အင်ကြင်း/People’s Spring
မန္တလေးတိုင်း၊ သပိတ်ကျင်းမြို့နယ်တွင် စစ်ကောင်စီ၏ လေကြောင်းတိုက်ခိုက်မှု ကြိုတင် ကာကွယ်နိုင်ရေး ဗုံးခိုကျင်းများတူးကြရန် ပြည်သူ့ကာကွယ်ရေးရဲဘော်များက လိုက်လံတိုက်တွန်းနေသည်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနလက်အောက်ရှိ သပိတ်ကျင်းမြို့နယ်ပြည်သူ့ကာကွယ်ရေးအဖွဲ့ (ပကဖ)ရုံးအဖွဲ့နှင့် သပိတ်ကျင်းတိုက်နယ် (ပကဖ)ရုံးအဖွဲ့ပူးပေါင်း၍ ကာကွယ်ရေးဝန်ကြီးဌာနမှ ထုတ်ပြန်ထားသော စစ်ရေးသတင်းအချက်အလက် များနှင့် ဖြစ်ပေါ်နေသော စစ်ကောင်စီ၏ လေကြောင်းတိုက်ခိုက်မှုအန္တရာယ်မှ ကြိုတင်ကာကွယ်နိုင်ရန် ဗုံးခိုကျင်းပြုလုပ်ပုံနည်းလမ်းများအား ပြည်သူလူထုများသိရှိစေရန် လက်ကမ်းစာစောင်များ ဖြန့်ဝေခဲ့ကြောင်း သပိတ်ကျင်းပကဖက အသိပေးသည်။
Public Service Announcement
“ဒီဘက်မှာတော့ စစ်ကောင်စီရဲ့လေကြောင်းတိုက်ခိုက်မှုတွေက မကြာခဏ ကြုံတွေ့နေရတယ်။ ရွာတွေရွာတွေကိုလိုက်ကြဲတာ။ မြို့နယ်ပကဖအနေနဲ့ ပြည်သူတွေကို ဗုံးခိုကျင်းတူးနည်း Step by Step သွားဖို့လမ်းညွှန်ထားတဲ့ဟာပေါ့။ ဝန်ကြီးဌာနက လမ်းညွှန်ထားတဲ့ဟာကို လက်ကမ်းစာစောင်တွေနဲ့ ပြည်သူတွေတူးကြဖို့ လိုက်ပြီးနှိုးဆော်တာပါ။”ဟု သပိတ်ကျင်းပကဖတာဝန်ခံ ကိုနဂါးနီက ပြောသည်။
သပိတ်ကျင်းမြို့ကို ပြီးခဲ့သည့်သြဂုတ် ၂၅ရက်တွင် ပြည်သူ့ကာကွယ်ရေးပူးပေါင်းတပ်များက တိုက်ခိုက်သိမ်းပိုက်ခဲ့သည်။
သပိတ်ကျင်းမြို့နယ်အတွင်းရှိ စစ်ကောင်စီစခန်းအများအပြားအား ပြည်သူ့ကာကွယ်ရေးပူးပေါင်းတပ်များက တိုက်ခိုက်သိမ်းပိုက်ပြီးနောက် စစ်ကောင်စီက လေကြောင်းတိုက်ခိုက်မှု ၇ ကြိမ်ထက်မနည်း ပြုလုပ်ခဲ့ပြီး ဒေသခံပြည်သူ ၁၂ ဦးထက်မနည်း သေဆုံးခဲ့ကြောင်း ကိုနဂါးနီက ပြောသည်။
