နေရပ်ပြန်လာ​သော ဆိုင်းတောင်မှ ​ဒေသခံများကို စစ်ပွဲဇုန်ဖြစ်၍ ​ခေတ္တတိမ်း​ရှောင်​​​ပေးရန် KIA အသိပေး

ရွှေပြည်စိုး/People’s Spring

ဖားကန့်မြို့နယ်မှဆိုင်းတောင်ရွာမှ စစ်​ဘေး​ရှောင်​နေရာမှ ပြန်​ရောက်လာ​​သောပြည်သူများကို စစ်ပွဲဧရိယာအတွင်းဖြစ်​နေ၍ ဒေသခံများ ဘေးလွတ်ရာသို့ ယာယီထွက်ခွာပေးရန် KIA ကအသိပေးထားကြောင်း သတင်းရရှိသည်။

“ပြီးခဲ့တဲ့တပတ်က တိုက်ပွဲတွေပြင်းထန်စဉ်က ရှောင်ခဲ့ကြသေးတယ်။ နောက်ပိုင်းပြန်ဝင်လာတယ်။ တိုက်ပွဲကမပြီးသေးဘူးဆိုတော့ KIA က သတိပေးတာ။ ဒီ‌နေရာဟာ စစ်ပွဲဇုန်မို့လို့ ဘေးကင်းအောင် သတိပေးတာလို့ပြောပါတယ်”ဟု ဒေသခံတဦးကပြောသည်။

ဆိုင်းတောင်ရွာတွင် စက်တင်ဘာ ၇ရက်မှစ၍ တိုက်ပွဲများ ဖြစ်ပွားခဲ့ပြီး KIA နှင့် KPDFတို့က ဆိုင်းတောင် ရဲစခန်းကို စက်တင်ဘာ ၁၂ရက်တွင် သိမ်းပိုက်ခဲ့သည်။ ထို့နောက်စစ်ကောင်စီက ဒေသခံများ၏နေအိမ်များမီးရှို့ခြင်း၊လေကြောင်းတိုက်ခိုက်ခြင်းများ ပြုလုပ်ခဲ့သည်။

Public Service Announcement

စစ်ကောင်စီက ဆိုင်းတောင်ရွာအတွင်းရှိ Lucky Man ဟိုတယ် နှင့် ယူမာ ကျောက်စိမ်းရုံး၌ တပ်စွဲထားပြီး ယင်းနှစ်နေရာတွင် စက်တင်ဘာလ ၂၅ရက်အထိ တိုက်ပွဲများ ပြင်းထန်ခဲ့သည်။စစ်​ကောင်စီက Lucky Men ဟိုတယ်တွင်ဖမ်းဆီးထား​​သော ပြည်သူအများစုမှာလွတ်​မြောက်သွားပြီဖြစ်​ကြောင်းလည်းသိရသည်။

စက်တင်ဘာ လကုန်ပိုင်းနောက်ပိုင်းတွင် တိုက်ပွဲ​ခေတ္တငြိမ်သက်သွားရာ စစ်ရှောင်ခဲ့သောဒေသခံအချို့ ပြန် လည်ဝင်ရောက်လာခဲ့သည်။

ထိုသို့ပြန်လာ​သော​ဒေသခံများကို စစ်ပွဲဇုန် ဖြစ်​နေ​သေး၍ ​ခေတ္တတိမ်း​ရှောင်ရန် KIA တပ်ဖွဲ့ဝင်အချို့ကအသိ​ပေးခြင်းဖြစ်​ကြောင်းသိရသည်။

ဆိုင်တောင်ရွာအတွင်းရှိ ရပ်ကွက်၁၊၂၊၃၊၄တို့မှ ဒေသခံပြည်သူများ တိန်းရှောင်ကြရန် အသိ​ပေးခြင်းဖြစ်သည်ဟုဒေသခံတဦးကပြောသည်။

KIA နှင့်ပူး​ပေါင်းတပ်က စစ်ကောင်စီတပ်စခန်းများကို ထိုးစစ်ဆင်တိုက်ခိုက်လျင် စစ်ကောင်စီက လေကြောင်းမှတိုက်ခိုက်လာနိုင်သောကြောင့် ဒေသခံများ၏လုံခြုံရေးအတွက် ကြိုတင်သတိပေးခြင်းဖြစ်နိုင်​ကြောင်း KIAနှင့် နီးစပ်သူအချို့ကပြောသည်။

KIA နှင့် ပူးပေါင်းတပ်များသည် စက်တင်ဘာ လကုန်ပိုင်းမှစ၍ ကချင်ပြည်နယ်အတွင်း ထိုးစစ်အရှိန်မြှင့်လာရာ စက်တင်ဘာ ၂၉ ရက်တွင် ​ချီ​ဖွေမြို့ကို သိမ်းပိုက်ထိန်းချုပ်နိုင်ခဲ့ပြီး အောက်တိုဘာ ၂ရက်တွင် ဆော့​လော်မြို့ကို ​ထပ်မံသိမ်းယူခဲ့သည်။ ချီ‌ ဖွေမြို့သိမ်းတိုက်ပွဲအတွင်း စစ်ကောင်စီထံမှ လက်နက်ခဲယမ်းအများအပြား သိမ်းဆည်းနိုင်ခဲ့သည်။