မကွေးတိုင်း၊ မြိုင်မြို့နယ်ရှိ စစ်ကောင်စီ လက်အောက်ခံ ရဲများနှင့် ဌာနဆိုင်ရာဝန်ထမ်းများ အနေဖြင့် ပြည်သူနှင့်မပူးပေါင်းပါက ၎င်းတို့နေအိမ်ခြံဝင်းများအား ချိတ်ပိတ်မည်ဟု မြိုင်မြို့နယ် ပြည်သူ့ကာကွယ်ရေးတပ်ဖွဲ့(ပကဖ)ခေါင်းဆောင် ဗိုလ်လက်ယျာက ပြောသည်။
အဆိုပါ ဝန်ထမ်းများအနေဖြင့် ပြည်သူလူထုနှင့် ပူးပေါင်းခြင်းမရှိပါက ၎င်းတို့၏ နေအိမ်ခြံဝင်းများအား မြို့ပေါ်နှင့် ရပ်ကွက်ကျေးရွာ မည်သည့်နေရာတွင် ရှိနေသည်ဖြစ်စေ ပြည်သူ့ဘဏ္ဍာအဖြစ်သိမ်းဆည်းခြင်း၊ ချိတ်ပိတ်ခြင်းများအား ပြုလုပ်သွားမည်ဖြစ်ကြောင်း မြိုင်(ပကဖ)က ကြေညာသည်။
“အဖွဲ့တွေက ကလေးတွေဖမ်းတာတို့၊ ခေါင်းဆောင်တွေဖမ်းတာတို့ ပါတီဝင်တွေဖမ်းတာတို့ အဲလိုမျိုးတွေရှိတယ်။ ဖမ်းပြီးရင် အိမ်တွေချိတ်ပိတ်တယ်။ သူတို့တွေက ချိတ်ပိတ်ထားတဲ့အိမ်တွေမှာ တက်နေကြတယ်။ သူတို့ CDM လုပ်ရင်လုပ်၊မလုပ်ဘူးဆိုရင် ချိတ်ပိတ်မယ်။ သူတို့ကိုသက်ရောက်မှုတစ်ခု ပြန်ပေးတာပါ။”ဟု ဗိုလ်လက်ယျာက ပြောသည်။
အဆိုပါ လုပ်ငန်းများအား လာမည့် ဇူလိုင် ၁၅ ရက်အတွင်း နောက်ဆုံးထားဆောင်ရွက်သွားမည်ဖြစ်ကြောင်း မြိုင်(ပကဖ)က သတိပေးထားသည်။
Public Service Announcement
မြိုင်မြို့ပေါ်တွင် စစ်ကောင်စီက ထိန်းသိမ်းထားနိုင်သော်လည်း ကျေးရွာများတွင်မူ စစ်ကောင်စီတပ်က ထိန်းချုပ်နိုင်ခြင်းမရှိကြောင်း မြိုင်နယ်ခံများက ပြောသည်။
“ပြည်သူ့စစ်ရွာတွေဆို အပြင်တောင်မထွက်ရဲဘူး။ သရက်ကွပြည်သူ့စစ်ရွာဆို ဆရာ၊ဆရာမတွေတောင် သွားပြီးစာမသင်ရဲဘူး။”ဟု ဒေသခံတစ်ဦးက ပြောသည်။
မြိုင်မြို့တွင် စစ်ကောင်စီလက်အောက်ခံဝန်ထမ်း ၄၀၀ ကျော်ရှိပြီး မြို့နယ်အတွင်း နေအိမ်ခြံဝင်းနှင့်နေထိုင်သူ ၈၀ဝန်းကျင်ရှိကြောင်း၊ စစ်ကောင်စီကလည်း တော်လှန်ရေးတွင်ပါဝင်နေသူများ၏ မြိုင်မြို့ပေါ်ရှိ နေအိမ် ၁၀လုံးကျော်ကို ချိတ်ပိတ်ထားကြောင်း မြိုင်(ပကဖ)က ပြောသည်။
