▪︎ကင်းစခန်းလေးခုတွင် သုံးခုကိုသိမ်းပိုက်ပြီးနောက်စစ်တပ်ကတိုက်လေယာဥ်ဖြင့်လာပစ်၍ကာကွယ်ရေးတပ်များပြန်ဆုတ်
ကန့်ဘလူမြို့နယ်၊ ချပ်သင်းကျေးရွာတွင် အထိုင်ချထားသည့် စစ်ကောင်စီစခန်းကင်းစခန်း လေးခုကိုယမန်နေ့(ဇွန်လ ၂ရက်)တွင် ပြည်သူ့ကာကွယ်ရေးတပ်ပေါင်းစုက တိုက်ခိုက်ခဲ့ရာ စခန်းသုံးခုကို သိမ်းယူနိုင်ခဲ့ကြောင်း တော်လှန်ရေးအင်အားစုများကပြောသည်။
ချပ်သင်းကျေးရွာရှိစစ်ကောင်စီတပ်စခန်းကင်းစခန်းလေးခုကို ကောလင်း၊ကန့်ဘလူ နှင့်ကျွန်းလှပကဖ(ပြည်သူ့ကာကွယ်ရေးတပ်ဖွဲ့) တပ်ဖွဲ့ဝင်များနှင့် မဟာမိတ်များက ဇွန်လ ၂ ရက် နံနက်မှ ညနေအထိ တိုက်ခိုက်ခဲ့ခြင်းဖြစ်သည်ဟု ကောလင်းမြို့နယ် ပကဖ တာဝန်ရှိသူတစ်ဦးကပြောသည်။
“တစ်နေကုန်အောင် တိုက်ပွဲပြင်းပြင်းထန်ထန် ဖြစ်ခဲ့တာပါ။ ကာကွယ်ရေးရဲဘော်နှစ်ဦး ကျဆုံးခဲ့ပါတယ်။ ပွိုင့် လေးခုမှာ သုံးခုအထိ သိမ်းနိုင်ခဲ့တယ်။ စစ် – တွေဘက်က အထိအခိုက်များပါတယ်။ စာရင်းတော့ မသိရပါဘူး”ဟု ကောလင်းမြို့နယ် ပကဖ တာဝန်ရှိသူက ပြောသည်။
စစ်ကောင်စီတပ်သည် ကင်စခန်းသုံးခုသိမ်းယူခံရပြီးနောက် လေကြောင်းမှ ဂျက်ဖိုက်တာဖြင့် လာရောက်တိုက်ခိုက်ခဲ့သောကြောင့် ကာကွယ်ရေးတပ်ဖွဲ့ဝင်များပြန်လည် ဆုတ်ခွာခဲ့ရသည်ဟု ၎င်းကဆက်ပြောသည်။
Public Service Announcement
အဆိုပါ တိုက်ပွဲနှင့် ပတ်သက်၍ စစ်ကောင်စီဝါဒဖြန့်သတင်းဌာနများက ထုတ်ပြန်ရာတွင် ချပ်သင်းရွာပတ်ချာလည်ကို PDF များက ပိတ်ဆို့ထား၍ အခက်တွေ့ရကြောင်း ဒေသခံများက ပြောသည်ဟု ရေးသားထားသည်။
ချပ်သင်းရွာဒေသခံတစ်ဦးအား People’s Spring က ဆက်သွယ်မေးမြန်းရာ စစ်ကောင်စီတပ်သည် ရွာထဲတွင် အရပ်သားများအား အကာအကွယ်ယူပြီး တပ်စွဲထားခြင်းဖြစ်သည်ဟုပြောသည်။
“စစ်တပ်ကရွာထဲမှာစခန်းလေးခုထိုင်ထားတယ်။ ရွာခံတွေကို ကာဗာယူထားတယ်။ အပြင်ထွက်ခွင့်ကို တော်တော်လေး တင်းကျပ်တယ်။ ရွာပြင်မှာက ကာကွယ်ရေးရဲဘော်တွေ ရှိတာဟုတ်တယ်။ ကာကွယ်ရေးရဲဘော်တွေက အရပ်သားကို ဒုက္ခမပေးဘူး”ဟု ပြောသည်။
ချပ်သင်းရွာသည် ကျွန်းလှ၊ ကန့်ဘလူနှင့် ကောလင်းမြို့တို့ ထိစပ်နေသော ချပ်သင်းဘေးမဲ့တော တည်ရှိသည့် ရွာဖြစ်သည်။
