သီတင်းကျွတ်ပိတ်ရက် ရှမ်းပြည်နယ်တောင်ပိုင်းသို့ ဘုရားဖူးသွားလာသည့်ယာဥ်များမှာ ဟံမြင့်မိုရ် – ရွာငံလမ်းတလျှောက်၌ စစ်ကောင်စီတပ်က ဂိတ်အများအပြားဖွင့်ကာ ငွေအတောင်းကြမ်း၍ အခက်ကြုံနေရကြောင်း သွားရောက်ခဲ့သူများက ပြောသည်။
မန္တလေးတိုင်းမှ ရှမ်းပြည်နယ်တောင်ပိုင်းသို့သွားရောက်သည့် ဟံမြင့်မိုရ်၊ ရွာငံ၊ အင်းလေး လမ်းတလျှောက်တွင် စစ်ကောင်စီတပ်က စစ်ဆေးရေးဂိတ်များ အများအပြား ဖွင့်လှစ်ကာ ငွေအတောင်းကြမ်းနေကြောင်း၊ ဘုရားဖူးယာဥ်တစ်စီးလျှင် ကျပ် သုံးသောင်းထက်မနည်း တောင်းယူနေကြောင်း သွားရောက်လည်ပတ်ခဲ့သူများက ပြောသည်။
“ ပိုက်ဆံတောင်းဂိတ်တွေအလွန်များပဲ။ ရွာငံအတက်မရောက်ခင် Xray အကျော်က ရဲ သုံးယောက် ကားတစ်စီးငွေ သုံးသောင်းတောင်းတယ်။ အမျိုးမျိုးရစ်တယ်။လိုက်ထရပ်နဲ့ ခွေးဘီးလူးကားတွေဆို အရမ်းရစ်တယ်။ တစ်စီး သုံးသောင်းပဲ ခွင်ဖန်နေကြတာ။” ဟု မန္တလေးဒေသခံတစ်ဦးက ပြောသည်။
“ ရွာငံ -ဟန်မြင့်မိုရ်လမ်းတစ်လျှောက် စစ်ဆေးရေးဂိတ်တွေအရမ်းများတယ်။ ဂိတ်ချင်းလဲ နီးတယ်။ ၁မိုင်လောက်တောင်မဝေးဘူး။ ကားလိုင်စင်ယူစစ်ပြီး ပိုက်ဆံတောင်းတယ်။” ဟု သွားရောက်ခဲ့သူ တစ်ဦးက ပြောသည်။
Public Service Announcement
သီတင်းကျွတ်ပိတ်ရက်၌ တောင်ကြီး၊ အင်းလေး၊ ကလော၊ ရွာငံ၊ ပင်းတယ အစရှိသည့်ဒေသများ၌ လာရောက်လည်ပတ်သူအများအပြား ရောက်ရှိနေကြောင်း သိရသည်။
အလားတူ ပုဂံ၊ညောင်ဦးမြို့တွင်လည်း သီတင်းကျွတ်ပိတ်ရက်၌ ဟိုတယ်နှင့်တည်းခိုခန်းအများအပြား ကြိုတင်မှာယူမှုပြည့်နေပြီး ရန်ကုန် – ပုဂံ ကားလက်မှတ်များလည်း ဝယ်ယူရခက်ခဲနေကြောင်း ခရီးသွားရန်လေ့လာနေသူများက ပြောသည်။
