ရှမ်းပြည်နယ်မြောက်ပိုင်း ကိုးကန့်ဒေသ၌ စစ်ကောင်စီတပ်က အရပ်သားနေထိုင်ရာနေရာများကို လက်နက်ကြီး၊လေကြောင်း တိုက်ခိုက်မှုများ လုပ်ဆောင်ခဲ့၍ ကလေးငယ်နှင့် အမျိုးသမီးများ အပါအဝင် ပြည်သူ ခုနစ်ဦးသေဆုံးကာ ဒဏ်ရာရသူများလည်းရှိခဲ့ကြောင်း ကိုးကန့်တပ်မတော်(MNDAA)က သတင်းထုတ်ပြန်သည်။
နိုဝင်ဘာ ၃၀ရက်က စစ်ကောင်စီ၏ တိုက်ခိုက်မှုကြောင့် အရပ်သား ပြည်သူ ထိခိုက်သေဆုံး အခြေအနေကို အသိပေး ထုတ်ပြန်ခြင်းဖြစ်သည်။
နိုဝင်ဘာလ ၃၀ ရက်တွင် စစ်ကောင်စီတပ်ဖွဲ့သည် ကိုးကန့်နန်ထင်မိန်တောင်ကုန်းစခန်းမှတစ်ဆင့် ရှီးရှမ်း ဒေသ၊ တာရွှေထန်ရွာအုပ်စု ၊ နန်ကော်ရွာကို လက်နက်ကြီးဖြင့် ပစ်ခတ်ခဲ့ရာ အရပ်သား ၂ဦးသေဆုံးကာ ၁ဦးဒဏ်ရာပြင်းထန်ခဲ့ကြောင်း၊ညဘက်တွင်လည်း ဂျက်လေယာဉ်ဖြင့် နန်ကော်ရွာကို ထပ်မံလာရောက်ဗုံးကြဲတိုက်ခိုက်ခဲ့ရာ ကားအတွင်းဝင်အိပ်နေသူ တစ်ဦး သေဆုံးကာ နေအိမ်သုံးလုံး ပျက်စီးခဲ့ကြောင်း ဖော်ပြသည်။
ထို့ပြင် နိုဝင်ဘာ၃၀ ရက် မွန်းလွဲပိုင်းတွင် စစ်ကောင်စီတပ်သည် ကိုးကန့် တုန်းရှမ်းဒေသ မန်တုံပရွာအုပ်စု ၊ ရှရှင်ကျိုင့်ရွာကိုလည်း လက်နက်ကြီးဖြင့်ပစ်ခတ်ခဲ့ရာ အရပ်သားလေးဦး သေဆုံးပြီး နှစ်ဦး ဒဏ်ရာရရှိခဲ့ကြောင်း ထုတ်ပြန်သည်။
Public Service Announcement
သေဆုံးသူများမှာ အသက်(၁၅)နှစ်အရွယ် မိန်းကလေးတစ်ဦး ၊ (၃၈)နှစ်အရွယ် အမျိုးသမီးတစ်ဦးနှင့် ၎င်း၏သားဖြစ်သူ အသက်(၁၀)နှစ် အရွယ် ကလေးငယ် ၁ဦး၊ အသက်(၂၀)နှစ်ရွယ် ယောကျ်ားလေး တစ်ဦးတို့ ဖြစ်သည်ဟု ထုတ်ပြန်သည်။
ထို့ပြင်အသက်(၁၀)နှစ် နှင့် (၁၂)နှစ်အရွယ် ကလေး နှစ်ဦးလည်း ဒဏ်ရာရခဲ့ပြီး MNDAA က ကုသပေးလျက်ရှိကြောင်း အသိပေးသည်။
စစ်ကောင်စီတပ်သည် စစ်ပွဲများဆက်တိုက်ရှုံးနိမ့်လာသောကြောင့် အရပ်သားနေအိမ် ၊ရပ်ကွက်များကို ပစ်မှတ်ထားပြီး လက်နက်ကြီးများဖြင့် ရမ်းသမ်းပစ်ခတ်လာခဲ့ကြောင်း MNDAAက ထုတ်ပြန်သည်။
(၁၀၂၇)စစ်ဆင်ရေး စတင်ချိန် အောက်တိုဘာ ၂၇ရက် မှ နိုဝင်ဘာ ၃၀ ရက်အထိ စစ်ကောင်စီ၏ လက်နက်ကြီးဖြင့် ရမ်းသမ်းပစ်ခတ်မှုကြောင့် ကိုးကန့်ဒေသ ရှိ အရပ်သား အရပ်သား ၄၇ ဦးသေဆုံးကာ ၁၆ ဦး ဒဏ်ရာရခဲ့သည်ဟု ထုတ်ပြန်သည်။ TNLA ၏ ထုတ်ပြန်ချက်တွင်လည်း စစ်ကောင်စီ၏ လက်နက်ကြီး ၊ လေကြောင်း တိုက်ခိုက်မှုကြောင့် တအာင်းဒေသ၌ အရပ်သား ၆၀ ကျော်သေဆုံးကာ ၁၀၀ ကျော် ဒဏ်ရာရရှိထားကြောင်း ဖော်ပြသည်။
