တနင်္သာရီတိုင်း ထားဝယ်မြို့နယ် မောင်မယ်ရှောင်ကျေးရွာအနီးတွင် စစ်ကောင်စီတပ်သားများလိုက်ပါလာသော ယာဥ်တစ်စီးကို ပစ်ခတ်တိုက်ခိုက်ခဲ့ကြောင်း Dawei Guerrilla Revolutionary Force-DGRF(ထားဝယ်-ပကဖ)မှ တာဝန်ရှိသူတစ်ဦးက ပြောသည်။
ယမန်နေ့(သြဂုတ် ၃) ညနေ ၄နာရီကျော်က ရေး – ထားဝယ်လမ်းပိုင်း မောင်မယ်ရှောင်ကျေးရွာအနီးရှိ ဟာလီကွေ့၌ မြေသယ်ကားတစ်စီးဖြင့်လိုက်ပါလာသော အင်အား ၂၀ခန့်ပါ စစ်ကောင်စီတပ်ကို DGRF တပ်ခွဲ(၂)မှရဲဘော်များက အသင့်စောင့်စိုင်းတိုက်ခိုက်ခဲ့ခြင်းဖြစ်ပြီး တိုက်ခိုက်ခံရမှုကြောင့် စစ်ကောင်စီတပ်သားငါးဦးသေဆုံးကြောင်း DGRFက ပြောသည်။
“ပစ်ခတ်မှုအပြီးတော့ လူနာတင်ယာဥ်နှစ်စီးနဲ့ ကားရောက်လာသေးတယ်။ ဇဟာရွာအမြှောက် တပ်ရင်းကနေ။ ပြီးတော့ အဲဒီတပ်ရင်းဘက် ပြန်မောင်းသွားတယ်”ဟု တိုက်ခိုက်မှုနောက်ဆက်တွဲအခြေအနေအား DGRFမှ တာဝန်ရှိသူတစ်ဦးက People’s Spring သို့ ပြောသည်။
Public Service Announcement
ထို့အပြင် စစ်ကောင်စီတပ်သားများက တိုက်ခိုက်ခံရပြီးနောက် မောင်မယ်ရှောင်ကျေးရွာအတွင်းဝင်ရောက်ကာ ပြည်သူများ၏ နေအိမ်များအား ပစ်ခတ်ဖျက်ဆီးခြင်း၊ ဒေသခံပြည်သူအချို့အား ဖမ်းဆီးခြင်းများလုပ်ဆောင်ပြီး ၎င်းတို့အထိုင်တပ်သို့အပြန်တွင် ဓားစာခံအဖြစ် ဖမ်းဆီးခေါ်ဆောင်ခြင်းများရှိခဲ့ကြောင်း DGRF မှ တာဝန်ရှိသူက ဆက်ပြောသည်။
“ရွားသား ၅၀ဝန်းကျင်အဖမ်းခံရပြီး တပ်ရင်းအထိ ခေါ်ဆောင်သွားတယ်ဗျ။ တပ်ရင်းရောက်မှပြန်လွှတ်ပေးလိုက်တယ်။ ရွာထဲမှာလည်း ပြည်သူ့အိမ်တွေကို ပစ်ခတ်ဖျက်ဆီးခဲ့သေးတယ်”ဟု ၎င်းက ပြောသည်။
အထက်ပါတိုက်ခိုက်မှုတွင် DGRF တပ်ခွဲ(၂)မှ ရဲဘော်တစ်ဦး ထိခိုက်ဒဏ်ရာရခဲ့သော်လည်း မစိုးရိမ်ရဘဲ အောင်မြင်စွာဆုတ်ခွာနိုင်ခဲ့ကြောင်း အသိပေးထားသည်။
