ဇေအောင်/People’s Spring
စစ်ကိုင်းတိုင်း၊ ခင်ဦးမြို့နယ်၊ မကျီးတုံပျူစောထီးရွာအနီး လမ်းမှားရောက်လာသည့် PDF ရဲဘော်နှစ်ဦး သတ်ဖြတ်ခံလိုက်ရကြောင်း သတင်းရရှိသည်။
ယမန်နေ့(စက်တင်ဘာ ၂၉ရက်) နေ့လယ် ၂ နာရီခန့်က ပြည်သူ့ကာကွယ်ရေးတပ်ဖွဲ့တစ်ဖွဲ့မှ PDF ရဲဘော်နှစ်ဦးသည် ဆိုင်ကယ်တစ်စီးဖြင့်ထွက်လာစဥ် မကျီးတုံပျူစောထီးကျေးရွာကို လမ်းမှားဝင်ခဲ့ရာမှ ပျူစောထီးများ၏ သတ်ဖြတ်မှုကြောင့် ရဲဘော်နှစ်ဦး ကျဆုံးခဲ့ရကြောင်း ဒေသခံကာကွယ်ရေးရဲဘော်အချို့က ပြောသည်။
Public Service Announcement
“လမ်းမှားဝင်သွားတာ။ ကပ်လွန်းအားကြီးသွားတယ်။ ရွာထိပ်အစောင့်တွေနဲ့တင်ဖြစ်တာ။ ရွာထဲထိမရောက်ဘူး။”ဟု ခင်ဦးမြို့နယ်သတင်းမှန်ပြန်ကြားရေးအဖွဲ့ဝင်တစ်ဦးက ပြောသည်။
ကျဆုံးရဲဘော်နှစ်ဦးသည် မည်သည့်အဖွဲ့ကဆိုသည်ကိုမူ မသိရသေးပေ။
ရဲဘော်နှစ်ဦးပါလာသည့် Type -81 သေနတ် ၁ လက်၊ ကျည်အိမ် ၂ ခု၊ ကျည် ၄၅ တောင့်၊ ဆိုင်ကယ် ၁ စီး၊ PDF ဘတ်တံဆိပ် ၂ စုံ တို့ကို သိမ်းဆည်းရမိကြောင်း စစ်ကောင်စီ၏ တယ်လီဂရန်ချန်နယ်များတွင် ရေးသားထားသည်။
မကျီးတုံရွာသည် ပျူစောထီးအင်အားကောင်းရာရွာတစ်ရွာဖြစ်ပြီး ယမန်နှစ် ၂၀၂၃ နိုဝင်ဘာအတွင်းက PDF များက ဝင်ရောက်တိုက်ခိုက်သိမ်းပိုက်ခဲ့ပြီးနောက် မကြာခင် တပ်ပြန်စွဲခဲ့သည်။
ခင်ဦးမြို့နယ်တွင် မကျီးတုံရွာအပြင် မဒေါင်းလှရွာ၊ ပျဥ်ထောင်ရွာ၊ ရွာသစ်ကုန်းရွာနှင့် မူးတိမ်ချောင်းရွာ စသည့် နေရာ ၅ ခု၌ ပျူစောထီးများဖြင့် အထိုင်ချ တပ်စွဲထားသည်။
