အောင်ဇေယျ/People’s Spring
ကရင်နီ(ကယား)ပြည်နယ်ရှိ လွိုင်ကော် အကျဉ်းထောင်တွင် အစာရေစာမလောက်၍ ကိုယ်ခန္ဓာချိနဲ့နေပြီး နိုင်ငံရေးအကျဉ်းသားအချို့ လေဖြတ်သကဲ့သို့ တုတ်ဆွဲခြင်းဝေဒနာ ခံစားနေရကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။
ပြီးခဲ့သည့် ၂၀၂၃ နိုဝင်ဘာလမှစ၍ လွိုင်ကော် မြို့တွင်း၌ စစ်တပ်နှင့် ကရင်နီတော်လှန်ရေးတပ်များကြား မြို့တွင်းတိုက်ပွဲ ဖြစ်ပွားခဲ့ချိန်မှစ၍ လွိုင်ကော်အကျဉ်းထောင်၌ စစ်ကောင်စီတပ်နှင့်ရဲတပ်ဖွဲ့ဝင်များ ထောင်အတွင်းဝင်ရောက် တပ်စွဲနေရာယူခဲ့သည်။
လွိုင်ကော်မြို့ခံနှင့် အခြားကရင်နီဒေသရှိ ပြည်သူများ စစ်ဘေးရှောင်ရနေရ၍ အကျဉ်းထောင်သို့ မိသားစုဝင်များက ထောင်ဝင်စာပါဆယ်ပို့ဆောင်နိုင်ခြင်း မရှိသည်မှာ အချိန်ကာလအားဖြင့် ၆ လကျော်ရှိပြီဖြစ်ကြောင်း PPNM၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။
Public Service Announcement
အကျဥ်းသားများသည် မိသားစုဝင်များက ထောင်ဝင်စာပါဆယ်ပို့ဆောင်နိုင်ခြင်းမရှိတော့သည့်အတွက် အကျဉ်းထောင်မှ ကျွေးသည့် ထမင်းနှင့်ဟင်းကိုသာ အဓိက အားပြုနေရကြောင်း သိရသည်။
လက်ရှိ အကျဉ်းထောင်အတွင်း တပ်စွဲထားသည့် စစ်ကောင်စီတပ်ဖွဲ့ဝင်များပင် ရိက္ခာကို ချွေတာစားသောက်နေရပြီး နိုင်ငံရေးအကျဉ်းသားများအပါအဝင် အကျဉ်းသားများကို ပုံမှန်ကျွေးရန် သတ်မှတ်ထားသည့် ထမင်း၊ပဲဟင်းနှင့် တပတ်စာ အသားဟင်း (၄)တုံးကိုပင် မကျွေးမွေးနိုင်တော့ဘဲ ဆန်၊ငါးပိနှင့်ဆားကြမ်းကိုသာ ကျွေးလျက်ရှိကြောင်း PPNM၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။
၆လကျော် ဆန်အကြမ်းနှင့်ငါးပိအနည်းငယ်ကိုသာ အသက်မသေအောင် အားပြုစားသောက်နေရသည့် နိုင်ငံရေးအကျဉ်းသားများသည် ဗီတာမင်ဓာတ်ပြည့်ဝသည့် အစားအသောက်များကို စားသောက်ရမှု မရှိခြင်း၊အချုပ်ခန်းပြင်ပတွင် သွားလာချိန် လွန်စွာနည်းပါးပြီး ကိုယ်လက်လှုပ်ရှားအားကစားများလုပ်ခွင့် ကန့်သတ်ခံထားရခြင်းများကြောင့် ကိုယ်ခန္ဓာများ ချိနဲ့နေပြီး နိုင်ငံရေးအကျဉ်းသား၊အကျဥ်းသူအချို့မှာ ထောင်အခေါ်တုတ် ဆွဲခြင်း (လေဖြတ်ရောဂါဝေသနာကဲ့သို့) ဝေဒနာကို ခံစားနေရကြောင်း PPNM၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။
“တုတ်ဆွဲတဲ့ဝေဒနာ ဗီတာမင်ဓါတ်ချို့တဲ့လို့ ကိုယ်အောက်ပိုင်းချိနဲ့တဲ့လူ အနည်းဆုံး ၅၀ဦးလောက်အထိရှိတယ်။ လွိုင်ကော်အကျဥ်းထောင်ထဲ အကျဥ်းသားလေးရာကျော်ရှိတော့ လေးပုံတစ်ပုံလောက်အထိဖြစ်နေတယ်။”ဟု ကိုသိုက်ထွန်းဦးက ပြောသည်။
ယခုကဲ့သို့ အကျဥ်းသားများ အစားအသောက်ပြတ်လတ်မှု အချိန်ကြာမြင့်လာပါက ကျန်းမာရေး ချို့ယွင်းပြီး အာဟာရပြတ်လတ်၍ အချိန်မရွေး သေဆုံးသွားနိုင်ကြောင်း၊ အပြည်ပြည်ဆိုင်ရာ ကြက်ခြေနီကော်မတီ (ICRC)အနေဖြင့် လွိုင်ကော်အကျဉ်းထောင်ရှိ အကျဥ်းသားများ လက်ရှိရင်ဆိုင်နေရသည့် ကျန်းမာရေးကိစ္စရပ်များနှင့် အခြေခံစားသောက်ရေးကိစ္စရပ်များကို ပို့ဆောင်ပေးနိုင်ရေး ဆောင်ရွက်ပေးနိုင်မှသာ အကျဉ်းသားများ အသက်ရှင်နိုင်မည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)က သတိပေးသည်။
လွိုင်ကော်အကျဉ်းထောင်ကို မြန်မာပြည်သူများ၊ ကုလသမဂ္ဂအဖွဲ့ဝင်နိုင်ငံများ (UN)နှင့် နိုင်ငံတကာ လူအခွင့်အရေးအဖွဲ့အစည်းများအနေဖြင့် မေ့မထားကြဘဲ အာရုံစိုက်ပေးရန်လိုအပ်နေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)မှ တိုက်တွန်းသည်။
လွိုင်ကော်အကျဥ်းထောင်တွင် မတရားဖမ်းဆီးခံထားရသူ နိုင်ငံရေးအကျဉ်းသား၊အကျဉ်းသူ(၁၁၀)ကျော် အပါအဝင် အကျဉ်းသားစုစုပေါင်း (၄၀၀)ကျော်ရှိနေကြောင်း သတင်းရရှိသည်။
ဓါတ်ပုံ-Cj
