ရောင်နီ/People’s Spring
ရန်ကုန်မြို့၌ အလှည့်ကျမီးပေးစနစ်ကို တစ်ချိန်ထပ်တိုးမည်ဖြစ်ပြီး နံနက် ၅နာရီ အဆိုင်းကိုထပ်တိုးခြင်းဖြစ်သောကြောင့် အဆင်မပြေမှုများရှိကြောင်း မြို့ပြနေပြည်သူများက ပြောသည်။
ရန်ကုန်မြို့ရှိ ခရိုင်လေးခုတွင် ယခင်က နံနက် ၉နာရီမှ စတင်၍ လေးနာရီခြားတစ်ကြိမ် အလှည့်ကျမီးပေးစနစ်ဖြင့် မီးပေးနေခြင်းဖြစ်သည်။ လက်ရှိတွင် မီးပေးမှုကို နံနက် ၅နာရီမှစတင်မည်ဖြစ်သည်။
Public Service Announcement
“မနက် ၅ – ၉ပျက်တာ တအားဒုက္ခရောက်တာနော်။ အလုပ်တွေများလို့ နောက်ကျမှအိပ်တဲ့နေ့ဆို အိပ်နေရင်း မနက်အစောကြီး ထပျက်တော့ဘယ်လိုမှ အိပ်ရေးမဝတော့ဘူး။ အိပ်ရေးမဝတော့ တစ်နေကုန်ခေါင်းမကြည် Productivity တွေပါကျရော။ နွေတောင်မရောက်သေးဘူး ၊ဘဝတွေပျက်နေတာ။ အဲ့လောက်ဖျက်လည်း မီတာခကမလျော့ဘူး။ ဘယ်လိုကောင်းအောင်စီမံခန့်ခွဲမယ်မစဉ်းစား ဒါလောက်ပဲတတ်တဲ့ဟာတွေ အောက်လည်းမဆင်းပေးနိုင်အပေါ်လည်းထပ်မတက်နိုင် “ဟု ရန်ကုန်မြို့နေပြည်သူတစ်ဦးက ပြောသည်။
နံနက် ၅ နာရီ အဆိုင်းမီးဖြတ်ခြင်းသည် တစ်ရက်စာ ထမင်း၊ ဟင်းချက်ရသည့် အိမ်ရှင်မများအတွက် အဆင်မပြေမှုများကြောင်း အမျိုးသမီးအချို့ကပြောသည်။
ခရိုင်လေးခုအနက် အနောင်ပိုင်းခရိုင်တစ်ခုသာ တစ်ရက်လျှင် သုံးဆိုင်း မီးပျက်ခြင်းဖြစ်ပြီး ကျန်ခရိုင်သုံးခုသည် လေးဆိုင်းခွဲ၍ မီးပျက်မည်ဖြစ်သည်။
“အလှည့်ကျဆိုတာ မြင်ကောင်းအောင်သာ ပြောတာပါ။သူတို့ထုတ်ပြန်ချက်ထဲ အဲ့လို တိတိကျကျ မီးပေးမီးဖျက်တယ်ဆိုတာ မရှိခဲ့ပါဘူး ။ကြေငြာချက်သာ ထုတ်တာပါ။ လာချိန် ပြည့်ဝစွာမပေးနိုင် ပျက်ချိန်ပိုပျက်မည်လို့ ရေးလို့မကောင်းလို့ဆိုတာ သိပါတယ်”ဟု ရန်ကုန်မြို့နေ ပြည်သူတစ်ဦးက ပြောသည်။
စစ်ကောင်စီလက်အောက်ခံ လျှပ်စစ်ဝန်ကြီးဌာနသည် စက်တင်ဘာမှစတင်၍ မီတာခများကို တိုးမြှင့်ကောက်ခံ လျက်ရှိသည်။
ယခင် ဒီချုပ်အစိုးရလက်ထပ်တွင် လျှပ်စစ်မီးကို ပုံမှန်ပေးနိုင်သည့်ပြင် ပြည်သူများကို မီတာခ ကင်းလွတ်ခွင့်များလည်း ပေးခဲ့သည်။
