ပခုက္ကူအနောက်မြောက်ပိုင်း၌ စစ်တပ်က စစ်ကြောင်းထိုးဖမ်းဆီးနေ၍ ပြည်သူများသတိပြုရန် တော်လှန်ရေးတပ် ထုတ်ပြန်

ဟာနာဆန်/People’s Spring

မကွေးတိုင်း၊ ပခုက္ကူမြို့နယ် အနောက်မြောက် ပိုင်းတွင် စစ်ကောင်စီတပ် စစ်ကြောင်းထိုးနေပြီး ပြည်သူများအား လူသားဒိုင်းအဖြစ် ဖမ်းဆီး ခေါ်ဆောင်နေ၍ သတိပြုသွားလာရန် COBRA ONE Pakokku အဖွဲ့က သတိပေးသည်။

ယမန်နေ့(နိုဝင်ဘာ ၂ ရက်) နံနက် ၅နာရီခန့်က ပခုက္ကူမြို့နယ် အနောက်မြောက်ပိုင်းသို့ စစ်ကြောင်းထိုးလာသော အင်အား ၁၀၀ခန့်ပါ စစ်ကောင်စီတပ်စစ်ကြောင်းအား အင်ပင်ကျေးရွာနှင့် ကိုးပင်ရွာကြားရှိ ရေနံချက်စက်ရုံအနီးတွင် မဟာမိတ်တပ်ဖွဲ့များနှင့် ပူးပေါင်းကာ ရော့ကတ် သုံးလုံးဖြင့် ပစ်ခတ်တိုက်ခိုက်ခဲ့ကြောင်း COBRA ONE Pakokkuအဖွဲ့၏ ခေါင်းဆောင် ဗိုလ်မြွေဟောက်က ပြောသည်။

ထိခိုက်မှုကိုမူ မသိရသေးသော်လည်းအဆိုပါ စစ်ကြောင်းမှာ ဆက်လက်စစ်ကြောင်းထိုးနိုင်ခြင်းမရှိတော့ဘဲ ရေနံချက်စက်ရုံအတွင်းဝင်ရောက်သွားကြောင်း ၎င်းက ပြောသည်။

Public Service Announcement

“မီးရှို့တာတော့ မရှိသေးဘူး။ ပြည်သူလေးငါးဦးလောက်တော့ အဖမ်းခံရတယ်။ သူတို့ခရီးရောက်တော့ ပြန်လွှတ်ပေးလိုက်တယ်။”ဟု ဗိုလ်မြွေဟောက်က ပြောသည်။

အဆိုပါ စစ်ကြောင်းသည် ယနေ့အထိ ရေနံချက်စက်ရုံအတွင်း ဆက်ရှိနေ၍ စစ်ကြောင်း ဆက်ထိုးနိုင်သောကြောင့် ပြည်သူများအနေဖြင့် သတိပြု သွားလာကြရန် COBRA ONE Pakokku အဖွဲ့က သတိပေးသည်။

ပြီးခဲ့သည့် အောက်တိုဘာ ၁၇ ရက်ကလည်း ပခုက္ကူမြို့နယ်၊ ကိုင်းကျေးရွာသို့ စစ်ကောင်စီစစ်ကြောင်းထိုးဝင်ရောက်ပြီး ကိုယ်ဝန်ဆောင် အမျိုးသမီးတစ်ဦးနှင့် ရပ်ကျေးပကဖအဖွဲ့ဝင်နှစ်ဦးကို သတ်ဖြတ်သွားခဲ့သေးသည်။