ကရင်အမျိုးသားအစည်းအရုံး(KNU) တောင်ငူခရိုင်တပ်မဟာ(၂)နယ်မြေအတွင်း၌ ရဲသင်တန်းဆင်းပွဲတရပ် ပြုလုပ်ခဲ့ကြောင်း KNU တပ်မဟာ(၂)က ယနေ့ သတင်းထုတ်ပြန်သည်။
အဆိုပါ သင်တန်းဆင်းပွဲကို ဩဂုတ် ၁၅ရက်က KNU တောင်ငူခရိုင်၏ စီမံအုပ်ချုပ်နယ်မြေတနေရာတွင် ပြုလုပ်ခဲ့ခြင်းဖြစ်ပြီး သင်တန်းကာလ ၄၅ရက် ကြာမြင့်ခဲ့သည်ဟု အသိပေးသည်။
“ ကျွန်တော်တို့ ကော်သူးလေ တောင်ငူခရိုင်ထဲမှာ ကော်သူးလေတရားဥပဒေပိုပြီးစိုးမိုးမှုရှိလာဖို့အတွက်သင်တန်းလုပ်ရခြင်းဖြစ်ပါတယ်။ ကရင်အမျိုးသားရဲတပ်ဖွဲ့က ကျွန်တော်တို့ ကော်သူးလေတောင်ငူခရိုင်ထဲမှာရှိတဲ့ ပြည်သူလူထုအားလုံးကို ဥပဒေအရ တန်းတူအကာအကွယ်ပေးခြင်းအခွင့်အရေး ရရှိဖို့ကူညီဆောင်ရွက်ပေးရမှာဖြစ်ပြီး တဖက်က ပြည်သူလူထုရဲ့ အသက်အိုးအိမ်စည်းစိမ်တွေကို ဥပဒေဘောင်အတွင်းကနေ ကာကွယ်ကူညီဆောင်ရွက်ပေးကြရမှာဖြစ်ပါတယ်”ဟု တောင်ငူခရိုင် ဥက္ကဋ္ဌ ဗိုလ်မှူးချုပ် စောဒဲဖိုး၏ ပြောကြားချက်ကိုလည်း ဖော်ပြခဲ့သည်။
အဆိုပါ ရဲသင်တန်းကာလအတွင်း အခြေခံစစ်သင်တန်း၊ ကေအဲန်ယူ၏ အခြေခံလမ်းစဉ်၊ မူလမ်းစဉ်နှင့်အတူ အမှုအခင်းစုံစမ်းစစ်ဆေးရေးပညာရပ်များကို သင်ကြားခဲ့ကြောင်း ထုတ်ပြန်သည်။
Public Service Announcement
ယခုကဲ့သို့ သင်တန်းပေးခြင်းသည် သဘောတရားမျှသာ ဖြစ်ပြီး ရှေ့ဆက် တာဝန်သိ၊တာဝန်ယူ၊တာဝန်ခံသည့် ရဲတပ်သား ကောင်းများဖြစ်ရန်မှာ သင်တန်းဆင်းသည့် ရဲတပ်သားများမှ ကိုယ်တိုင် ကျင့်ကြံမှသာလျှင် ဖြစ်နိုင်မည်ဟု KNU တောင်ငူခရိုင်၏ ရဲမှူး ဒုဗိုလ်မှူးကြီးစောဂျိုးဇက်က ပြောကြားကြောင်း ဖော်ပြထားသည်။
ရဲတပ်သားများစွမ်းရည်တိုးတက်ရန် သင်တန်းများစွာလိုအပ်သေးကြောင်းနှင့် တရားဥပဒေစိုးမိုးရေးအတွက် ရဲတပ်ဖွဲ့အင်အား ထပ်မံတိုးချဲ့နိုင်ရန်လည်းလိုအပ်ကြောင်း ခရိုင်ရဲမှူးက ပြောကြားခဲ့သည်။
