အင်ကြင်း/People’s Spring
မန္တလေးမြို့လယ်နေ အိမ်ထောင်စု ၂ဝ ခန့်ကို ကျူးကျော်ဟုဆိုကာ စစ်ကောင်စီက အင်အားအများအပြားသုံး၍ နှင်ထုတ်ခဲ့ကြောင်း မြို့ခံများက ပြောသည်။
ယနေ့(နိုဝင်ဘာ ၁၉ ရက်) နံနက် ၁၀ နာရီခွဲခန့်က မန္တလေးမြို့၊ ချမ်းအေးသာစံမြို့နယ်၊ အောင်နန်းရိပ်သာအနောက်ရပ်ကွက်၊ ၈၅ လမ်း၊ ၃၂ လမ်းနှင့် ၃၃ လမ်းကြားရှိ ဝင်းတစ်ခုအတွင်းသို့ စစ်ကောင်စီတပ်က အင်အားအများအပြားဖြင့် အချုပ်ကားပါယူဆောင်လာကာ လမ်းပိတ်ထားခဲ့ကြောင်း မြို့ခံအချို့က ပြောသည်။
ထို့နောက် အဆိုပါလမ်းကြားရှိ ဝင်းတစ်ခုအတွင်းမှ အိမ်ထောင်စုပေါင်း ၂၀ ခန့်အား ကျူးကျော်နေထိုင်သည်ဟု စွပ်စွဲပြီး အင်အားအများအပြားဖြင့် လာရောက်ကာ နှင်ထုတ်ခဲ့ခြင်းဖြစ်ကြောင်း မြို့ခံအချို့က ပြောသည်။
Public Service Announcement
“အရင်တုန်းကတော့ ဓမ္မာရုံမြေ။ အခုကျတော့ အစိုးရပိုင်၊ ပြည်သူပိုင်ဆိုပြီးတော့ သိမ်းပြီးတော့ ဘူဒိုဇာနဲ့ထိုးတာ။ အဲမြေမှာနေတာက မိသားစု နှစ်ဆယ်လောက်တော့ရှိတယ်။ အဲမှာ ကွန်ဒိုဆောက်မယ်ကြားတယ်။”ဟု အမည်မဖော်လိုသူ ဒေသခံအမျိုးသားတစ်ဦးက ပြောသည်။
ဖယ်ရှားခံရသည့် နေအိမ်ခြေအရေအတွက်ကိုမူ မသိရသေးပေ။
စစ်ကောင်စီတပ်က အဆိုပါလမ်းပိုင်းအား နေ့လယ်ပိုင်းအထိ ပိတ်ထားဆဲဖြစ်ပြီး ပြည်သူများထိတ်လန့်ခဲ့ရကြောင်း ဒေသခံများထံမှ သိရသည်။
စစ်ကောင်စီတပ်သည် ယမန်နှစ်အတွင်းကလည်း ပုသိမ်ကြီးနှင့်ပြည်ကြီးတံခွန်မြို့နယ်တို့ရှိ နေအိမ်အများအပြားအား အင်အားသုံး၍ ဖယ်ရှားခဲ့ဖူးသည်။
