အိမ်သွင်/People’s Spring
ရခိုင်ပြည်နယ်၊ မောင်တောမြို့နယ်အတွင်းရှိ စစ်ဘေးရှောင်များခိုလှုံနေသည့်ဘုန်းကြီးကျောင်းကို နိုဝင်ဘာ၂ရက် ညပိုင်းက စစ်ကောင်စီလေကြောင်းမှ ဗုံးကြဲတိုက်ခိုက်ရာ ဒေသခံလေးဦးသေဆုံးပြီး နှစ်ဦးဒဏ်ရာရရှိခဲ့သည်။
မောင်တောမြို့နယ်၊ ပြားသားကျေးရွာဘုန်းကြီး ကျောင်းကို ည၇နာရီ ၁၃မိနစ်နှင့် ၇နာရီ ၃၀မိနစ် တွင် ဂျက်ဖိုက်တာဖြင့် နှစ်ကြိမ်ဗုံးကြဲတိုက်ခိုက်ခြင်းဖြစ်သည်။
” တိုက်ပွဲတွေကြောင့် ဒေသခံတွေလာခိုလှုံနေတဲ့ နေရာကို တည့်တည့်ပစ်တာ။ တိုက်ပွဲနေရာနဲ့ဆို အဝေးကြီးပါဗျ။ နာရေးတောင်ဖြောင့်ဖြောင့်မလုပ်ရဲပါ”ဟု မောင်တောမြို့တွင် လက်ရှိနေထိုင်သူနှင့် နီးစပ်သည့် ဒေသခံတစ်ဦးကပြောသည်။
Public Service Announcement
သေဆုံးသူများမှာ အသက် (၅၀)ကျော် အရွယ်များဖြစ်သည့် ဦးရွှေကျော်၊ ဦးမောင်သန်းနှင့် ဒေါ်မစောရီ၊ အသက်(၁၇)နှစ်အရွယ် မောင် ထွန်းထွန်းဝင်းတို့ ဖြစ်သည်။ ၎င်းတို့သည် မောင်တောမြို့ပေါ်ရပ်ကွက်များမှ လာရောက်တိမ်းရှောင်နေကြသူများဖြစ်သည်။
ဒဏ်ရာရသူနှစ်ဦးအနက် သက်တော် (၇၂)နှစ်အရွယ် သံဃာတော်တစ်ပါးပါဝင်သည်။
မောင်တောမြို့နယ်တွင် ဖုန်းနှင့် အင်တာနက်လိုင်းများပြတ်တောက်နေပြီး တိုက်ပွဲပြင်းထန်နေချိန်အတွင်း ဒေသခံများသည် အခက်အခဲများကြုံတွေ့နေသည်။ မောင်တောမြို့သိမ်းတိုက်ပွဲကို အာရက္ခတပ်တော်(AA)က သြဂုတ်၄ ရက်မှစတင်ခဲ့ခြင်းဖြစ်ပြီး စခန်းအများအပြားသိမ်းယူထားနိုင်သော်လည်း စစ်ကောင်စီက နောက်ဆုံးကျန်ရှိနေသည့် နယ်ခြားစောင့်ရဲ ဌာနချုပ် နခခ (၅)မှ ခုခံနေသည်။ ထိုနေရာကို စစ်ကောင်စီက လေကြောင်းမှတစ်ဆင့် လက်နက်၊ လူ၊ ရိက္ခာများ ပို့နေပြီး မြို့ပေါ်ရပ်ကွက်များကို လေကြောင်းမှလည်းတိုက်ခိုက်နေသည်။
အောက်တိုဘာ ၂၁ရက်က မောင်တောမြို့နယ်၊ ဖားဝပ်ချောင်းကျေးရွာကို စစ်ကောင်စီက ဂျက်ဖိုက်တာဖြင့် ပေါင် ၅၀၀ ဗုံးကြဲချရာ အရပ်သားငါးဦးသေဆုံးပြီး ၁၄ဦး ဒဏ်ရာရခဲ့သည်။
စစ်ကောင်စီသည် အောက်တိုဘာလကုန်က သံတွဲ၊ အမ်း၊တောင်ကုတ်မြို့နယ်တို့ကိုလည်း လေကြောင်းမှတိုက်ခိုက်ရာ အရပ်သား ၂၀ဦးထက်မနည်း သေဆုံးခဲ့သည်။
စစ်ရှုံးနေသည့် စစ်ကောင်စီသည် စစ်ရေးပစ်မှတ်မဟုတ်သည့် အရပ်သားနေထိုင်ရာကျေးရွာများကို လေကြောင်းမှ ဗုံးကြဲတိုက်ခိုက်နေကြောင်း အာရက္ခတပ်တော်(AA)က သတင်းထုတ်ပြန်ထားသည်။
