မော်လိုက်စခန်းသိမ်းတိုက်ပွဲ ဗိုလ်ကြီးတစ်ဦး အပါအဝင် စစ်ကောင်စီတပ် ၁၀ဦးသေ

လက်နက် ၇လက်နှင့် ကျည်ခဲယမ်းများစွာရဟု NUG အသိပေး

စစ်ကိုင်းတိုင်း မော်လိုက်မြို့နယ်၊ တောင်အင်းကျေးရွာအနီးရှိ စစ်ကောင်စီတပ် စခန်းကုန်းအား ယမန်နေ့က တိုက်ခိုက်သိမ်းပိုက်ခဲ့ရာ စစ်ကောင်စီတပ်မှ အရာရှိအပါအဝင် ၁၀ဦးသေဆုံးပြီးလက်နက်ခဲယမ်းများ သိမ်းဆည်းရရှိခဲ့ကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ယနေ့ သတင်းထုတ်ပြန်သည်။

စစ်ကောင်စီ၏ ခမရ (၃၆၅)၊ခမရ (၃၆၆)၊ ရဲနှင့် ပျူစောထီး အင်အား ၅၀ခန့် ပူးပေါင်းအခြေချတပ်စွဲထားသော စခန်းကုန်းအား ဇွန်လ ၃၀ရက် နံနက်အစောပိုင်း၌ ပြည်သူ့ကာကွယ်ရေးတပ်မတော်၊ အမှတ်(၁)စစ်ဒေသ၊ မော်လိုက်ခရိုင်တပ်ရင်း (၂)၊ တပ်ရင်းမှူးဦးစီးသော ပြည်သူ့ကာကွယ်ရေးတပ်မတော်သားများက တိုက်ခိုက်ခဲ့ခြင်းဖြစ်သည်ဟု ဆိုသည်။

စခန်းသိမ်းတိုက်ပွဲဖြစ်ပွားရာသို့ စစ်ကောင်စီတပ် ဒေသကွပ်ကဲမှုစစ်ဌာနချုပ်(ကလေး)တွင် ယာယီ အခြေပြုထားသည့် Mi-35 အကြီးစားတိုက်ခိုက် ရေး ရဟတ်ယာဉ်ဖြင့် သုံးကြိမ်လာရောက်တိုက်ခိုက်ခဲ့ပြီးတံတားဦး လေတပ်စခန်းမှ တက်လာသည့် A-5 ဗုံးကြဲတိုက်ခိုက်ရေး လေယာဉ်ဖြင့် တစ်ကြိမ်လာရောက် တိုက်ခိုက်ခဲ့သော်လည်း ရန်သူ့စခန်းကုန်းအား သိမ်းပိုက်ရရှိခဲ့ကြောင်း အသိပေးထားသည်။

စခန်းသိမ်းတိုက်ပွဲမှာ နံနက် ၅နာရီ ၁၅မိနစ်အချိန်မှ နံနက် ၁၁နာရီ ၄၅မိနစ်ခန့်အထိ ၆နာရီခွဲကျော်ကြာမြင့်ခဲ့ပြီး ရန်သူအကြမ်းဖက်စစ်တပ်မှ ဗိုလ်ကြီး တစ်ဦးအပါအဝင် ၁၀ဦးသေဆုံးခဲ့ကြောင်း ထုတ်ပြန်သည်။

Public Service Announcement

ထို့ပြင် စစ်ကောင်စီတပ်ထံမှ MA-7 (၆၀) မမ စိန်ပြောင်းအရှည် တစ်လက်၊ BA-100 (၆၀) မမ ကွန်မန်ဒိုစိန်ပြောင်း တစ်လက်၊ MA-10 RPG တစ်လက်၊ MA 1 တစ်လက်၊ MA 2 တစ်လက်၊ BA-64 တစ်လက်၊ M1 ကာဘိုင် တစ်လက်နှင့် ကျည်၊ ခဲယမ်းအများအပြား စစ်အသုံးအဆောင်များ သိမ်းဆည်းရရှိခဲ့ကြောင်း ဓာတ်ပုံမှတ်တမ်းများနှင့်အတူ ဖော်ပြသည်။

အဆိုပါတိုက်ခိုက်မှုအတွင်း PDFရဲဘော်များ ထိခိုက်ကျဆုံး ရှိ၊မရှိ အခြေအနေကို ဖော်ပြထားခြင်းမရှိပေ။