ပဲခူးတိုင်း၊ ပေါင်းတည်မြို့နယ်ရှိကျေးရွာများသို့ စစ်ကြောင်းထိုးနေသော စစ်ကောင်စီတပ်ကို ယမန်နေ့(ဇူလိုင် ၁၄)တစ်ရက်တည်း နှစ်ကြိမ်တိုက်ခိုက်ခဲ့ပြီး စစ်ကောင်စီတပ်မှ သုံးဦးထက်မနည်းသေဆုံးကြောင်း ပြည်ခရိုင် PDF တပ်ရင်း (၃၆၀၁)၊ တပ်ခွဲ(၅) PPDF မှ တော်လှန် ရေးရဲဘော်တစ်ဦးက People’s Spring သတင်းဌာနသို့ ပြောသည်။
ယမန်နေ့နံနက် ၁၀ နာရီခန့်က ပေါင်းတည်မြို့နယ်နက်ကန်ကျေးရွာဘက်မှ ပဲခူးရိုးမအစပ်သို့ဦးတည်၍ စစ်ကြောင်းထိုးလာသော အင်အား ၄၅ ဦးခန့်ပါ စစ်ကောင်စီတပ်ကို လမ်းမှနေ၍ စောင့်ကြိုပစ်ခတ်တိုက်ခိုက်ခဲ့ရာ တစ်ဦးသေဆုံးကြောင်း အထက်ပါရဲဘော်က ပြောသည်။
အဆိုပါ စစ်ကြောင်းသည်ဇူလိုင်၁၄ ရက်နေ့လယ် ၁ နာရီခန့်တွင် ဆက်ထွက်လာရာလက်ပံကုန်းရွာအရှေ့ဘက်အရောက်၌တပ်ရင်း (၃၆၀၁)၊ တပ်ခွဲ(၅)မှ ရဲဘော်များက ကြားဖြတ်တိုက်ခိုက်ရာမှ နာရီဝက်ကြာတိုက်ပွဲဖြစ်ပွားပြီး စစ်တပ်ဘက်မှ နှစ်ဦးသေဆုံးကြောင်း သိရသည်။
Public Service Announcement
စစ်ကောင်စီတပ်သေဆုံးထိခိုက်မှုအခြေအနေကို People’s Spring ကသီးခြားအတည်မပြုနိုင်ပါ။
“တစ်ရက်ထဲ မနက် ၁၀ နာရီလောက်က တစ်ခါ၊ နေ့ လယ် ၁ နာရီလောက်မှ တစ်ခါဖြစ်တယ်။ သူတို့(စစ်ကောင်စီတပ်)က သုံးဖွဲ့ခွဲပြီး စစ်ကြောင်းထိုးနေတာ”ဟု ပြည်ခရိုင် တပ်ရင်း(၃၆၀၁)PPDF မှ တော် လှန်ရေးရဲဘော်တစ်ဦးက People’s Spring သို့ ပြော သည်။
စစ်ကောင်စီတပ်သည် ပေါင်းတည်မြို့နယ်အတွင်း စစ်ကြောင်းထိုးရာတွင် သစ်ပုတ်ကျေးရွာဘက်တွင် စစ်ကြောင်းတစ်ကြောင်း၊ကြို့ကုန်းဘက်တွင်တစ်ကြောင်းနှင့်နက်ကန်ရွာဘက်တွင်တစ်ကြောင်းအသီးသီးဖြစ်ကြောင်း သိရသည်။
ဇူလိုင် ၃ ရက်နှင့် ၄ ရက်နေ့များတွင်လည်း ပေါင်းတည်မြို့နယ် တောင်ခမောက်ဘက်သို့ စစ်ကြောင်းထိုးလာသော စစ်ကောင်စီတပ်ကို ပြည်ခရိုင် PDF တပ်ရင်း(၃၆၀၁)၊ တပ်ခွဲ(၅)၏ စစ်ကြောင်းများက မိုင်းဆွဲခြင်း၊ ပစ်ခတ်တိုက်ခိုက်ခြင်းများပြုလုပ်ခဲ့ရာ တစ်ဦးသေပြီး သုံးဦးထက်မနည်းထိခိုက်ဒဏ်ရာရခဲ့ကြောင်းသိရသည်။
