နေပြည်တော်ကောင်စီနယ်မြေ၊ ပျဥ်းမနားမြို့နယ်ရှိ ဘို့မ – သံတောင်တပ်စခန်းကို PDF ပူးပေါင်းတပ်ဖွဲ့က စီးနင်းတိုက်ခိုက်ခဲ့ကြောင်း အလယ်ပိုင်းတိုင်းစစ်ဌာနချုပ်၊ နေပြည်တော်စစ်ဒေသခွဲမှ တာဝန်ရှိသူတစ်ဦးက People’s Springသို့ ပြောသည်။
စစ်ကောင်စီ၏ ဘို့မ – သံတောင်တပ်စခန်းအား PDF ပူးပေါင်းတပ်ဖွဲ့မှ သြဂုတ် ၁၀ရက် နံနက်ပိုင်းတွင် စီးနင်းခဲ့ခြင်းဖြစ်ပြီး စခန်းစီးနင်းမှုနောက်ပိုင်း တိုက်ပွဲများ ဆက်လက်ပြင်းထန်နေကြောင်း ၎င်းတာဝန်ရှိသူက ဆက်ပြောသည်။
“ပျဉ်းမနားနယ် ဘို့မ-သံတောင်၊ နန်းလွင်ဆန်း၊ ရေပူတောင်မြင့်တစ်လျှောက် သြဂုတ် ၁၀ ရက်နေ့ကစ၍ PDF ပူးပေါင်တပ်ဖွဲ့နှင့် စကစတို့ကြား တိုက်ပွဲပြင်းထန်နေပါတယ်”ဟု အလယ်ပိုင်းတိုင်းစစ်ဌာနချုပ်၊ နေပြည်တော်စစ်ဒေသခွဲ(ပြည်သူ့ကာကွယ်ရေးတပ် မတော်)မှ တာဝန်ရှိသူတစ်ဦးက ပြောသည်။
ဘို့မ – သံတောင်စခန်းစီးနင်းမှုတွင် စစ်ကောင်စီတပ်မှ ထိခိုက်သေဆုံးမှုများရှိကာ လက်နက်အချို့သိမ်းဆည်းရရှိမှုရှိကြောင်း စုံစမ်းသိရသော်လည်း စစ်တပ်ဘက်မှ ထိခိုက်သေဆုံးဦးရေအား အတိအကျမသိရသေးပေ။
Public Service Announcement
အဆိုပါ စစ်တပ်စခန်းစီးနင်းခံရပြီးနောက် သြဂုတ် ၁၁ရက်တွင်လည်း တပ်ကူလာသော စစ်ကောင်စီတပ်များနှင့် PDF ပူးပေါင်းတပ်များကြား ထိတွေ့တိုက်ပွဲထပ်မံဖြစ်ပွားခဲ့ရာ စစ်ကောင်စီဘက်မှ လေကြောင်းပစ်ကူပေးခဲ့ရာ ပြည်သူ့နေအိမ်အချို့ ထိခိုက်ပျက်စီးသည့်အပြင် ဒေသခံပြည်သူအများအပြား ဘေးလွတ်ရာပြေးနေကြရကြောင်း စုံစမ်းသိရသည်။
