တနင်္သာရီတိုင်း ထားဝယ်မြို့နယ်ရှိ စစ်ကောင်စီလက်အောက်ခံ ပကာရီရဲစခန်းကို ဝင်ရောက်စီးနင်းတိုက်ခိုက်ခဲ့ကြောင်း ထားဝယ်ခရိုင် PDF တပ်ရင်း (၁)မှ တာဝန်ရှိသူတစ်ဦးက ပြောသည်။
အောက်တိုဘာ ၁၉ ရက် နေ့လယ် ၁၂ နာရီခွဲခန့်က ထားဝယ်မြို့နယ်၊ ပကာရီရဲစခန်းကို တော်လှန်ရေးရဲဘော်များက အနီးကပ်ဝင်ရောက်ပစ်ခတ်တိုက်ခိုက်ခဲ့ခြင်း ဖြစ်သည်။
“ကျနော်တို့ တပ်ရင်းတစ်ခုထဲ သွားတိုက်ခိုက်တာဗျ။ တခြားအဖွဲ့တွေမပါဘူး။ နေ့လယ် ၁၂ခွဲလောက်။ ဒီကောင်တွေဘက်က ၃၀လောက်ရှိတယ်”ဟု ထားဝယ်ခရိုင် တပ်ရင်း(၁)မှ တာဝန်ရှိသူတစ်ဦးက People’s Spring သို့ ပြောသည်။
အဆိုပါ ပကာရီရဲစခန်းတွင် စစ်သားနှင့်ရဲ အင်အား၃၀ခန့်ရှိပြီး တိုက်ခိုက်မှုအတွင်း စစ်ကောင်စီဘက်မှ ခြောက်ဦးသေဆုံးကာ တော် လှန်ရေးတပ်ဖွဲ့ဝင်များဘက်မှ အထိအခိုက်မရှိခဲ့ကြောင်း ၎င်းက ဆက်ပြောသည်။
Public Service Announcement
၂၀၂၂ ဧပြီနှင့် စက်တင်ဘာအတွင်းကလည် ပကာရီရဲစခန်းအား PDFများ တိုက်ခိုက်ခဲ့သေးသည်။
တနင်္သာရီတိုင်းအတွင်း စစ်ကောင်စီတပ်အား တော်လှန်ရေးတပ်ဖွဲ့များက ခုခံစစ်ဆင်နွှဲလျှက်ရှိရာ အောက်တိုဘာ ၁၉ ရက် နံနက်ပိုင်းက ရေဖြူမြို့နယ်အတွင်း စစ်ကြောင်းထိုးနေသော စစ်ကောင်စီတပ်ကို ရန်ကင်းရွာအနီးတွင် ထားဝယ်ခရိုင် တပ်ရင်း(၁)နှင့် မဟာမိတ်တပ်ဖွဲ့များက နှစ်ကြိမ်တိုက်ခိုက်ခဲ့သည်။
အထက်ပါ စစ်ကောင်စီလက်အောက်ခံ ပကာရီရဲစခန်းသည် တော်လှန်ရေးတပ်ဖွဲ့များ၏ တိုက်ခိုက်မှုကို မကြာခဏရင်ဆိုင်နေရသောကြောင့် စခန်းအတွင်း ရဲများအပြင် စစ်သားများပါ လာရောက်တပ်စွဲထားရသည့် စခန်းတစ်ခုလည်း ဖြစ်သည်။
