စစ်ကောင်စီကို ဆက်လက်ဖိအားပေးကြရန် ကန်နိုင်ငံခြားရေးဝန်ကြီးတိုက်တွန်း
၂၀၂၁ စစ်အာဏာသိမ်းချိန်မှစ၍ မြန်မာ့နိုင်ငံရေးအခြေအနေမှာ တိုးတက်လာသည့်လက္ခဏာမရှိကြောင်း စင်ကာပူနိုင်ငံခြားရေးဝန်ကြီး ဗီဗီယန်ဘလာခရစ်ရှ်နန်က ပြောသည်။
ဝါရှင်တန်ခရီးစဥ်တွင် အမေရိကန်နိုင်ငံခြားရေးဝန်ကြီး အန်တိုနီဘလင်ကန်နှင့် ပူးတွဲသတင်းစာရှင်းလင်းပွဲပြုလုပ်ရာ နိုင်ငံခြားရေးဝန်ကြီးနှစ်ဦးစလုံးက မြန်မာ့အရေးအပေါ် အဆိုးမြင်ကြောင်း ထည့်သွင်းပြောကြားခဲ့သည်။
မြန်မာ့အရေးတိုးတက်မှုမရှိသဖြင့် အာဏာသိမ်းစစ်ကောင်စီ၏ အဆင့်မြင့်အရာရှိများနှင့် ပြန်လည်ထိတွေ့ဆက်ဆံရန် အချိန်မဟုတ်ကြောင်း စင်ကာပူနိုင်ငံခြားရေးဝန်ကြီးက ဆိုသည်။ သို့သော် လက်ရှိအာဆီယံအလှည့်ကျဥက္ကဋ္ဌ အင်ဒိုနီးရှားနိုင်ငံသည် မြန်မာနိုင်ငံရှိ ပါဝင်ပတ်သက်သူ stakeholder များ(အာဏာသိမ်းမှုကို ဆန့်ကျင်သည့် တော်လှန်ရေးအင်အားစုများကို ရည်ညွှန်း)နှင့် ကျယ်ကျယ်ပြန့်ပြန့် ထိတွေ့ဆက်ဆံနေကြောင်း ၎င်းက ပြောသည်။
“အဆုံးသတ်မှာတော့ အားလုံးက စားပွဲဝိုင်းမှာထိုင်းပြီး ညှိနှိုင်းဆွေးနွေးရမှာပါ။ ဒါက ဘယ်လောက်ကြာမယ်ဆိုတာတော့ ကျွန်တော်မသိဘူး။ ပြီးခဲ့တဲ့အခေါက် မြန်မာနိုင်ငံမှာ ဒီမိုကရေစီအသွင်ကူးပြောင်းရေးပုံစံကတော့ ၂၅ နှစ်ကြာခဲ့တယ်။ ဒီတစ်ခါ အဲဒီလောက်မကြာဘူးလို့ ကျွန်တော်မျှော်လင့်ပါတယ်”ဟု စင်ကာပူနိုင်ငံခြားရေးဝန်ကြီးက ဆိုသည်။ ၎င်းအနေဖြင့် မြန်မာ့အရေးအပေါ် အဆိုးမြင်ကြောင်း ဖြည့်စွက်ပြောကြားသည်။
Public Service Announcement
အမေရိကန်နိုင်ငံခြားရေးဝန်ကြီးကလည်း စင်ကာပူနိုင်ငံခြားရေးဝန်ကြီး၏ အမြင်ကို သဘောတူပြီး ဝါရှင်တန်အနေဖြင့် မြန်မာ့အရေးနှင့်ပတ်သက်၍ အာဆီယံ၏ကြိုးပမ်းအားထုတ်မှုကို အားပေးထောက်ခံကြောင်း ပြောသည်။
“ကျွန်တော်တို့အားလုံး စစ်ကောင်စီကို ထိုက်သင့်တဲ့ဖိအားပေးမှု ဆက်လက်လုပ်ဆောင်ဖို့ အရမ်းအရေးကြီးပါတယ်။ အတိုက်အခံ(တော်လှန်ရေးအင်အားစု)နဲ့လည်း ထိတွေ့ဆက်ဆံဖို့လည်း နည်းလမ်းတွေ ရှာဖွေရမှာပါ”ဟု ကန်နိုင်ငံခြားရေးဝန်ကြီးက ပြောသည်။
အမေရိကန်သည် မြန်မာစစ်တပ်နှင့် ၎င်း၏ကုမ္ပဏီများကို အရေးယူဒဏ်ခတ်မှုများ လုပ်ဆောင်ထားပြီး အခြားနိုင်ငံများအနေဖြင့် စစ်ကောင်စီကို လက်နက်ရောင်းချမှု ရပ်တန့်ရန် တိုက်တွန်းထားသည်။
ပြီးခဲ့သည့် မေလတွင် ကုလသမဂ္ဂအထူးအစီရင်ခံတင်သွင်းသူက စင်ကာပူရှိ ကုမ္ပဏီများမှ မြန်မာစစ်တပ်ထံ အမေရိကန်ဒေါ်လာ ၂၅၄ သန်း တန်ဖိုးရှိ စစ်လက်နက်ပစ္စည်းများကို ပို့ဆောင်ခဲ့ကြောင်း ဖော်ထုတ်အစီရင်ခံသည်။ ယင်းအစီရင်စာအပေါ် ဘလာခရစ်ရှ်နန်က စင်ကာပူ၏ မူဝါဒမှာ မြန်မာနိုင်ငံတွင် စစ်ပွဲများအတွင်း အသုံးပြုနိုင်သည့် စစ်လက်နက်ပစ္စည်းများကို တားဆီးပိတ်ပင်ရန် အကောင်းဆုံးလုပ်ဆောင်ထားပြီး ကုလသမဂ္ဂအထူးအစီရင်ခံတင်သွင်းသူ၏ တွေ့ရှိချက်များအပေါ် အရေးယူဆောင်ရွက်မည်ဟု တုံ့ပြန်သည်။
ကိုးကား – channelnewsasia/Reuters
