အာဏာသိမ်း​ခေါင်း​ဆောင်တရုတ်မှပြန်လာပြီး နောက်​​​နေ့တွင် စစ်​ကောင်စီက မိုးကုတ်မြို့ကိုဗုံးကြဲ

▪︎ကနဦးသတင်းအရ ​ဒေသခံပြည်သူ ၃ ဦး​သေဆုံးပြီး ၄ ဦးဒဏ်ရာရ

အိမ်သွင်/People’s Spring

စစ်ရေးအခြေအ‌နေငြိမ်သက်နေပြီး ဒေသခံများ ပြန်လည်အခြေချနေထိုင်နေသည့် မိုးကုတ်မြို့ကို စစ်ကောင်စီက ယမန်နေ့(နိုဝင်ဘာလ ၁၁ရက်) ညတွင်လေကြောင်းမှ ဗုံးကြဲတိုက်ခိုက်သောကြောင့် ​ဒေသခံပြည်သူများသေဆုံး ဒဏ်ရာရမှုနှင့် နေအိမ်ပျက်စီးမှုမှုများ ရှိခဲ့သည်။

အာဏာသိမ်း​​ခေါင်း​ဆောင် တရုတ်နိုင်ငံမှ ပြန်လာပြီး​နောက်​နေ့ တွင် စစ်​ကောင်စီက မိုးကုတ်မြို့ ၊လယ်ဦးရပ်ကွက်အပါအဝင် မြို့အရှေ့ပိုင်းနှင့်အနောက်ပိုင်း သုံးနေရာကို ည ၁၁နာရီ ဝန်းကျင်တွင် ဗုံးသုံးလုံးကြဲချတိုက်ခိုက်ခြင်းဟု မြို့ခံအချို့ကပြောသည်။

“လယ်ဦးနဲ့ လူးထဘက်ကို ချတာ။ကျောက်အရောင်းအဝယ်လုပ်တဲ့ နေရာတွေကိုပါ ချတာ။ သိရသလောက် သုံးဦးသေဆုံးတယ်။ ဒဏ်ရာရတာ လေးဦး။ အိမ်တွေပျက်စီးတာများတယ်။ ဒါပေမယ့် ဆက်သွယ်ရေးပြဿနာကြောင့် ကျတော်တို့မှာက တဆင့်စကားနဲ့ လိုက်မေးနေရတယ်” ဟုမြို့ခံတစ်ဦးကပြောသည်။

Public Service Announcement

ဗုံးကြဲခံရမှု​ကြောင့် ​နေအိမ် အ​ဆောက်အအုံအချို့ပျက်စီး​နေသည်ကိုလည်း ​ဒေသခံများကလူမှုကွန်ယက်တင်ထား​သောသတင်းဓါတ်ပုံများ၌ ​တွေ့ရသည်။

မိုးကုတ်မြို့ကို တအာင်းအမျိုးသားလွတ် မြောက်ရေးတပ်မတော်(TNLA) ၊ မိုးကုတ်PDF၊ မန္တ​လေး PDFနှင့် မဟာမိတ်ပူးပေါင်းတပ်များက ပြီးခဲ့သည့် ဇွန်လ ၂၅ရက်တွင် စတင်တိုက်ခိုက်ခဲ့ပြီး ဇူလိုင်လ ၂၄ရက်တွင်အပြီးသတ်သိမ်းပိုက်ခဲ့သည်။ မိုးကုတ်မြို့နယ်ပြည်သူ့အုပ်ချုပ်ရေးအဖွဲ့နှင့် TNLA တို့က မြို့နယ်အုပ်ချုပ်ရေးနှင့် ပြန်လည်ထူထောင်ရေးကိုဆောင်ရွက်နေသည်။

TNLA က တပိုင်တနိုင်​ ကျောက်မျက်ရတနာတူး​ဖော်မှုများကို ခွင့်ပြု​ပေးပြီး ၊စစ်တပ်နှင့်နီးစပ်​သောလုပ်ငန်းရှင်များ ၊ကုမ္ပဏီများ၏ လုပ်ကွက်ကြီးများကိုမူပိတ်သိမ်းခဲ့သည်။ ​ကျောက်မျက်လုပ်ကွက်ကြီးများကို TNLA က မူဝါဒချမှတ်ပြီးမှစနစ်တကျလုပ်ကိုင်ခွင့်ပြုမည်ဟု​ပြောကြားထားသည်။

“မြို့မှာပြန်စည်ကားပြီး ပုံမှန်လည်ပတ်အောင်စောင့်ပြီးမှ ပြန်ဖျက်ဆီးချင်တာဖြစ်နိုင်တယ်။ နောက်ပြီးတရုတ်နဲ့ ဘာတွေညှိနှိုင်းခဲ့လည်းမှမသိဘူး။ ဒီနေရာက တကယ့်အဖိုးတန်နေရာဆိုတော့ စစ်ကောင်စီဘက်က မစားရတဲ့အမဲသဲနဲ့ပက်ပြီး ယုတ်မာမှာပါ။ တော်လှန်ရေးအဖွဲ့တွေကို မေးခွန်းထုတ်လိုက်တာပါပဲ” ဟု မိုးကုတ်မြို့ခံတစ်ဦးကပြောသည်။

စစ်​ကောင်စီဝါဒဖြန့် တယ်လီဂရန်ချန်နယ်တစ်ခုဖြစ်​သော​ကျော်စိုးဦး၏ People’s Media တွင် နိုဝင်ဘာ ၈ ရက်၌ မိုးကုတ်မြို့တွင် ​ကျောက်မျက်တူး​ဖော်​မှုကို အများအပြားတူး​ဖော်​နေ​ကြောင်း​ဖော်ပြပြီး မှတ်ချက်များတွင်ဗုံးကြဲရန် လှုံ့​ဆော်​ရေးသားခဲ့ကြသည်ကို​တွေ့ရသည်။ဗုံးကြဲပြီး​နောက်လည်း ​တော်လှန်​ရေး တပ်ဖွဲ့များစုဖွဲ့ရာ​နေရာကိုဗုံးကြဲခြင်းဖြစ်သည်ဟု ဝါဒဖြန့်​ရေးသား​နေကြသည်။

တိုက်ပွဲများဖြစ်ပွားစဉ်ကတိမ်းရှောင်ခဲ့သည့်ဒေသခံများသည် မိုးကုတ်မြို့၌ပြန်လည်အခြေချလာပြီး စည်ကားလာချိန်တွင်စစ်ကောင်စီက လေကြောင်းမှတကြော့ပြန်ဗုံးကြဲတိုက်ခိုက်ခြင်းဖြစ်၍ မြို့ခံများစိတ်ပူနေကြသည်။

အာဏာသိမ်းခေါင်းဆောင်ဗိုလ်ချုပ်မှူးကြီးမင်းအောင်လှိုင်သည် နိုဝင်ဘာလ၁၀ရက်နေ့တွင် တရုတ်နိုင်ငံမှ ​နေပြည်​တော်သို့ပြန်ရောက်ရှိလာပြီး နောက်တစ်နေ့၌ စစ်ကောင်စီက မိုးကုတ်မြို့ကိုဗုံးကြဲတိုက်ခိုက်ခြင်းဖြစ်သည်။

မိုးကုတ်မြို့ဗုံးကြဲတိုက်ခိုက်မှုနှင့်ပတ်သက်၍ TNLAနှင့် မိုးကုတ်ဗျူဟာက သတင်းမထုတ်ပြန်သေးပေ။