မြို့သိမ်းတိုက်ပွဲ လဝက်ကျော်ကြာ ပြင်းထန်နေပြီး မြေပြင်လိုအပ်ချက်ပိုကြီးမားလာ၍ ပြည်သူများဝိုင်းဝန်းအားဖြည့်ရန် တိုက်တွန်း
ဟန်နွေ/People’s Spring
ချင်းပြည်နယ် မင်းတပ်မြို့၌ စစ်ကောင်စီ ကင်းစင်ရန် ရည်မှန်းချက်အတွက် မြို့သိမ်းစစ်ဆင်ရေး ဖော်ဆောင်လျက်ရှိရာ အောင်မြင်မှုများရရှိနေပြီး ရည်မှန်းချက် ပြည့်ရန် ယခင်ထက်ပိုနီးစပ်လာနေပြီဟု မင်းတပ်မြို့နယ် ချင်းဒေသကာကွယ်ရေးတပ်(CDF-Mindat) ပြောရေးဆိုခွင့်ရှိသူ ဆလိုင်းဟာအွမ်က ပြောသည်။
မင်းတပ်နှင့် ဖလမ်းမြို့သိမ်းစစ်ဆင်ရေးကို ချင်းညီနောင်က နိုဝင်ဘာ ၉ရက်မှ စတင်ဖော်ဆောင်လျက်ရှိရာ တိုက်ပွဲများ ဆက်တိုက်ဖြစ်ပွားလျက်ရှိသည်။ မင်းတပ်မြို့တွင် လဝက်ကျော်ကြာ နေ့စဉ်နီးပါး တိုက်ပွဲပြင်းထန်နေပြီး စစ်ကောင်စီက တိုက်လေယာဉ်၊ Y12 လေယာဉ်များ အသုံးပြုပြီး အကြိမ်ကြိမ် လေကြောင်း ပစ်ကူပေးခုခံလျက်ရှိသည်။
” မင်းတပ်ကို စကစတွေကင်းစင်သွားဖို့ ကျနော်တို့ ရည်မှန်းချက်တွေ ပြည့်ဖို့ အရင်ကထက် ရည်မှန်းချက်တွေ နီးစပ်လာတယ်။ တခုရှိတာက တိုက်ပွဲဖော်ဆောင်တိုင်း လိုအပ်ချက်ကတော့ တိုက်ပွဲကြာလာတာနဲ့အမျှ မြေပြင်မှာလိုအပ်ချက် ပိုကြီးလာတယ်။ လူထုတွေဝိုင်းရံဖို့ အရေးကြီးတယ်”ဟု ဆလိုင်းဟာအွမ်က ပြောသည်။
Public Service Announcement
ချင်းညီနောင် စစ်ဆင်ရေးကို မင်းတပ်နှင့် ဖလမ်းမြို့၌ ပြုလုပ်လျက်ရှိရာ စစ်ဆင်ရေးအောင်မြင်စေရေးအတွက် ပြည်တွင်း၊ ပြည်ပမှ ပြည်သူလူထုများ၏ ယုံကြည်အားကိုးမှု ပံ့ပိုးကူညီမှုသည် များစွာ အရေးပါသည်ဟု ၎င်းက ဆိုသည်။
ချင်းညီနောင် အပါအဝင် စစ်ကောင်စီတပ်ကို တိုက်ခိုက်နေသည့် မည်သည့် ကာကွယ်ရေးတပ်ဖွဲ့ကိုမဆို ပြည်သူများ ၀ိုင်းရံပံ့ပိုးကူညီပေးရန် တိုက်တွန်းလိုကြောင်း ဆလိုင်းဟာအွမ်က ပြောသည်။
“ပြင်းပြင်းထန်ထန် ကြိုးစားနေတယ်။ အသက်ပေးပြီး ရဲဘော်တွေက အစွမ်းကုန် ကြိုးစားနေတယ်။” ဟု ဆလိုင်းဟာအွမ်က မင်းတပ်မြို့သိမ်းတိုက်ပွဲ ဖော်ဆောင်မှု အခြေအနေကို ကို ပြောပြသည်။
စစ်ကောင်စီက မြေပြင်ထိုးစစ် မလာနိုင်သော်လည်း လေကြောင်း တိုက်ခိုက်မှုကို နေ့ည မပြတ် ပြုလုပ်ကာ ခုခံနေသည်ဟု ဆိုသည်။
တိုက်ပွဲကြာလာသည်နှင့်အမျှ မြေပြင်လိုအပ်ချက်များအတွက် CDF မင်းတပ် ရန်ပုံငွေရှာဖွေရေးကော်မတီက ဆောင်ရွက်နေသည့် တောင်ဇလပ်မြေ ကန်ပိန်းတွင် ပြည်သူများက ကံစမ်းမဲ ဝယ်ယူပြီးမြို့သိမ်းစစ်ဆင်ရေးအတွက် ပံ့ပိုးပေးရန် ဆလိုင်းဟာအွမ်က တိုက်တွန်းသည်။
ကံစမ်းမဲကာလကို နိုဝင်ဘာ ၁ရက်မှ ၃၀ရက်အထိ ပြုလုပ်မည်ဖြစ်ရာ သတ်မှတ်ထားသည့် ရည်မှန်းချက်ကိုရောက်ရှိရန် ရာခိုင်နှုန်းအားဖြင့်လိုအပ်နေသေးကြောင်း ၎င်းကဆိုသည်။ အဆိုပါ ကမ်ပိန်းမှ ရရှိသည် ရန်ပုံငွေအားလုံးကို မြို့သိမ်းစစ်ဆင်ရေးတွင် အသုံးပြုမည်ဟု CDF မင်းတပ်က အသိပေးထားသည်။
ယခု ကံစမ်းမဲဖောက်ပေးမည့် မြေများသည် တော်လှန်ရေး၌ ကိုယ်တိုင်ပါဝင်နေသူများ၏ မိဘများက မြေကို လှူဒါန်းထားခြင်းဖြစ်ကြောင်း အသိပေးသည်။
“တော်လှန်ရေးနဲ့ကြည့်မယ် မျိုးချစ်စိတ်ဓာတ်နဲ့ကြည့်မယ်ဆိုရင် အရမ်းတန်ဖိုးရှိမယ်။ သိပ်ကိုပေါ်လွင်စေမယ်”ဟု ဆလိုင်းဟာအွမ်က ပြောပြသည်။
တောင်ဇလပ်မြေ ကမ်ပိန်းမှ ကံစမ်းမဲပေါက်သူများကို ဆုအဖြစ်မြေကွက်များ ပေးအပ်သွားမည် ဖြစ်ရာ မင်းတပ်မြို့မှ မြေကွက် ၂ကွက်၊ထီးလင်းမြို့မှ မြေကွက် ၁ကွက် ပေးအပ်မည်ဖြစ်သည်။
မဲပေါက်၍ မြေကွက်မယူချင်သူများကို မြေကွက် ပေါက်စျေးနှင့် ညီမျှသည့် ငွေကြေးတန်ဖိုးပေးအပ်မည်ဟု CDF မင်းတပ်က အသိပေးသည်။
