“မဲကုန်းရွာက ပြည်သူတစ်ဦးက ရွာထဲမီးဝင်ငြှိမ်းရင်း ပစ်သတ်ခံလိုက်ရတာလို့ သိရတယ်။”ဟု ဒေသခံတစ်ဦးက ပြောသည်။
ယနေ့နံနက်ပိုင်းတွင် အဆိုပါ စစ်ကောင်စီတပ်သည် မိုးဖြူ၊ မိုးကွဲ နှင့် ချင်းယားကျေးရွာများကို ပစ်ခတ်ဝင်ရောက်နေပြီး ဝါးဘိုးရွာကို မီးရှို့ဖျက်ဆီးနေကြောင်း ဒေသခံများက ပြောသည်။
Public Service Announcement
စစ်ကောင်စီတပ်သည် မေလ ၂၆ ရက်ကစတင်ဝင်ရောက်ပြီး ယမန်နေ့ (မေလ ၂၈ ရက်)အထိ ကျေးရွာ ၁၈ ရွာထက်မနည်း မီးရှို့ဖျက်ဆီးခဲ့သည်။ထို့အပြင် စစ်ကောင်စီတပ်က ဒေသခံပြည်သူ သုံးဦးအား သတ်ဖြတ်ထားပြီး ၎င်းတို့၏ လက်နက်ကြီးထိ၍ အမျိုးသမီးတစ်ဦး သေဆုံးခဲ့ရသည်။
ထို့အပြင် စစ်ကောင်စီစစ်ကြောင်းရှိနေဆဲဖြစ်၍ မီးလောင်ပျက်စီးသည့် နေအိမ်အရေအတွက်အား မသိရသေးပေ။
စစ်ကောင်စီတပ်က စစ်ရှောင်ပြည်သူများကို လိုက်လံပစ်ခတ်ခြင်း၊ ဖမ်းဆီးခြင်း၊ သတ်ဖြတ်ခြင်းများ ပြုလုပ်နေပြီး မြစ်ကမ်းနားရှိ ဒေသခံပြည်သူများ၏ စက်လှေများ၊ မော်တော်ယာဉ်များကိုပါ မီးရှို့ဖျက်ဆီးခဲ့ကြောင်း ဒေသတွင်း Yaylalkyun News က ဖော်ပြသည်။
အဆိုပါ ကျေးရွာများမှ ဒေသခံပြည်သူများနှင့် အနီးဝန်းကျင် ရွာများမှ ပြည်သူ ၂၁,၀၀၀ ခန့်မှာ ဘေးလွတ်ရာသို့ ထွက်ပြေးတိမ်းရှောင်နေရကြောင်း သိရသည်။
ရေစကြိုမြို့နယ်ရှိ ရေလယ်ကျွန်းဒေသသည် စစ်အာဏာရှင်ဆန့်ကျင်တော်လှန်မှုအားကောင်းရာဒေသဖြစ်ပြီး ကျေးရွာအများအပြား မီးရှို့ဖျက်ဆီးခံခဲ့ရကာ ဒေသခံပြည်သူအများအပြားလည်း ဖမ်းဆီးသတ်ဖြတ်ခံခဲ့ရသည်။
