တနင်္သာရီတိုင်း၊ လောင်းလုံးမြို့နယ်၊ မိုးလေဝသနှင့် ဇလဗေဒညွှန်ကြားရေးမှူးရုံးအနီး ကင်းလှည့်လာသည့် စစ်ကောင်စီတပ်မှယာဥ်နှစ်စီးကို မိုင်းဆွဲတိုက် ခိုက်ခဲ့ကြောင်း လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့-ပကဖ(LLPDF)မှ တာဝန်ရှိသူတစ်ဦးက ပြောသည်။
ယမန်နေ့(သြဂုတ် ၈)နံနက် ၇ နာရီခွဲခန့်က စစ်ကောင်စီလက်အောက်ခံ မိုး/ဇလရုံးအနီးကင်းလှည့်လာသော စစ်တပ်ယာဥ်နှစ်စီးကို LLPDF ရဲဘော်များက မိုင်းဆွဲတိုက်ခိုက်ခဲ့ခြင်း ဖြစ်သည်။
အဆိုပါတိုက်ခိုက်မှုအပြီး LLPDF မှရဲဘော်များ ပြန် လည်ဆုတ်ခွာခဲ့ရာ စစ်ကောင်စီတပ်မှ ရှေ့ဆက်တိုးလာပြီး ကင်းပုန်းဝပ်နေသည့် တော်လှန်ရေးရဲဘော်များနှင့် ထိပ်တိုက်တိုးကာ ၂၅ မိနစ်ခန့်ကြာတိုက်ပွဲဖြစ်ပွားခဲ့သည်ဟု LLPDF တပ်ဖွဲ့မှ တာဝန်ရှိသူတစ်ဦးက ပြောသည်။
ထို့နောက် စစ်ကောင်စီတပ်ဘက်မှ တပ်ကူအဖြစ် ကားနှစ်စီးထပ်ရောက်လာပြီး RPG အပါအဝင် လက်နက်ကြီး၊ လက်နက်ငယ်များဖြင့်ပြန်လည်ပစ်ခတ်သောကြောင့် ရဲဘော်များဆုတ်ခွာခဲ့ရသော်လည်း အထိအခိုက်မရှိခဲ့ဟု ၎င်းက ဆက်ပြောသည်။
Public Service Announcement
အထက်ပါတိုက်ခိုက်မှုများအတွင်း စစ်ကောင်စီတပ်ဘက်မှ ထိခိုက်သေဆုံးရှိနိုင်သော်လည်း အတိအကျမသိရသေးဘဲ စုံစမ်းဆဲဖြစ်ကြောင်း LLPDF ထံမှ သိရသည်။
လောင်းလုံးမြို့နယ်တွင် ပြီးခဲ့သည့် ဇူလိုင်လအတွင်း စစ်ရေးဖော်ဆောင်မှု (၁၇)ကြိမ်ရှိခဲ့ပြီး ရန်သူစစ်ကောင်စီတပ်မှ (၂၆)ဦးသေဆုံးကာ ဗိုလ်ကြီးတစ်ဦးအပါအဝင်(၃၇)ဦး ထိခိုက်ဒဏ်ရာရကြောင်း လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့(ပကဖ) LLPDF က အသိပေး ထုတ်ပြန်ထားသည်။
