ရှမ်း – ကယားနယ်စပ် လွိုင်ကော် – မိုးဗြဲလမ်းမကြီး တစ်လျှောက်တွင် ဖြစ်ပွားခဲ့သည့်တိုက်ပွဲများအတွင်း စစ်ကောင်စီတပ်မှ သေဆုံးထိခိုက်များပြားခဲ့ပြီး လက်နက်ခဲယမ်းများ သိမ်းဆည်းရရှိခဲ့ကြောင်း ကရင်နီအမျိုးသားများကာကွယ်ရေးတပ်(KNDF)က သတင်းထုတ်ပြန်သည်။
ဇူလိုင် ၂၀ရက်မှစ၍ စစ်ကောင်စီမှ စစ်ကြောင်းထိုးခြင်း ၊ စစ်ယာဥ်တန်းများဖြင့် အင်အားဖြည့်ဝင်ရောက်ခြင်းများ လုပ်ဆောင်ခဲ့၍ စစ်ကောင်စီတပ်များကို ကရင်နီပူးပေါင်းတပ်က တိုက်ခိုက်ခဲ့ကြောင်း အသိပေးထားသည်။
လွိုင်ကော်မြို့အထွက် မော်ချီးစုစည်းရွာဘက်သို့ စစ်ကြောင်းထိုးလာသည့် တပ်များနှင့် မိုးဗြဲဘက် မှလွိုင်ကော်မြို့သို့ဝင်လာသည့် စစ်ကောင်စီတပ် များကို ဇူလိုင် ၂၄ရက်နှင့် ၂၅ရက်များက တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂၀ဦး ထက်မနည်းသေဆုံးကာ လက်နက်ရှစ်လက် ၊ ခဲယမ်း၊ ကျည် များ ရရှိခဲ့ကြောင်း ထုတ်ပြန်သည်။
အဆိုပါတိုက်ခိုက်မှုကို KA၊ KNDF B/02 ၊ KNDF B/14 ၊ KNDF B/12 ၊ KNF ETD နှင့် Loikaw PDF တို့ ပူးပေါင်းဆောင်ရွက်ခဲ့ခြင်းဖြစ်သည်ဟု အသိပေးထားသည်။
Public Service Announcement
စစ်ကောင်စီတပ်ထံမှ သိမ်းဆည်းရရှိခဲ့သည့် လက်နက်များမှာ MA-1 ငါးလက် ၊ MA-2 စက်ကလေး တစ်လက် ၊ MA-3 နှစ်လက် နှင့် ခဲယမ်းမီးကျောက်များဖြစ်ပြီး စစ်အသုံးအဆောင်များကိုလည်း သိမ်းဆည်းရရှိခဲ့သည်ဟု ဆိုသည်။ထို့ပြင် စစ်ကောင်စီတပ်၏ စစ်သုံးကားတစ်စီးကိုလည်း ဖျက်ဆီးနိုင်ခဲ့ကြောင်း အသိပေးထားသည်။
စစ်ကောင်စီတပ်များမှ ဖယ်ခုံ – မိုးဗြဲ – လွိုင်ကော် လမ်းမကြီးအားအသုံးပြု၍ စစ်ယာဉ်တန်းကားများ အပြင် အရပ်သားကားများအား အသွင်ယူ၍ အသုံးပြုကာ ကရင်နီပြည်နယ်အတွင်းသို့ ဝင်ရောက်ခဲ့ကြောင်း၊အဆိုပါလမ်းမတလျှောက်တိုက်ပွဲများ နေ့စဉ်နီးပါး ဖြစ်ပွားနေကြောင်း KNDFက ထုတ်ပြန်သည်။
ဖယ်ခုံဒေသခံတစ်ဦးက”စစ်ကူဝင်လာတာကို တိုက်ခိုက်တာပေါ့။ ဖယ်ခုံကို ကားတွေဖြတ်သွားတာတွေ့တယ်။မိုးဗြဲအထွက်မှာလုပ်(တိုက်ခိုက်)ကြတယ်ပြောတယ်။ အကျအဆုံးတော့ရှိတယ်လို့ ပြောတယ်”ဟု ပြောသည်။
စစ်ကောင်စီအနေဖြင့် ကရင်နီဒေသို့စစ်အင်အားဖြည့်တင်းမှုများ လုပ်ဆောင်နေသော်လည်း ယခင်ကဲ့သို့ပြည်နယ်အတွင်း စိုးမိုးလှုပ်ရှားနိုင်ရန်မှာ မလွယ်ဟု ၎င်းက ဆိုသည်။
“သူတို့ လွိုင်ကော်တစ်ခုလောက်ပါပဲသူတို့ စိုးမိုးနိုင်တာ။ကျန်တဲ့နေရာကတော့လူထုကို အကာအကွယ်ယူပြီးလုပ်တာမြင်ရတာပဲ။ ဓားဓားချင်းလှံလှံချင်းဆိုတာ ပါးစပ်ပဲ။ လက်နက်မရှိတဲ့ လူထုတွေကို သူတို့(စစ်ကောင်စီတပ်) လက်နက်ကြီးတွေနဲ့လိုက်ပစ်တာကိုး”ဟု ဒေသခံ သတင်းရင်းမြစ်ကပြောသည်။
လွိုင်ကော် – မိုးဗြဲ – ဖယ်ခုံ လမ်းမကြီးပေါ်တွင် စစ်ကောင်စီတပ်ဖွဲ့များမှ စစ်ရေးလှုပ်ရှားမှုများ ဆက်၍ ပြုလုပ်လျက် ရှိနေသေး၍ ထိတွေ့မှုများရှိလာနိုင်ကြောင်း အသိပေးထားပြီး ပြည်သူများ အနေဖြင့် စစ်ရေးအသိ၊ သတိရှိစွာဖြင့် မိမိလုံခြုံရေးအား အလေးထားသွားလာကြရန် KNDFက မေတ္တာရပ်ခံထားသည်။
