စစ်ကိုင်းတိုင်း၊ စစ်ကိုင်းမြို့နယ်၊ ရွှေဘို – မန္တလေးလမ်းမကြီးပေါ်ရှိ ဆားတောင်မြို့တွင်းကို Zero ပြောက်ကျားတပ်ဖွဲ့ခေါင်းဆောင်နှင့်အဖွဲ့သားများက လက်နက်များဖြင့် လှည့်လည်ခဲ့ကြကြောင်း အဆိုပါအဖွဲ့ခေါင်းဆောင် ကိုသက်ကြီးက ပြောသည်။
ပြီးခဲ့သည့် ဇွန်လ ၆ ရက်က ဆားတောင်မြို့ပေါ်သို့ Zero ပြောက်ကျားတပ်ဖွဲ့ခေါင်းဆောင်ကိုသက်ကြီးနှင့် ရဲဘော်များ လက်နက်များကိုင်ဆောင်ကာ လှည့်လည်ပြီး ပြည်သူများအား နူတ်ဆက်ကာ စျေးဝယ်ခဲ့ကြောင်း ခေါင်းဆောင် ကိုသက်ကြီးက ပြောသည်။
ပြည်သူများသည် အာဏာသိမ်းပြီးကတည်းက နှစ်နှစ်ကျော်ကာလအတွင်း စစ်ကောင်စီတပ်အား ကြောက်ရွံစိုးရိမ်နေရ၍ အားပေးလိုသောကြောင့် မြို့ပေါ်တက်ရောက်ပြခဲ့ခြင်းဖြစ်ကြောင်း ၎င်းက ပြောသည်။
“ ကျွန်တော်တို့ဘယ်လောက်အထိလုပ်နိုင်ခဲ့ပြီ၊ ဘယ်လောက်အထိလုပ်လာခဲ့ပြီ၊ ဘယ်လောက်အထိဆက်လုပ်သွားမယ်ဆိုတာကို ပြည်သူတွေကို ပြချင်လို့ မြို့ပေါ်ကို တက်ရောက်တာတွေ စျေးဝယ်တာတွေ လုပ်ခဲ့ပါတယ်။” ဟု ကိုသက်ကြီးက ဆိုသည်။
Public Service Announcement
ပြည်သူများ၏ တုံ့ပြန်ချက်မှာ အားရစရာကောင်းပြီး ဆားတောင်မြို့ပေါ်ရှိ စစ်ကောင်စီတပ်မှာ ကတုပ်ကျင်းနှင့် ဘန်ကာများအတွင်းသို့ ဝင်သွားခဲ့ကြောင်း၊ နောက်တစ်နေ့အထိ မြို့တွင်းသို့ထွက်လာခြင်းမရှိကြောင်း Zero ပြောက်ကျားတပ်ဖွဲ့ခေါင်းဆောင်ကိုသက်ကြီးက ပြောသည်။
“ ဆားတောင်မှာ ရဲစခန်းလဲ ရှိတယ်။ ဆားတောင်စျေးနဲ့ ရဲစခန်းကလည်း သိပ်မကွာပါဘူး။ မြို့ထဲစျေးနားလေးတွေလှည့်သွားတာ။” ဟု နယ်ခံတစ်ဦးက ပြောသည်။
ဆားတောင်မြို့တွင် စစ်ကောင်စီတပ်စွဲထားပြီး ပြီးခဲ့သည့် မေလ၂၁ ရက်ကလည်း ဆားတောင်ရဲစခန်းကို ဒေသကာကွယ်ရေးအဖွဲ့များက လာ ရောက်တိုက်ခိုက်ခဲ့ရာ စစ်အုပ်စုထိခိုက်သေဆုံးမှုများရှိခဲ့သည်။
