စစ်ကိုင်းတိုင်း ဒီပဲယင်းမြို့နယ် စိုင်ပြင်ကြီးရဲစခန်းကို ပြည်သူ့ကာကွယ်ရေးမဟာမိတ် လေးဖွဲ့ တိုက်ခိုက်ခဲ့ရာ စစ်ကောင်စီတပ်ဖွဲ့ဝင် သုံးဦးသေဆုံးကြောင်း သတင်းရရှိသည်။
စိုင်ပြင်ကြီးရဲစခန်းကို ဇွန်လ ၃၀ရက် ညနေ၆နာရီခွဲခန့်တွင် အဖြူရောင် ပကဖ၊ A2k ပကဖ၊ ရန်ကြီးအောင် PDFနှင့် နယ်စည်းမခြား Freedom Federal စစ်ကြောင်း (၁)တို့က ပူးပေါင်းတိုက်ခိုက်ခဲ့ခြင်းဖြစ်သည်။
” စိုင်ပြင်က စစ်ကောင်စီတပ်တွေ ဂိတ်ဖြုတ်ချိန် ရဲဘော်တွေက သွားပစ်တာ။ လေးယောက်ထိသွားတယ်”ဟု ဒီပဲယင်းမြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက ပြောသည်။
အဖြူရောင် ပကဖတာဝန်ခံ CKက ” စစ်တပ်ဘက်က သုံးယောက်သေပါတယ်။ ဒဏ်ရာရတာတွေလည်း ရှိတယ်လို့ သတင်းပေးလာပါတယ်ဗျ”ဟု ပြောသည်။
Public Service Announcement
(၄၀) မမဗုံးသီးဖြင့် စတင်ပစ်ခတ်ပြီးနောက် ဝိုင်းဝန်းတိုက်ခိုက်ရာ တိုက်ပွဲအတွင်း နှစ်ဦးသေဆုံးပြီး နှစ်ဦးဒဏ်ရာအပြင်းအထန်သွားကြောင်း၊ ဒဏ်ရာရသူနှစ်ဦးအနက် တစ်ဦးမှာ ဆေးကုသနေစဉ် ဇူလိုင် ၁ရက် နေ့လယ်၁၂နာရီခန့်တွင်ထပ်မံသေဆုံးသွားကြောင်း အဖြူရောင်(ပကဖ) က ထုတ်ပြန်ထားသည်။
လက်ရှိတွင် ဒီပဲယင်းနယ်အတွင်း စစ်ကောင်စီစစ်ကြောင်းအချို့ရှိနေပြီး တိုက်ပွဲများဖော်ဆောင်နိုင်ရေးအတွက် ထောက်ပံ့ကူညီပေးကြရန် အဖြူရောင် ပကဖ တာဝန်ခံ CKက မေတ္တာရပ်ခံသည်။
