အမြန်လမ်းအပါအဝင် တောင်ပိုင်းတိုင်းစစ်ဒေသခွဲက သတိပေးထားသည့် လမ်းပိုင်းများ အသုံးပြုမည့် ပြည်သူများအနေဖြင့် စစ်ကောင်စီက စစ်ရေးအရအကာအကွယ်ယူမည့်အခြေအနေကို ပါးပါးနပ်နပ် ရှောင်ရှားရန် အမှတ်(၂)စစ်ဒေသခွဲ ဒုတိယစစ်ဒေသခွဲမှူး ရဲဘော်တင်ဦးက ထပ်မံသတိပေးသည်။
တောင်ပိုင်းတိုင်းစစ်ဒေသခွဲ၊ အမှတ် (၂) စစ်ဒေသခွဲမှ လမ်းပိုင်းများဖြစ်သော ပဲခူးတိုင်းအတွင်းရှိ ရန်ကုန်−မန္တလေး အမြန်လမ်း၊ ရန်ကုန်−မန္တလေးလမ်း လမ်းဟောင်း၊ ပဲခူး−စစ်တောင်းလမ်းပိုင်းနှင့် ရန်ကုန်−မုတ္တမ၊ ရန်ကုန်−ဘားအံလမ်းပိုင်းများအား နေ့စဉ် ညနေ ၆ နာရီမှ နံနက် ၆ နာရီအတွင်း မသွားလာကြရန် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ တောင်ပိုင်းတိုင်းစစ်ဒေသခွဲက ဇူလိုင် ၁ ရက်ကသတိပေးချက်ထုတ်ပြန်ထားသည်။
အဆိုပါ လမ်းပိုင်းများ၊ အထူးသဖြင့် ရန်ကုန် -နေပြည်တော် အမြန်လမ်းတွင်စစ်ကောင်စီတပ်ကားများသည် ပြည်သူများ၏ အိမ်စီးကားများ၊ ခရီးသည်တင်ကားများကို အကာအကွယ်ယူကာ သွားလာနေသည်ကို တွေ့ရသည်ဟု ရဲဘော်တင်ဦးကပြောသည်။
“ကျွန်တော်တို့ရဲဘော်တွေရဲ့သတင်းပေးချက်ပါ။စစ်ကောင်စီကားတွေဟာ ပြည်သူတွေရဲ့ ကားတွေနဲ့ အနီးကပ်လိုက်တာတွေ ရှိနေပါတယ်။အကြမ်းဖက် စစ်ကောင်စီကတော့ ပြည်သူကို လူသားဒိုင်းအဖြစ် အသုံးချနေတာ။ ဒါကို ပြည်သူတွေ ပါးပါးနပ်နပ် ရှောင်ရှားကြဖို့လိုပါတယ်” ဟု ရဲဘော်တင်ဦးကပြောသည်။
Public Service Announcement
လမ်းအသုံးပြုခွင့် အချိန် ကန့်သတ်မှုကို ဇူလိုင်လ ၁ရက်တွင် တောင်ပိုင်းတိုင်းစစ်ဒေသခွဲက သတင်းထုတ်ပြန်ခြင်းဖြစ်သည်။ ယင်းသတင်းထုတ်ပြန်သတိပေးပြီး ခုနစ်ရက်မြောက်နေ့ ဇူလိုင်လ ၇ ရက် နံနက် ၉နာရီ ၁၅မိနစ်တွင် စစ်ကောင်စီ အရာရှိများလိုက်ပါလာသည့် ယာဉ်တန်းကို နေပြည်တော် – ရန်ကုန်အမြန်လမ်း၁၆၉ မိုင် ၄ဖာလုံအနီးတွင် တောင်ငူခရိုင် ပြည်သူ့ကာကွယ်ရေးတပ်ရင်း ၃၅၀၁က တိုက်ခိုက်ခဲ့သည်။ အဆိုပါယာဉ်တန်းတွင် စစ်ကောင်စီစစ်ထောက်ချုပ် ဒုတိယဗိုလ်ချုပ်ကြီးကျော်စွာလင်းလိုက်ပါလာသည်ဟု ပြည်သူ့ကာကွယ်ရေးရဲဘော်များက သတင်းရရှိထားခဲ့သော်လည်း အသေးစိတ်အတည်မပြုနိုင်သေးပေ။ တိုက်ခိုက်မှုတွင် စစ်ကောင်စီ ကား နှစ်စီးထိခိုက်ပျက်စီးသွားပြီး သေဆုံးထိခိုက်မှုများရှိနိုင်ကြောင်းရဲဘော်တင်ဦးကပြောသည်။
ယင်းတိုက်ခိုက်မှုမတိုင်ခင်က ရန်ကုန်-နေပြည်တော်အမြန်လမ်းပေါ်တွင် စစ်ကောင်စီ၏ ဒုတိယဗိုလ်မှူးကြီး နှစ်ဦးကို ပြည်သူ့ကာကွယ်ရေးတပ်ဖွဲ့များကပစ်ခတ်သတ်ဖြတ်ထားသည်။ပြီးခဲ့သည့်မေလ၃၁ ရက်က တောင်ငူမြို့အခြေစိုက် အမှတ်(၁၀၁၅) လေကြောင်းရန်ကာကွယ်ရေးတပ်မှ ဒုဗိုလ်မှူးကြီးရဲနိုင်ကို အမြန်လမ်းပေါ်တွင် ရေတာရှည်မြို့နယ်ပြည်သူ့ကာကွယ်ရေးတပ်ဖွဲ့ကပစ်သတ်ခဲ့သည်။ဇန်နဝါရီလ ၂၂ ရက်နေ့ကလည်း ရန်ကုန်တိုင်း စစ်ကြောရေးတာဝန်ခံ ဒုဗိုလ်မှူးကြီးသန်းထွဋ်ကို တောင်ငူခရိုင်တပ်ရင်း ၃၅၀၁က ရန်ကုန် – နေပြည်တော် အမြန် လမ်း မိုင်တိုင် ၁၆၁ အနီးတွင် ပစ်ခတ်သတ်ဖြတ်ခဲ့သည်။
” ကျွန်တော်တို့ကန့်သတ်ရတဲ့အဓိကအကြောင်းရင်းက ပြည်သူလူထုနစ်နာမှာစိုးလို့ပါ။ ဒီကာလ စစ်ရေးအရှိန်မြှင့်နေပါတယ်။စစ်ကောင်စီယာဉ်တန်းနဲ့ ဝေးဝေးနေတာ ပိုကောင်းပါတယ်” ဟုရဲဘော်တင်ဦးကပြောသည်။
