ကျိုက်ထီးရိုးတောင်တက်လမ်းရှိ တံတားတစ်စင်းအား မိုင်းခွဲတိုက်ခိုက်ခဲ့ဟု KNLA တပ်မှူးပြော

ဘီးလင်း – ကျိုက်ထိုကြားရှိ သံတံတားစစ်ဆေးရေးဂိတ်ကိုလည်း ဒရုန်းဖြင့် ထပ်မံတိုက်ခိုက်

မွန်ပြည်နယ် ကျိုက်ထိုမြို့နယ် ကျိုက်ထီးရိုးတောင်တက်လမ်းရှိ တံတားတစ်စင်းအား မိုင်းခွဲတိုက်ခိုက်ခဲ့ကြောင်း ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၁)နယ်မြေခံတပ်မှူးတစ်ဦးက ပြောသည်။

ယနေ့ (ဇူလိုင် ၆ရက်) မွန်းလွဲ ၃နာရီခန့်တွင် မိုင်းခွဲဖျက်ဆီးခဲ့ခြင်းဖြစ်သည်ဟု ဆိုသည်။

“ပုံတော့မရသေးဘူး။ တံတားတစ်ခုလုံးတော့ ပျက်ကျသွားတယ်”ဟု KNLA တပ်မှူးက ပြောသည်။

KNLA ပူးပေါင်းတပ်အနေဖြင့် ယခုရက်ပိုင်းအတွင်း စစ်ကောင်စီတပ်၏ ထောက်ပို့လမ်းကြောင်းကို ဖြတ်တောက်ရန် ရည်ရွယ်ပြီး တံတားများကို တိုက်ခိုက်မှုများ လုပ်ဆောင်လျက်ရှိရာ နတ်သံကွင်းတံတား၊ ဘီးလင်းမြို့နယ် ရန်ကုန်- မော်လမြိုင်လမ်းမပေါ်ရှိ ကျုံအိတ်တံတားကို မိုင်းခွဲတိုက်ခိုက်ခဲ့သည်။

Public Service Announcement

ယနေ့မွန်းလွဲ ၂နာရီခန့်ကလည်း ကျိုက်ထိုနှင့် ဘီးလင်းအစပ်ရှိ သံတံတား စစ်ဆေးရေးဂိတ်ကို ဒရုန်းဖြင့် ၆ ကြိမ်တိုက်ခိုက်ခဲ့သည်ဟု KNLA တပ်မှူးက ပြောသည်။

အဆိုပါတိုက်ခိုက်မှုများအတွင်း စစ်ကောင်စီတပ်ဘက်က ထိခိုက်မှုကို ဆက်လက်စုံစမ်းဆဲဖြစ်ပြီး မိတ်ဖက်ပူးပေါင်းတပ်ဖွဲ့များဘက်က ထိခိုက်မှုမရှိဟု ဆိုသည်။