▪︎ကန်ဒေါင်ယန်စခန်းတိုက်ပွဲဖြစ့်ပွားမှု ၁၀၂၇ စစ်ဆင်ရေးထုတ်ပြန်၊လိုင်ဇာဌာနချုပ်အနီး လက်နက်ကြီးတိုက်ခိုက်ခံရဟုအသိပေး
ကချင်ပြည်နယ်၊ မြစ်ကြီးနား-ဝိုင်းမော်လမ်းရှိ ကန်ဒေါင်ယန် စစ်ကောင်စီတပ်စခန်းကို ကချင်လွတ်လပ်ရေးတပ်မတော်(KIA)က ယနေ့မနက်တွင်စခန်းသိမ်းတိုက်ပွဲ ဆင်နွှဲနေကြောင်း ၁၀၂၇ စစ်ဆင်ရေးနှင့် စစ်ရေးသတင်းရင်းမြစ်အချို့ကပြောသည်။
၁၀၂၇ စစ်ဆင်ရေးဆင်နွှဲနေသည့် မြောက်ပိုင်း ညီနောင်သုံးဖွဲ့က ကန်ဒေါင်ယန်စခန်းတိုက်ပွဲအခြေအနေကို ယနေ့မနက်တွင် သတင်းထုတ်ပြန်ခဲ့ရာ မြစ်ကြီးနား- ဗန်းမော်ကားလမ်းမပေါ်ရှိ၊ ရန့်သူစခန်းတစ်ခုဖြစ်သော ကန်တောင်ယန် (ဂန်တောင်ယန်) စခန်းအနီးတွင် တိုက်ပွဲများပြင်းထန်လျက်ရှိသည်ဟု ဖော်ပြထားသည်။
ယနေ့နံနက် ၆နာရီခန့်ကစ၍ တိုက်ပွဲဖြစ်ပွားပြီး နံနက် ၇ နာရီခွဲ ဝန်းကျင်တွင် ပေါက်ကွဲသံ အကျယ်ကြီးကြားရအောင် ဒေသခံအချို့ကပြောသည်။
စခန်းသိမ်းတိုက်ပွဲ အသေးစိတ် အခြေအနေများကို ဆက်လက်စုံစမ်းနေဆဲဖြစ်သည်။
Public Service Announcement
ကန်ဒေါင်ယန်စခန်းသည် မြစ်ကြီးနား- ဝိုင်းမော်လမ်း နမ့်ဆန်ယန်နှင့် မလိယန် ကြား၌ တည်ရှိသည့် စစ်ကောင်စီတပ်စခန်းဖြစ်သည်။
“မလိသိမ်းပြီးပြီ။နမ့်ဆန်ယန်သိမ်းပြီးပြီဆိုတော့ မြစ်ကြီးနား ဝိုင်းမော်လမ်းထဲကတော့ကန်ဒေါင်ယန်ကျန်နေတာပေါ့။” ဟု စစ်ရေးသတင်းရင်းမြစ်က ပြောပြသည်။
ထို့အပြင် ကချင်လွတ်လပ်ရေးတပ်မတော်(KIA) ဌာနချုပ် လိုင်ဇာ ပတ်ဝန်းကျင်သို့လည်း စစ်ကောင်စီ၏ ခါယာစခန်းမှ လက်နက်ကြီးများဖြင့် ပစ်ခတ်တိုက်ခိုက်လျက်ရှိသည်ဟု၁၀၂၇ စစ်ဆင်ရေးကထုတ်ပြန်သည်။ အောက်တိုဘာ ၉ရက်က လက်နက်ကြီး ကျရောက်ပေါက်ကွဲခဲ့သည့် ရက္ခိုင့်တပ်တော် (Arakan Army) AA တပ်စခန်းများရှိရာပတ်ဝန်းကျင်နှင့် မုန်လိုင်ခတ် ပတ်ဝန်းကျင်နေရာများသို့ လက်နက်ကြီးများ ထပ်မံ ကျရောက်ပေါက်ကွဲနေသည်ဟုလည်း အသိပေးထားသည်။
KIA အနေဖြင့် ယမန်နေ့ကလည်း ရှမ်းမြောက် နမ္မတူမြို့နယ် ရှိ စစ်ကောင်စီ၏ အထိုင်စခန်းတစ်ခုကိုတိုက်ခိုက်သိမ်းပိုက်နိုင်ခဲ့သည်။ စစ်ကောင်စီတပ် အထိနာခဲ့ပြီး လက်နက်ခဲယမ်းများစွာ ရရှိထားသည်ဟု ကချင်သတင်းရင်းမြစ် အချိုက အသိပေးထားသည်။
KIA ဦးဆောင်သော မဟာမိတ်အဖွဲ့များက အောက်တိုဘာ ၂၀.တွင် စစ်ကောင်စီတပ်၏ အဓိကစခန်းတစ်ခုဖြစ်သော အောင်ဂျာ စခန်းကုန်းကို သိမ်းပိုက်ခဲ့သည်။
