အကျဉ်းထောင်များ၌ အကျဥ်းသားများ​၏ ကိုယ်ရေးအချက်အလက်များ ထပ်ကောက်နေ

ဇေအောင်/People’s Spring

အကျဉ်းထောင်များ၌ အကျဥ်းသားများ​၏ ကိုယ်ရေးအချက်အလက်များ ထပ်မံကောက်ယူနေ၍ အကျဥ်းသားများစိုးရိမ်နေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။

မြန်မာနိုင်ငံတစ်ဝန်းရှိ အကျဉ်းထောင်များတွင် ၂၀၂၄ စက်တင်ဘာကစ၍ အကျဉ်းသား၊အကျဥ်းသူများ၏ အချက်အလက်အချို့ကို အကျဥ်းဦးစီးဝန်ထမ်းများက မေးမြန်းနေကြောင်း၊ ထောင်ရောက်ချိန်မှစ၍ ထောင်အဝင်၌ ကိုယ်ရေးအချက်အလက် ၃၂ချက်ကို ကောက်ထားပြီးဖြစ်၍ ထပ်မံကောက်ယူမှုအပေါ် အကျဉ်းသားများ စိုးရိမ်ပူပန်နေကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။

“ရှိပြီးသားအချက်အလက်တွေကို ထပ်တောင်းတဲ့အခါမှာ လက်ရှိအထဲက လူတွေရဲ့ စိုးရိမ်စိတ်ကိုပဲ တဆင့်ခံပြီးမှ ပြန်ပြောရမယ်ဆိုရင်တော့ သူတို့ရဲ့အချက်အလက်ဒေတာတွေကို အသုံးပြုပြီးတော့ ရွေးကောက်ပွဲ၊ အခြားပြည်သူ့ထောက်ခံပွဲတွေမှာ နိုင်ငံရေးအကျိုးအမြတ်ရရှိရေး အသုံးပြုသွားမှာစိုးရိမ်နေကြရတယ်။ တချို့တွေကျတော့လည်း စစ်မှုထမ်းထဲကို အကျုံးဝင်မယ့်သူတွေ သိချင်လို့ကောက်တယ်ဆိုတဲ့ယူဆချက်လည်းရှိနေတယ်။”ဟု ကိုသိုက်ထွန်းဦးက ပြောသည်။

Public Service Announcement

အကျဉ်းဦးစီးဝန်ထမ်းများ၏ မေးမြန်းမှုများတွင် အမည်၊ အဘအမည်၊ အသက်၊ မှတ်ပုံတင်နံပါတ်၊ နေရပ်လိပ်စာနှင့် အိမ်ထောင်ရှိ၊မရှိကို အဓိက မေးမြန်းနေပြီး အကျဉ်းထောင်တစ်ခုနှင့် တစ်ခုတွင် မေးမြန်း‌မှုများ မတူညီဟု ဆိုသည်။

လက်ရှိတွင် စစ်ကောင်စီက ရွေးကောက်ပွဲကျင်းပနိုင်ရန် သန်းခေါင်စာရင်းကောက်ယူနေ၍ အကျဉ်းထောင်အတွင်းရှိ အကျဉ်းသားများသည် မဲပေးခွင့်မရှိသော်လည်း မဲမသမာမှုများ ပြုလုပ်မည်ကိုလည်းကောင်း၊ စစ်ရေးအရ အတင်းအဓမ္မ စစ်မှုထမ်းခိုင်းခြင်းများ ဖြစ်ပေါ်လာမည်ကိုလည်းကောင်း အသီးသီး စိုးရိမ်နေကြောင်း PPNMက အသိပေးသည်။

အချို့အကျဉ်းထောင်များတွင် ကောက်ယူမှု မရှိသေးသော်လည်း မြန်မာတစ်နိုင်ငံလုံးရှိ အကျဉ်းထောင်များတွင် အကျဉ်းသားအားလုံးထံမှ ကောက်ယူမည်ဟု သိရှိထားကြောင်း PPNMက ထပ်မံ အသိပေးထားသည်။