ပေါက်မြို့နယ်ရှိ တပ်ကုန်းရွာတိုက်ပွဲ နှစ်ဖက်ထိခိုက်မှုရှိ

မကွေးတိုင်း၊ ပေါက်မြို့နယ်ရှိ စစ်ကောင်စီတပ်နှင့် ပျူစောထီးစခန်းချရာ တပ်ကုန်းကျေးရွာအား ပစ်ခတ်တိုက်ခိုက်ခဲ့ရာ ပျူနှစ်ဦး​သေဆုံးပြီး ပြည်သူ့ရဲဘော် သုံးဦးလည်း ကျဆုံးခဲ့ကြောင်း Chauk Guerilla Force(CGF)၏ တာဝန်ရှိသူက ပြောသည်။

ပေါက်မြို့နယ်ရှိ တပ်ကုန်းကျေးရွာ၌ ပျူစောထီးများနှင့် ပခုက္ကူမြို့ တပ်မ(၁၀၁)မှ စစ်သားများ တပ်စွဲထားကြောင်း၊ ဇူလိုင် ၁၉ ရက် အာဇာနည်နေ့ နံနက် ၆ နာရီခန့်က အဆိုပါကျေးရွာအား ပစ်ခတ်တိုက်ခိုက်ခဲ့ရာ ပျူ နှစ်ဦး​သေဆုံးပြီး ခြောက်ဦး ဒဏ်ရာရရှိကြောင်း CGF ၏ တာဝန်ရှိသူက ပြောသည်။

ထို့အပြင် မဟာမိတ်အဖွဲ့များမှကလည်း ရဲဘော် သုံးဦး ကျဆုံးခဲ့ရကြောင်း ​ဒေသတွင်း တော်လှန်ရေးအင်အားစုများက ပြောသည်။

“လက်နက်ကြီးက အဲဒီ သုံးယောက်ကြားထဲကျတာ။”ဟု ဒေသတွင်း PDF ရဲဘော်တစ်ဦးက ပြောသည်။

Public Service Announcement

စခန်းသိမ်းရန် ရည်ရွယ်ကာ သွားရောက်တိုက်ခိုက်ခဲ့သော်လည်း စစ်ကောင်စီဘက်က လေကြောင်းပစ်ကူခဲ့၍ ဆုတ်ခွာခဲ့ကြောင်း CGF၏ တာဝန်ရှိသူက ဆိုသည်။

“အင်အား ၄၀ လောက်ရှိမယ်ထင်တယ်။ကျွန်တော်တို့အဖွဲ့ထဲကတော့ တစ်ယောက်ပဲ မစိုးရိမ်ရကျည်ဒဏ်ရာရခဲ့တာ။ Mi-35လေကြောင်းပစ်ကူလာလို့ ပြန်ဆုတ်ခွာခဲ့ရတာပါ။ တိုက်ပွဲဖြစ်ပြီးတော့ ရွာသစ်ပျူရွာက စစ်ကူ၁၇ယောက်လောက်လာတယ်လို့ တော့ကြားတယ်။”ဟု CGF၏ တာဝန်ရှိသူက ပြောသည်။

အဆိုပါ တိုက်ခိက်မှုကို Chauk Guerilla Force(CGF)၊ ပခုက္ကူခရိုင် တပ်ရင်း (၁၂) YRF၊ မြိုင်(ပကဖ)၊ ပေါက်တောင်ပိုင်း(ပကဖ)၊ ဗိုလ်ကျီးကန်း၊ ပခုက္ကူ PPDF၊ ချောက်(ပကဖ)၊ ပခုက္ကူခရိုင် တပ်ရင်း(၁၈)၊ ပခုက္ကူ (ပကဖ)တပ်ခွဲ – ၁ တို့က ပူးပေါင်းတိုက်ခိုက်ခဲ့ကြောင်း အသိပေးထားသည်။