စစ်​ကောင်စီ စစ်​ထောက်ချုပ်ပါသည်ဆို​သောယာဥ်တန်း အမြန်လမ်းတွင်တိုက်ခိုက်ခံရ

▪︎ပြည်သူများအမြန်လမ်းတွင် စစ်​ကောင်စီ ယာဥ်၊တပ်ဖွဲ့ဝင်များနှင့် ​ဝေး​ဝေး​နေပးရန် PDFအမှတ် ၂ စစ်​ဒေသ​မေတ္တာရပ်ခံ

ရန်ကုန်-နေပြည်တော်အမြန်လမ်းတွင် ယာဉ်ဆယ်စီးပါ စစ်ကောင်စီစစ်ထောက်ချုပ် လိုက်ပါလာသည်ဆို​သောယာဉ်တန်းကိုတောင်ငူခရိုင် ပြည်သူ့ကာကွယ်ရေးတပ်ရင်း ၃၅၀၁၊ အထူးတပ်ဖွဲ့ကတိုက်ခိုက်ခဲ့သတင်းရရှိသည်။

နေပြည်တော် – ရန်ကုန်အမြန်လမ်း ၁၆၉ မိုင်အနီးတွင် ယနေ့ (ဇူလိုင်လ ၇ ရက်) နံနက် ၉နာရီ ၁၅မိနစ်ခန့်ကမိုင်းဆွဲတိုက်ခိုက်တိုက်ခိုက်ခဲ့ပြီး​နောက် လက်နက်ကြီးဖြင့်ပါ

ပစ်ခတ်တိုက်ခိုက်ရာ စစ်တပ်ယာဥ်တန်းထိခိုက်ပြီးရပ်တန့်သွားသည်ဟုအမှတ် (၂ )စစ်​ဒေသ၊ ဒုတိယစစ်​ဒေသမှူးရဲ​ဘော်တင်ဦးက​ပြောသည်။

“တိုက်ခိုက်ပြီးပြီးချင်း သူတို့ဘက်က ပြန်ပစ်ပါတယ်။ လမ်းလည်း ပိတ်ပစ်ပါတယ်။ လူနာတင်ကားတွေလာတယ်” ဟု ရဲ​ဘော်တင်ဦးကပြောသည်။

Public Service Announcement

အဆိုပါ ယာဉ်တန်းတွင် စစ်ကောင်စီတပ်၏ စစ်ထောက်ချုပ် ဒုတိယဗိုလ်ချုပ်ကြီးကျော်စွာလင်းလိုက်ပါလာသည်ဟု သတင်းကြိုတင်ရထားသော်လည်းအတည်မပြုနိုင်ကြောင်း ကာကွယ်ရေးရဲဘော်အချို့ကပြောသည်။

တိုက်ခိုက်မှုကိုတောင်ငူခရိုင် ပြည်သူ့ကာကွယ်ရေးတပ်ရင်း ၃၅၀၁က ဖော်ဆောင်ခဲ့ခြင်းဖြစ်ကြောင်းဟု ပဲခူးစစ်ဒေသခွဲမှ တာဝန်ရှိသူကပြောသည်။ ယာဉ်တန်းအားမိုင်းဖြင့် ခွဲလိုက်ပြီးနောက် အပြန်အလှန်ပစ်ခတ်မှု ဖြစ်ခဲ့ကြောင်း၊ စစ်ကောင်စီယာဉ်တန်းရပ်တန့်သွားပြီး လမ်းကို ပိတ်လိုက်ကြောင်း ၎င်းကဆက်​ပြောသည်။

ပြည်သူ့ကာကွယ်ရေးရဲဘော်များ အထိအခိုက်မရှိ ပြန်ဆုတ်ခွာခဲ့ကြောင်း သိရပြီးစစ်ကောင်စီဘက်မှ ထိခိုက်မှုအခြေအ‌နေကို စုံစမ်း​နေဆဲဖြစ်ပြီး မသိရသေးပေ။

“ယာဥ်တန်းထိခိုက်တာ ​သေချာပါတယ်။အဓိက အားဖြင့်​တော့ ၁ ရက်​(ဇူလိုင် ၁ )နေ့က​ထုတ်ပြန်ထားတဲ့စာအတိုင်းပဲ စစ်​ရေးအရှိန်မြှင့်မယ့်အတွက်​ကြောင့် ဒီလမ်းပိုင်း​တွေမှာ အသွားအလာ​တွေကန့်သတ်ဖို့လည်းကျွန်​တော်တို့ ထုတ် ပြန်ထားပါတယ်။အဲဒီအတိုင်းကို ကျွန်​တော်တို့​ဆောင်ရွက်တာဖြစ်ပါတယ်။ တိုက်ခိုက်မှု​တွေ​ဆောင်ရွက်တဲ့အခါမှာ ပြည်သူ​တွေအ​နေနဲ့လည်း ထုတ်ပြန်ထားတဲ့စာအတိုင်း စစ်​ကောင်စီယာဥ်တန်း​တွေနဲ့စစ်​ကောင်စီတပ်ဖွဲ့​တွေနဲ့ ​ဝေး​ဝေးမှာ​နေကြဖိူ့လည်း ထပ်ပြီး​မေတ္တာရပ်ခံပါတယ်”ဟု ရဲ​​​ဘော်တင်ဦးက​ပြောသည်။

ဇူလိုင် ၁ ရက်​နေ့မှ စ၍ စစ်ရှိန်မြှင့်မည်ဖြစ်၍ အမည်လမ်းကိုအသုံးပြု​သောပြည်သူများ စစ်​ကောင်စီကားများနှင့်ကပ်မလိုက်ရန် ၊လမ်းအသုံးပြုမှု သတိထားရန်PDF အမှတ် ၂ စစ်​ဒေသကသတိ​ပေးထားသည်။

နေပြည်တော်မှ ရန်ကုန်သို့အပြန်ဘက်ခြမ်း အမြန်လမ်း ၁၆၉ မိုင်အနီးတွင် ယနေ့ နံနက် ၁၀နာရီခန့်က လမ်းပိတ်ဆို့နေသည်ကို တွေ့ခဲ့ရသည်ဟု အဝေးပြေးယာဉ်မောင်းတစ်ဦးကပြောသည်။

” လူနာတင်ကားတွေလည်းတွေ့တယ်။ ဖြစ်စဉ်ကိုတော့ အခုညနေမှသိတာ” ဟု ၎င်းကပြောသည်။

ယခုဖြစ်စဥ်အပါအဝင် အမြန်လမ်းပေါ်တွင် စစ်ကောင်စီပစ်မှတ်များကို ပြည်သူ့ကာကွယ်ရေးတပ်ဖွဲ့က သုံးကြိမ်မြောက် တိုက်ခိုက်ခြင်းဖြစ်သည်။

ပြီးခဲ့သည့်မေလ၃၁ ရက်ကလည်း တောင်ငူအခြေစိုက် အမှတ်(၁၀၁၅) လေကြောင်းရန်ကာကွယ်ရေးတပ်မှ ဒုဗိုလ်မှူးကြီးရဲနိုင်ကို အမြန်လမ်းပေါ်တွင် ရေတာရှည်မြို့နယ်ပြည်သူ့ကာကွယ်ရေးတပ်ဖွဲ့က ပစ်ခတ်ရှင်းလင်းခဲ့သည်။ ရန်ကုန်တိုင်း စစ်ကြောရေးတာဝန်ခံ ဒုဗိုလ်မှူးကြီးသန်းထွဋ်ကိုလည်း တောင်ငူခရိုင်တပ်ရင်း ၃၅၀၁ကရန်ကုန် – နေပြည်တော် အမြန် လမ်း မိုင်တိုင် ၁၆၁ အနီးတွင် ဇန်နဝါရီလ ၂၂ ရက်နေ့ကပစ်ခတ်ရှင်းလင်းခဲ့သည်။